Visiting Tijing Mesej
Tabu Misin blong Jisas Kraes: Sevya mo Ridima
Stadi long toktok ia wetem prea mo luklukgud blong save wanem blong serem. ?Olsem wanem nao taem yu andastanem laef mo misin blong Sevya i leftemap fet blong yu long Hem mo blesem olgeta we yu stap lukaotem olgeta tru long visiting tijing? Blong kasem moa infomesen, go long . reliefsociety.lds.org.
Fet, Famle, Help
Aot long ol impoten taetol we oli yusum blong tokbaot Jisas Kraes, wan hem i Ridima,” Elda D. Tod Kristofeson blong Kworom blong Olgeta Twelef Aposol i talem. “Pemaot i minim blong pemaot wan samting blong wan man o wan kaon. Pemaot i save minim tu blong sevem o mekem wan i fri taem pem wan mane. … Wanwan long ol mining ia i givim defren saed blong gudfala fasin ia blong Pemaot Man we Jisas Kraes i bin komplitim tru long Atonmen blong Hem, we insaed, folem ol toktok blong diksonari, ‘i blong mekem yu kam fri long sin mo ol panismen blong sin, olsem wan sakrifaes we man we i sin i mekem.’”1
Lina K. Beton, Rilif Sosaeti jeneral presiden, i bin talem: “Papa long Heven … i bin sendem Wan Stret Pikinini Ia Nomo blong Hem we i stret evriwan blong safa from ol sin blong yumi, ol soa long hat, mo evri samting we i luk olsem se oli no stret long laef blong yumiwan.
“… Wan woman we i bin go tru long ol yia blong hadtaem mo harem nogud i bin talem wetem wota long ae: ‘mi kam blong luksave se mi mi olsem wan olfala pepa mane blong 2,000 vatu—i rafraf, i brok, i doti, we oli yusum nogud, mo i gat mak long hem. Be … mi mi stap yet wan 2,000 vatu.’ Woman ia i save se hem … i bin gud inaf long [God] blong sendem Pikinini blong Hem blong i pem praes blong hem, hemwan. Evri sista long Jos i mas save wanem woman ia i save.”2
I Kamaot long Ol Skripja
I Kamaot long Histri blong Yumi
Niu Testeman i gat ol stori blong ol woman we oli bin praktisim fet long Jisas Kraes, oli lanem mo laef folem ol tijing blong Hem, mo testifae long seves blong Hem, ol merikel blong Hem, mo olsem wanem Hem i hae tumas.
Jisas i bin talem long woman ia long wel:
“Man we i dring wota blong wel ya bambae i save tosta bakegen. Be man we i dring wota ia we mi bambae mi givim long hem, bambae hem i no save tosta bakegen samtaem. Wota ya we mi bambae mi givim long hem i save kam olsem wan spirngwota we i save ron oltaem insaed long hem, blong givim laef ya long hem we i no save finis.
“Nao woman ya i talem long hem se: Masta, plis yu givim wota ya long mi, blong bambae mi no moa save tosta bakegen samtaem, mo bambae mi no moa kam long ples ya bakegen blong kasem wota. …
“Mi mi save we Mesaea ya hem i mas kam. We oli singaotem Hem Kraes; mo taem hem i kam, bambae i save talemaot olgeta samting long yumi.”
“Jisas i talem long hem se: Be mi ya nao, mi stap toktok wetem yu.”
Nao woman ya i gobak long taon i livim botel wota blong hem i stap. Nao hem i talemaot long ol man long ples ya. …” (Luk long Jon 4:6–30.)