Mi mi Dria blong Filipin

!Mabuhai, Kaibigan!*

Long wan intaviu we i kam long Emi Jen Livit

?Yu bin drim long laef blong yu blong go stap long wan aelan? Hemia Alejandria, be famle blong hem mo fren, oli singaotem hem Dria blong mekem i sot. Hem i bin stap long wan aelan blong Sebu Filipin wetem mama, papa, mo tufala sista blong hem. Hem i gat wan bigfala brata tu, be hem i bin ded bifo Dria i bon. “Mi save se hem i pat yet blong famle blong mi, mo bae mi luk hem sam dei from ol famle oli stap blong oltaem,” hem i talem.

Wan long ol samting we mi laekem blong mekem, hem i danis. Mi mi wan gel blong danis bale. Nekis yia, mi hop blong muv i go antap long nekis level, we hem i pointi. Hemia i minim se mi mas stat blong werem ol spesel sus blong bale we i helpem mi blong danis long ol to blong leg blong mi.

Long Filipin, i gat moa long 7,000 aelan, mekem se i gat plante naesfala ples blong visitim. Hom blong mifala i stap kolosap long solwota, mo mi lavem blong pleiplei long solwota. Wan long ol samting we mi laekem blong mekem, hem i swim. !Mi iven tijim mi olsem wanem blong swim!

Mi lavem blong stap go wetem famle blong mi blong visitim ol defren ples blong swim. Wan taem mifala i bin go long Palauan—wan aelan wetem bigfala reva andanit graon. Mi bin go daeva longwe wetem ol tul blong daeva blong mi mo luk evri kala fis.

Wan dei long skul, sam fren long klas blong mi, oli talem se ol Momon oli no biliv long God. Mi talem long olgeta se yumi biliv long God. Long nekis dei mi bin karem sam kad blong givimaot we i gat wan pikja blong Jisas long fored mo Ol Toktok blong Bilif oli stap biaen. Taem ol fren blong klas blong mi oli luk pikja ia mo ridim sam long ol bilif blong yumi, oli bin hapi blong save se yumi biliv long God.

Mi Lavem blong Luk Tempol

Yumi laki blong laef kolosap long Sebu Siti Filipin Tempol. Mi bin save go tua raon long tempol wetem famle blong mi bifo oli bin dediketem. Hem i bin wan naesfala ples mo i gat pis. Mi talem tangkyu se from ol tempol, famle blong mi i save stap tugeta blong oltaem.