Ol Profet long OlTesteman

Moses

“From se Moses i wan gudfala Profet, nao oli tokbaot Kraes tu olsem wan Profet we i semmak olsem lida ia blong bifo we i bin lidim ol pipol blong Isrel.”¹—Elda Brus R. MaKonki (1915–85) blong Kworom blong Olgeta Twelef Aposol

Mi bin bon long Ijip long wan taem we ol pipol blong mi, ol man Isrel, oli bin stap slef. Wetem fraet from namba blong ol man Isrel we oli stap slef i stat blong kam bigwan, Farao i bin givim oda blong oli kilimded evri boe Isrel we oli jes bon. Blong protektem mi, mama blong mi i bin haedem mi blong tri manis afta we mi bon, mo i putum mi long wan basket long medel blong ol longfala gras we oli gro long reva ia, Nael. Gel blong Farao i bin faenem mi mo i bin lukaotem mi olsem boe blong hem.²

Taem mi gro i kam bigwan, mi bin aot long Ijip mo go stap long graon blong Midian. Longwe, Jetro i bin laekem mi; hem i wan man blong lukaot long sipsip mo wan pris, mo mi bin maredem gel blong hem, Sipora. Mi bin kasem Melkesedek Prishud long Jetro.³

Wan dei, taem mi bin stap lukaot long ol sipsip blong Jetro, Lod i bin kamaot long mi tru long wan faea we i laet long wan smol tri mo i singaotem mi blong go sevem ol pikinini blong Isrel from oli slef long Ijip.⁴

Mi bin gobak long Ijip mo talem Farao blong karemaot ol pipol blong Lod, be hem i gohed blong mekem oli wokhad moa. Lod i bin sendem sam panismen long ol man Ijip, be Farao i bin mekem hat blong hem i kam moa strong mo i no wantem yet blong lego ol man Isrel oli go fri. Las panismen i bin wan enjel blong kilim man i ded we i kam blong kilimded ol fasbon boe blong evri famle long Ijip. Ol man Isrel, oli bin ravem pos blong doa blong olgeta, blad blong ol smol sipsip blong protektem olgeta mo oli stap nomo insaed long haos. Tru long mi, Lod i statem Lafet blong Pasova olsem wan odinens blong helpem ol man Isrel blong tingbaot merikel ia evri yia.⁵

Las panismen ia i bin mekem se Farao i jenisim tingting blong hem mo lego ol man Isrel oli go fri. Be afta, Farao i kros bakegen mo sendem ol ami blong hem blong folem ol man Isrel we oli aot. Lod i bin blesem mi wetem paoa blong seraotem Red Si, mo mifala i bin folem drae graon blong ronwe be wota i bin kavremap ol ami blong Farao.⁶

Afta, Lod i jes lidim mifala i go tru long draeples tru long klaod long deitaem, mo wan laet long naet taem. Hem i fidim mifala wetem wota, mana, mo ol smol pijin.⁷

Mi bin go antap long Hil ia Sinae, mo stap longwe blong 40 dei mo kasem Olgeta Ten Komanmen. Taem mi kambak long Hil ia, ol pipol blong Isrel oli bin tanem hat blong olgeta long God mo mekem wan buluk long gol blong wosipim. Oli nomo klin inaf nao blong kasem loa we God i givim long mi, mekem se mi brekem ston ia we ol komanmen oli stap long hem. Mi bin gobak long Hil ia, mo Lod i givim ol loa we i moa smol we oli singaotem folem nem blong mi—loa blong Moses.⁸

Long draeples, Lod i bin soemaot long mi fasin blong bildim wan tabenakol, wan tempol we oli save karem i go long eni ples. Mifala i bin karem tabenakol ia wetem mifala taem mifala i bin travel blong mekem se mifala i save wosip long hem. Long tabenakol, ol pipol oli bin kasem ol odinens mo mi bin toktok long Lod “long fored blong fes, olsem wan man we i stap toktok long fren blong hem.”⁹ Lod i bin soem long mi tu olsem wanem blong mekem wan ak blong kavenan (bokis blong saen blong promes), wan tabu ston we i stap antap long wan pat blong tabenakol we i moa tabu, I Tabu blong ol Tabu Samting.¹⁰

Taem Lod i bin sendem “ol posen snek” blong tijim ol man blong Isrel, mi bin kasem komanmen blong mekem wan pikja blong snek long bras, putum long wan pos mo stanemap, blong mekem se evriwan we snek i kakae olgeta, taem oli stap luk long pikja ia, nao oli kam gud bakegen. Be from oli gat hae tingting mo tingting se samting ia i wan isi samting nomo blong mekem, plante i no wantem lukluk, mo afta, oli bin ded.¹¹

Lod i bin mekem ol man Isrel oli wokbaot raon long drae graon blong 40 yia bifo i letem olgeta blong go insaed long promes graon.¹² Mi no bin go insaed be “Spirit i bin karemaot mi i go” long Lod.¹³

Ol Not

1. Bruce R. McConkie, Mormon Doctrine, 2nd ed. (1966), 515; luk tu long Dutronome 18:15–19.

2. Luk long Eksodas 1;2:1–10.

3. Luk long Eksodas 2:11–22; Doctrine and Covenants 84:6.

4. Luk long Eksodas 3; 4:1–17.

5. Luk long Eksodas 5–12; Esikel 45:21.

6. Luk long Eksodas 14.

7. Luk long Eksodas 13:21–22; 15:22–27; 16; 17:1–7.

8. Luk long Eksodas 24:18; 31:18; 32; 34.

9. Eksodas 33:11.

10. Luk long Eksodas 25–29; 40:21.

11. Luk long Namba 21:6–9; 1 Nifae 17:41; Alma 33:19–20.

12. Luk long Namba 14:33–34.

13. Alma 45:19.

Bokis blong Tru Samting: Moses

Ol Buk we Moses i raetem: Antap long buk blong Moses long Perel we i gat Bigfala Praes, Moses i raetem ol fas buk long Baebol: Jenesis, Eksodas, Levitikas, Namba, mo Dutronome.

Rol blong hem long laef bifo laef long wol ia: oli bin jusumaot hem blong prisaed ova long taem ia (luk long Abraham 3:22–23)

Rol blong hem long wol ia: i bin lidim ol man Isrel aot long Ijip; kasem loa long Hil Sinae (luk long Eksodas 12; 20)

Rol blong hem olsem wan mesenja: i bin kamaot long Hil blong Jenis I Kam Defren, mo givim prishud ki long Pita, Jemes, mo Jon (luk long Guide to the Scriptures, “Transfiguration,” scriptures.lds.org; i bin kamaot long Ketlan Tempol long Ohaeo, YSA, long 3 Epril 1836, i putumbak ol ki blong karembak Haos blong Isrel i go long Josef Smit (luk long D&C 110:11)