Mi Bin Gat Plante blong Serem

Brent Fisa, Kalifonia, YSA

Oltaem mi stap tingbaot long fasin blong stap rere long taem blong imejensi, long saed nomo blong lukaotem gud famle blong mi mo mi. Be mi bin lanem blong lukluk long fasin blong rere ia long wan defren wei, long wan Sandei moning long Saot Florida long 1992. Hariken Andru, wan long ol strong hariken we i bin prapa spolem gud Yunaeted Stet, i stopem wan naes sama long Maeami, Florida.

Mi bin stap miwan blong sot taem long wan apatmen long saed blong solwota, mo stap go long wan tri manis trening program blong wok blong mi. Taem woning blong hariken i bin kam, mo mi bin harem se bae mifala i nid blong muvaot long ol apatmen blong mifala samtaem long medel dei, nao wan fren i bin bukum ol hotel rum long wan ples long medel blong aelan, blong mi mo blong olgeta we mi wok wetem. Mi nilim blokem ol windo blong mi wetem ol plaewud mo fulumap gud evri samting blong mi.

Mi bin stap hop blong gat visit blong waef blong mi mo ol pikinini, mekem se mi bin pem finis inaf kaekae mo wota blong famle blong mi, we mifala i sikis evriwan. Mi bin filim kamfot wetem save ia se mi gat wan sef ples blong stap mo inaf kaekae blong tekem wetem mi blong i save kipim mi blong sam wik.

Taem mi stap rere blong aot long 10:30 long moning, mi filim gud—evri samting i bin stap long oda. Mi nildaon mo prea, talem tangkyu long Papa long Heven from ol blesing blong mi, mo aksem help blong Hem long taem blong strong win ia. Taem mi stap endem prea blong mi, Spirit i tajem mi blong talem: “Sapos i gat eniwan we i nidim help, plis helpem mi faenem hem.”

Sam minit afta, wan wido we i gat 80 yia, i noknok long doa blong mi. “Sore tumas,” hem i talem. “Mi rong long rum. Mi stap lukaotem wan fren.”

Fes blong hem i soem se hem i seksek. Taem mi askem sapos mi save help, hem i stat blong kros mo talem se hem i no save wanem blong mekem mo wea blong go. Mi askem hem se hem stap wea, mo tugeta mitufala i go long apatmen blong hem, faenem situesen blong hem, mo traem luk wanem blong mekem.

Mi bin talem long hem se ating fren blong mi i save gat wan ples long ol hotel rum blong mifala, mo mi invaetem hem blong stap wetem grup blong mifala. Hem i jes pulum gud win nao. Kwiktaem, mitufala i fulumap mo blokem gud apatmen mo ol samting blong hem, mo mi bin mekem rod blong wan fren i draevem trak blong tekem hem i go long hotel.

Taem mi stap rere blong aot, tu moa wido i aksem help. Mi bin helpem olgeta blong stap kwaet blong oli save tingting gud mo faenemaot weaples blong go haed long hem. Taem mi pikmap wan bokis blong wan long ol wok fren blong mi, wan nara olfala wido i kam askem help. Mifala i bin putum ol samting we isi blong brok long wan sef ples, mo helpem hem blong rere blong aot.

Blong smol taem ia, ol nara wok fren oli bin invaetem 2 studen blong kolej we oli bin stap long wan aelan, blong kam stap wetem grup blong mifala long hotel. Kaekae we oli bin gat, hem i nomo sam smol swit kaekae we yu save holem nomo long wan han, mo smol wota we i no kasem 1lita. Laki se mi bin gat plante blong serem, i no wetem olgeta nomo, be wetem evriwan tu.

Hem i wan blesing blong stap rere mo letem Lod i lidim yu. Samting ia i bin letem mi blong putum pis long taem blong wan woning, mo blong spendem kolosap fultaem blong mi blong helpem ol narafala man mo no stap wari abaot miwan. Mi bin kasem wan niu level blong talem tangkyu from kaonsel we i kam long ol prishud lida blong stap rere.