Kunei ni Nuinui ena Gauna Mai Muri

Mai vei Stan Pugsley

E vakaitikotiko na dauvolaivola mai Arizona, Amerika.

Na cagi vata ga a liwa ka veivakarerei me vakadrukai keda e sa teivaka talega na sore ni kau ni veisau kei na tubu.

Ena Sepiteba 12, 2001, au a taubaletaka tiko kina kei na watiqu na buturara ni dua na vale ni bula e Tucson, Arizona, Amerika, ena tauri voli ni veiaua namaki ni neirau waraka me sucu na luvei keirau tagane. Mai na neirau retio yaloyalo kei mai na retio yaloyalo kece sara ena loma ni vale, keimami a vakadreti ena ivakamacala lekaleka mai na siga sa oti ena veika a yaco e New York City—me baleta na rua na vale babalavu ka a keleca taumada na irairai ni macawa ni siti oya, ni kasura ka vurumeme sara. Na veika a yaco, na kakaburaki ena veiaua, a vakavuna vei keirau na yalolailai. E a vaka me dua na gauna veilecayaki ni kauta mai kina e dua na gone dramidrami ki na vuravura—e dua na vuravura e vaka me buto sara ka rerevaki.

A sucu ena mataka lailai ni siga ka tarava na luvei keirau tagane. Ni’u roqota koto na luvei keirau lailai, au a vakasamataka na veika vakadomobula a yaco ena vica na siga sa oti, na veika a vakavuna me’u nanuma lesu kina na kama e Yellowstone National Park ena 1988. Na yameyame a vakarusa ni rauta e 800,000 na eka (323,750 ha) ni veikau. Na vakacacani ni igadigadi sa sega ni tukuni rawa. Na veika vakaitukutuku e vakaraitaka walega na qele kama kei na kubou loaloa vavaku ena macawa. E sega tale ni dua na iwalewale ni sasaga vakatamata ena rawa ni vakalesuya totolo mai na veika sa yali. Sa vaka me o ira sara mada ga na yavu tamata qaqa tawavakasuka ni veika buli era sa sega ni vorata rawa na kaukauwa ni veivakacacani ni kama.

Ia a yaco e dua na cakamana malua ena vulaitubutubu ka tarava—sa ra tekivu cadra mai na veisorenikau lalai kei na senikau mai na qele kama. Mani yaco mera seraka mai e levu sara na senikau kei na veikau kei na vunikau mai na qele. A malua na sucuvou ni igadigadi ka vakatawani ena veika lalai vakalagilagi, ka vakilai e muri na vakasakiti ni kena rawaka.

Ena gauna ni nuiqawaqawa ka vaka me curumi keda me vaka na kama caudre e Yellowstone, ni sa tu na noda vakabauta kei na inuinui ena kena icavacava, sa dodonu meda nanuma ni sa tiko e dua na yavu malua ka tawayavalati rawa e rukuda, e kaukauwa vakalevu sara mai na ivadi ni vunica eda na sotava. E vakamacalataka o Ilamani ni yavu oqo “na uluvatu ni noda iVakabula, sa ikoya na Karisito, na Luve ni Kalou.” Kevaka meda kelea na noda bula Vua, ia “ni sa vakaliwava mai na tevoro na nona cagi kaukauwa kei na nona moto ena covulaca, ka sa yaviti kemudrau ena nona uca cevata kei na nona cagilaba, ena sega ni rawai kemudrau se dreti kemudrau sobu ki na ikeli ni rarawa kei na yaluma tawamudu, ni sa dei sara na uluvatu drau sa tara kina; ia kevaka sa tara cake na tamata ena yavu oqo, ena sega ni bale rawa” (Ilamani 5:12).

Ni sotavi na veitovo vakasausa ni vunica kei na veitemaki ni vuravura, eda na rairai nanuma ni veivakayarayarataki lailai ka rawarawa ni kosipeli esa sega ni veiraurau ka veivakadrukai. Eda na rairai vakila na vakatitiqa kei na yalolailai ni da wawa ena vuturi me vakadodonutaki na veicala, me na vakaseavutaki na mosi, ka wali na vakatataro eso. Na veicagi saraga oya ka liwavi keda, sa mai, teivaka na veisorenikau ni veisau kei na tubu, ka sa cakacaka voli vagagalu na kaukauwa vakamareqeti ni kosipeli ena ruku ni qele ni veika bula ni vuravura, ena vakarautaki ni dua na udolu na sorenikau lalai ni inuinui kei na bula.