Au o Dria mai na Filipaini

Mabuhay, Kaibigan!*

Mai na dua na veivakatarogi nei Amie Jane Leavitt

Ko sa bau tatadrataka tu li mo na vakaitikotiko ena dua na yanuyanu? Oqo o Alejandria, ia era kacivi koya vakalekaleka Dria na nona matavuvale kei na itokani. E vakaitikotiko okoya ena yanuyanu o Cebu e Filipaini vata kei tinana, tamana, kei na rua na tacina. E tiko talega e dua na ganena qase, ia a mate ni se bera ni sucu o Dria. “Au kila ni se tiki tikoga ni neitou matavuvale okoya, ka’u na raici koya ena dua na siga baleta na matavuvale e tawamudu,” e kaya okoya.

Dua na ka au dau taleitaka ni cakava oya na danisi. O au e dua na daudanisi ballet. Au vakanuinui ni toso cake ena yabaki vou ki na ivatavata e tarava, oya na pointe. Oqo e kena ibalebale ni’u sa na daramaka na ivava ni ballet vakarautaki ka vukei au ni danisi ena veiqaqalo ni yavaqu.

E tiko e Filipaini e sivia na 7,000 na yanuyanu, ka sa vuqa sara na vanua totoka me sikovi. Na neitou itikotiko e voleka ki matasawa, ka’u dau taleitaka na qito e waitui. Dua na ka au dau taleitaka ni cakava oya na qalo. Au a vakatavulici au ga ena kena iwalewale!

Au taleitaka na lako vata kei na noqu matavuvale ka sikova na veimatasawa duidui. Keitou a lako ena dua na gauna ki Palawan—e dua na yanuyanu ka taukena na uciwai levu duadua ena botoniqele e vuravura. Au a laki sisili tu ekea vata kei na noqu iyaya ni nunu ka vakaraica na ika duiroka taucoko.

Ena dua na siga e koronivuli, era a kaya eso na lewe ni kalasi ni o ira na Momani era sega ni vakabauta na Kalou. Au tukuna vei ira ni da vakabauta na Kalou. Au a kauta mai ena siga ka tarava eso na kadi veisoliyaki ka toka kina na itaba kei Jisu eliu kei na Yavu ni Vakabauta e dakuna. Ni ra raica na itaba na noqu lewe ni kalasi ka wilika eso na noda vakabauta, era sa marau ni kila ni da vakabauta na Kalou.

AU TALEITAKA MEU RAICA NA VALETABU

Keitou sa kalougata ni keitou vakaitikotiko voleka ki na Cebu City Philippines Temple. Au a rawa ni sarasara ena valetabu vata kei na noqu matavuvale ni bera na kena vakatabui. Sa dua dina na vanua totoka ka veivakacegui. Au sa vakavinavinaka me baleta na valetabu, ni sa rawa ni tiko vata me tawamudu na noqu matavuvale.