Stap Rere blong Givim Seves, Givim Seves blong Stap Rere
God i givim Aronik Prishud long yufala from se Hem i gat wan wok blong yu mekem—naoia mo long fiuja.
Ol Pikja oli kam long Taea Moli
Jonatan i wan fren blong mi we i joenem Jos fo yia i pas. Hemwan nomo i memba blong Jos long famle blong hem. Afta we hem i kasem Aronik Prishud, hem i stat blong givim seves long ol narafala man i bitim wanem hem i bin mekem bifo. Jonatan i save se, blong givim seves, hem nidim blong lanem fulap samting. Hem i wantem tu se bae hem i mas klin inaf, mo man i save dipen long hem; mekem se hem i bin stadi long gospel, hem i bin prea, mo i go long ol Sandei miting mo seminari. Hem i bin wokhad blong obei long ol komanmen mo ol standet blong Jos. Hem i bin wok strong wetem strong tingting blong mekem ol prishud diuti blong hem, mo tu, hem i stap olsem wan gudfala hom tija. Buk blong hem blong Diuti long God i bin helpem hem blong andastanem olgeta diuti ia, mo blong lanem olsem wanem blong mekem olgeta.
Fetful prishud seves blong hem i givim hem paoa long saed blong spirit. I helpem hem blong protektem hem long ol fos blong devel. Hem i kam antap bigwan taem hem i stap givim seves mo stap rere from fiuja blong hem. Long las yia, hem i bin klin inaf blong kasem Melkesedek Prishud mo endaomen blong tempol. Naoia, hem i stap long wan misin long Brasil.
Plante taem oli stap singaot Aronik Prishud se hem i “prishud blong mekem rere.” God i givim yu Aronik Prishud from se hem i gat wan wok blong yu mekem—naoia mo long fiuja. Fetful seves blong yu long Aronik Prishud i mekem yu rere from ol janis we oli moa bigwan blong yu save givim seves long ol yia we oli stap kam. Semmak olsem Jonatan, yufala i stap rere blong “kasem Melkesedek Prishud, blong ksaem ol blesing blong tempol, blong go long wan fultaem misin, blong stap olsem wan hasban mo papa we i gat lav, mo blong gohed long wan seves long ful laef blong yu, i go long Lod” (Stap Tru long Fet: Blong Andastanem Gospel [2004], 4).
Ating bae yu no save evri ditel blong ol gudfala janis we Papa long Heven i holem i stap blong yu, be mi mi gat tras se bae yu rere blong kasem olgeta sapos yu tingbaot blong mekem olgeta samting ia olsem wan we i kasem Aronik Prishud.
Folem Jisas Kraes
Olsem wan we i kasem prishud, yu wan ripresentativ blong Jisas Kraes. Hemia i minim se oli askem yu blong folem Hem mo blong yu mekem wanem bae Hem i mekem. ?Wanem nao bae Hem i mekem? Long evri situesen, Hem i bin givim ful laef blong Hem blong givim seves mo blesem ol narafala man. Bae i semmak long yu. !Givim yuwan long seves i go long ol narafala man—mo afta, kam antap mo gro blong i gat moa samting blong yu givim! Tingbaot olsem wanem Jisas i bin gro i kam antap taem Hem i bin yangfala: “Nao Jisas i stap gruap moa long bodi blong hem mo long waes blong hem tu. Mo oltaem God i glad tumas long hem mo ol man tu oli glas tumas long hem” (Luk 2:52).
Pat blong stap folem Sevya, i blong kam waes mo helti long bodi taem yu yangfala. Hemia i minim we yu mas wokhad mo oltaem mekem bes blong yu (luk long D&C 4:2). Yu stap stret long fes blong God taem yu stap kam kolosap long Hem tru long prea evri dei, stadi long gospel evri dei, obei mo seves. Yu stap stret long fes blong ol narawan taem yu stap gat kaen fasin mo stap tru long famle blong yu mo yu stap wan fren olsem Kraes long evriwan.
Tingbaot se Jisas, oltaem, hem i stap mekem tingting blong Papa blong Hem. Yu stap folem Kraes taem yu stap luklukgud blong folem tingting blong God long ful dei blong lidim seves blong yu mo mekem samting folem ol toktok long saed blong spirit we yu stap kasem
Mekem Ol Prishud Odinens
I nid blong evriwan long ol pikinini blong God oli gat ol prishud odinens blong Hem i blesem ol boe mo ol gel blong Hem i semmak nomo. Stat long taem we yu kam wan dikon, yu help blong wok long wan prishud odinens taem yu pasem sakramen. Bae yu gohed blong givim ol prishud odinens long Aronik Prishud afta, taem yu stap rere mo blesem sakramen, mekem baptaes, mo tekpat long odinesen blong ol narafala man we oli kasem Aronik Prishud.
Blong tekpat long ol tabu odinens, yu mas stap klin. Fasin we yu stap klin long tingting mo long saed blong seks i givim yu moa paoa long saed blong spirit long ol odinens ia we yu stap givim. Traehad blong stap klin inaf long evri wei blong givimaot ol toktok blong sakramen blong Lod (luk long D&C 38:42). Taem yu mekem hemia, yu save stanap long fored blong wod o branj blong yu olsem wan tru representativ blong Jisas Kraes. Bae olgeta oli kasem blesing from strong tingting blong yu blong kipim ol kavenan we yu stap helpem olgeta blong riniu.
Givhan Oltaem
Olsem wan we i kasem Aronik Prishud, yu stapgivhan. Long evri taem, lukaotem ol janis blong givhan long famle blong yu, long ol fren, ol memba blong kworom, mo ol narawan. Evri samting we yu mekem long prishud, i helpem yu blong givhan long ol narawan long saed blong bodi mo long saed blong spirit. Eksampol, taem yu helpem bisop blong yu o branj presiden blong yu blong givim seves long wan famle we yu hom tij, yu stap lanem olsem wanem blong faenemaot mo tekem kea long ol nid blong ol narafala. Mo tu, bae yu givhan long ol narawan taem yu go aot blong mekem ol memba blong kworom blong yu oli kam strong moa, mo taem yu sevem ol lesaktiv, putum tugeta ol fas ofring blong helpem olgeta puaman mo olgeta long nid, mekem ol wok long bihaf blong olgeta we oli sik mo handikap, taem yu tij mo testifae abaot Kraes mo gospel blong Hem, mo taem yu karemaot ol hevi trabol blong olgeta we tingting blong olgeta i slak.
Yu givhan taem yu stap tijim ol lesen long kworom miting blong yu mo long famle haos naet blong yu. Yu givhan taem yu stap invaetem evriwan blong kam long Kraes (luk long D&C 50:29)—long hom, long kworom, long skul, wetem ol fultaem misinari, mo long weaples yu stap long hem.
Fiuja blong Yu
Wetem papa mo mama blong yu o ol advaesa blong yu, toktok raon long wanem nao bae yu nidim long ol fiuja wok blong yu olsem wan Melkesedek Prishud, wan misinari, wan hasban, mo wan papa. Raetem, long spes we i stap, sam long ol bigfala responsabiliti ia, mo olsem wanem bae yu save rere from olgeta tedei taem yu stap wok long Aronik Prishud. Maet bae yu luk naoia se i bigwan, be tingbaot se bes wei blong mekem yu rere i blong mekem nomo wanem we Papa long Heven i askem yu blong mekem tedei. Bae yu faenem hapines taem yu stap givim seves naoia mo taem yu stap rere from gudfala fiuja blong yu.