Yumi Ol Han blong Lod
Blong stap lukaotem olgeta we oli pua mo blong stap givhan long olgeta we oli safa i impoten tumas long wanem i minim blong stap olsem wan disaepol blong Jisas Kraes.
Long taem blong ol eli dei blong bigfala ekonomi problem, sikis stek presiden blong Sol Lek Vale oli bin joen tugeta blong traem help long wan hadtaem ia blong stap pua mo hanggri we i kam mo spolem plante laef blong ol memba blong Jos.1 Nomata se problem blong mane ia i bin kasem evri man long evri ples, Yuta nao i bin nogud moa.2
Long taem ia, ol lida blong Jos oli bin gat smol risos blong helpem olgeta we oli stap long nid. Oli save yusum fas ofring, i tru, be nid ia i bin gohed olsem mo i kam moa bigwan bitim wanem we oli bin stap eksperiensem. Anda long daereksen blong Prisaeding Bisoprik, oli bin statem wan Deseret Ofis blong Wok long ol yia 1900. Be i no bin fulap gud blong save givhan long ol bigfala nid we i stap.
Ol sikis prishud lida, oli bin save se sapos oli blong helpem ol pipol blong ol stek blong olgeta, bae oli no save wet. Bae oli mas tekem wan kwik aksen. Oli stat blong mekem ol pipol oli wok. Oli bin oganaesem ol man mo tekem olgeta i go long ol garen, blong save karemaot ol kaekae long graon. From se oli wok, ol glad fama ia oli bin donetem wetem glad hat ol kaekae long ol man ia. Mo ol ekstra kaekae, oli bin tekem i go long stoahaos mo givimaot long ol narafala man we oli hanggri. Taem we oli kasem moa donesen, Ol Sent oli stat blong putum ol kaekae long tin mo sevem i stap. Hemia i bin olsem stat blong welfea program long taem blong yumi tedei.
Eiti yia afta, ol lida blong Jos tedei raon long wol, oli lukluk ova long ol memba blong olgeta mo filim long sem strong tingting blong go aot mo helpem olgeta long nid.
Long Oktoba 2011 jeneral konfrens, Presiden Dita F. Ukdof, Seken Kaonsela long Fas Presidensi, i bin talem: “Plante taem yumi luksave ol nid raon long yumi, wetem hop se wan man longwe bae i kamaot olsem majik blong ansarem ol nid ia. O ating yumi wet long ol waes man wetem spesel save blong stretem ol spesel problem ia. Taem yumi mekem olsem, yumi stopem neiba blong yumi long seves we yumi save givim long hem, mo yumi stopem yumiwan long janis ia blong givim seves. Nomata i nogat wan samting we i rong wetem ol waes man, be letem yumi fesem: neva bae oli inaf blong stretem evri problem. Be, Lod i bin givim prishud blong Hem mo oganaesesen blong hem long fored blong ol doa blong yumi long evri nesen we Jos i stap long hem.”3
Hemia i singaot blong ol lokol Jos lida mo ol memba blong tekem aksen folem inspiresen we i kam long Tabu Spirit taem i lidim plante raon long wol, olsem we Presiden Ukdof i talem, “faenemaot blong [olgetawan].”4 Oli bin rolem sot blong olgeta i go antap mo rere blong tingbaot, long evri samting, olgeta we oli pua, olgeta we oli gat nid, olgeta we oli sik mo harem nogud (luk long D&C 52:40).
Ekwado
Taem we Bisop Joni Morante long Guayakil, Ekwado, i lukluk i go long ol memba long wod blong hem, hat blong hem i tingting hevi long olgeta. Plante famle tumas oli bin traehad blong gat ol besik samting we oli nidim long laef. Hem i bin wantem blong helpem olgeta, mekem se hem i bin toktok wetem ol lida blong wod mo hem i bin tekem situesen ia i go long Lod.
From se ol ol janis blong wok long eria i no bin gat tumas, hem i bin stat blong wok wetem wan grup blong 11 sista, mo leftemap tingting blong olgeta blong gohed wetem tingting ia blong gat wan smol bisnis. Ol sista ia oli bin luksave se i gat wan nid blong gat kwaliti saplae blong klinim haos we i jip, mo oli stap tingting sapos oli save mekem mo salem olgeta samting ia long komuniti. ?Be olsem wanem nao bae oli lanem blong mekem ol saplae ia?
Long taem ia, Bisop Morante i bin save long wan sista long wod blong hem we i nomo wok, we bifo hem i bin wok long wan drag stoa. Taem ol 11 sista oli bin askem hem sapos hem i save helpem olgeta, hem i bin glad blong tijim olgeta olsem wanem blong mekem ol sef kwaliti saplae.
Oli bin krietem wan bisnis plan, mekem wan map long ol eria blong komniti we wanwan sista bae i lukaotem, jusum ol prodak we bae oli mekem, mo droem paket mo wanem bae oli raetem long hem.
Long sam manis, oli bin bildim wan ples blong kastoma i kam long hem mo i bin givim inaf mane i kam insaed blong mekem oli nomo pua mo helpem olgeta long ol nid blong ol famle blong olgeta.
Taem ol maneja blong ol lokol drag stoa kampani i bin save abaot bisnis ia, oli bin intres tumas long stori ia blong woman ia we i bin wok bifo long wan drag stoa ia. Afta oli bin intaviu hem mo tekem hem i kam hed blong seksen we oli stap mekem ol saplae long kampani blong olgeta.
Rasia
Long Rekoni Wod blong Mosko, Rasia, Galina Gonjarova, we i bin stap givim seves olsem woman blong raetem histri blong wod, i bin glis long sam aes mo brokem tufala han blong hem. Oli bin tekem hem i go long hospital, mo putum simen long tufala han blong hem. Hem i no save kakae o werem klos hemwan. Hem i no save komem hea blong hem o blong ansarem fon tu.
Taem ol memba blong wod oli bin harem abaot wanem we i bin hapen long hem, oli bin ansa kwik. Ol man we oli kasem prishud oli bin givim hem wan blesing mo oli bin wok wetem ol sista blong Rilif Sosaeti blong mekem wan program blong stap jekem gudfala sista ia mo lukluk long ol nid blong hem.
Vladimir Nejiporov, wod misin lida i bin talem: “Mifala i tingbaot wan toktok we i bin kamaot long jeneral konfrens abaot wan statiu blong Kraes we ol han blong hem i nogat.5 Andanit long statiu ia, wan man i bin putum wan notis we i rid olsem: ‘Yu yu han blong mi.’ Blong sam wik, gudfala sista ia i no bin save mekem wan samting, ol memba blong Rejnoe Wod oli bin filim wan samting long stori ia. Mifala stret i bin kam ol han blong hem.”
Filipin
Taem strong win ia, Wasi, i bin kasem Filipin long 2011, i bin smasem eria wetem bigfala wota mo win. Kolosap 41,000 hom oli bin damej, mo i gat moa bitim 1,200 pipol we oli bin lusum laef blong olgeta.
Bifo bigfala wota i kavremap ples, Maks Savedra, presiden blong Kagayan de Oro Filipin Stek, i bin kasem filing ia blong statem wan tim blong stek blong stap ansa long ol imejensi. Hem i bin oganaesem ol komiti blong fulfilim sam wok—evri samting, stat long wok blong lukaotem mo sevem man i go long fas eid, blong givimaot kakae, wota mo klos.
Taem we bigfala wota ia i bin go daon long wan level we i sef, ol lida mo ol memba blong Jos oli bin kam tugeta. Oli bin mekem ripot from sefti blong wanwan memba mo faenem ol damej. Wan memba i bin saplae wan wilbaro blong karem ol memba we oli no save muv i go long ples we i sef. Ol mitinghaos oli bin open i stap blong olgeta we oli nidim kaekae, klos, ol blangket, mo wan ples blong stap smol taem long hem. Klin wota i wanem we oli nidim tumas, mekem se Presiden Savedra i bin kontaktem wan lokol bisnis we i gat wan faea trak, mo oli bin transpotem klin wota i go long mitinghaos we i kam ol senta blong ol man we oli nidim ples blong stap. Ol memba wetem ol eksperiens long saed blong meresin, oli bin stap blong dresing long olgeta we oli kasem kil.
Afta we oli bin kaontem ol memba blong Jos, Presiden Savedra mo tim blong hem i bin visitim ol nara senta blong ol man we i nidim ples blong stap long siti mo askem blong givim help. Oli bin karem kaekae mo ol nara saplae i go long olgeta. Plante long ol memba, nomata oli bin lusum ol hom blong olgetawan, oli bin givim seves long semtaem long ol narafala man afta long strong win ia, mo oli no tingbaot olgetawan. Taem ren i bin stop mo graon i bin drae, Ol Momon Han blong Givhan, we oli ol volontia we oli kamaot long tri stek, oli bin go blong givimaot ol saplae mo semtaem stap help wetem klinap.
Brasil
Insaed nomo long siti blong Sete Lagoas, Brasil, i gat wan ples blong ol woman we oli handikap, we oli bin spolem laef blong olgeta wetem drag. Wanwan dei oli traehad blong save laef. Oli bin gat wan smol oven we oli yusum blong produsum kolosap 30 lof blong bred long wan dei. Nomata ol woman ia oli bin kasem sam help i kam long wan lokol yumaniterian asosiesen, yet oli no gat inaf blong save fidim olgetawan bakegen. Taem ol lida blong Jos long Sete Lagoas Brasil Stek oli save long ol nid blong ol woman ia, oli bin wantem blong help.
Oli bin toktok long ol woman ia abaot ol nid blong olgeta. Ol woman ia oli talem we sapos oli save produsum moa bred, bae oli no save fidim gud nomo olgetawan bakegen, be ating oli save salem sam bred mo winim sam mane i kam insaed tu we oli nidim tumas.
Ol lida mo memba blong Jos oli bin wok wetem ol lokol militeri polis mo wan lokol skul blong impruvum ol kondisen blong ol woman ia. Wetem help blong wan Jos yumaniterian grant mo volontia we i kam long Jos mo long komuniti, oli bin save krietem wan niu bekeri—wan we i mekem se ol woman i produsum 300 bred evri dei.
Wetem smol mane we oli bin kasem, ol woman long bekeri oli save pem wan blong wok—wan long ol woman we i stap wetem olgeta.
Wok blong Welfea
Semmak olsem ol lida blong Jos long samples 10 yia we i pas finis, we oli bin luk bigfala nid raon long olgeta mo no wantem blong lukluk i go longwe; ol lida mo memba blong Jos raon long wol tedei oli stap mekem sem samting long ol ples blong olgetawan, mo long wei blong olgetawan.
Taem Presiden Ukdof i bin toktok long Jos abaot fasin blong stap kea long ol narawan, hem i talem: “Wei blong Lod i no blong sidaon long saed blong reva mo wet blong wota i ron pas bifo yumi krosem. Hem i blong kam tugeta, rolem ol sot blong yumi i go antap, stat wok, mo bildim wan brij o wan bot blong krosem ol wota blong ol jalenj blong yumi.”6
Lukaotem olgeta we oli pua mo givhan long olgeta we oli safa i wan impoten pat long wanem i minim blong stap wan disaepol blong Kraes. Hem i wok we Jisas Kraes Hemwan i bin mekem taem Hem i stap givhan long ol pipol long taem blong Hem. “Wok ia blong provaedem samting long wei blong Lod i no jes wan samting we i stap long program blong Jos blong mekem,” Presiden Ukdof i talem long en. “Yumi no save lego i stap o putum long saed. Hem i stap long medel blong doktrin blong yumi; hem i laef blong relijin blong yumi.”7