Na Kaukauwa mo Vakalougatataka na Tamata Kecega
Era sa vakavulica vei keda na iliuliu ni Lotu ni sa vakarautaki tu vakatautauvata na veicakacaka vakalotu ni matabete kei na veiyalayalati vei ra kecega na Luve ni Kalou—na tagane kei na yalewa.
DROINI MAI VEI Gail Armstrong
“Na matabete sai koya na mana kei na lewa ni Kalou e soli me baleta na nodra vakabulai kei na nodra vakalougatataki na tagane, yalewa, kei na gone kecega. …
“Sa dau tu ga na veivakalougatataki uasivi mai vua na Kalou me baleti ira na buladodonu ka ra sa papitaiso, ciqoma na Yalo Tabu, ka laki vakayagataka wasoma na sakaramede. Ena kauta mai na valetabu na ikuri ni rarama kei na kaukauwa, kei na yalayala ni bula tawamudu [raica na V&V 138:37, 51].”
Elder Neil L. Andersen ena Kuoramu ni iApositolo Le Tinikarua, “Kaukauwa e Tiko ena Matabete,” Liaona, Nove. 2013, 92.
“O ira na cakacaka vakalotu kei na veiyalayalati ni matabete oqo era sa katuba tiko ki na veivakalougatataki sa yalataka tu vei keda na Kalou, ka ra sa vakayacori rawa ena vuku ni Veisorovaki ni iVakabula. Era sa vakaiyaragitaki kina na luvena tagane kei na luvena yalewa ni Kalou ena kaukauwa, o ya na kaukauwa ni Kalou, ka vakarautaka vei keda na madigi meda ciqoma kina na bula tawamudu—meda lesu rawa ki na iserau ni Kalou ka laki bula vata kei Koya kei na Nona matavuvale tawamudu.”
Carole M. Stephens, imatai ni daunivakasala ena mataveiliutaki raraba ni iSoqosoqo ni Veivukei, “Eda Kila Beka na ka sa Tu Vei Keda?” Liaona, Nove. 2013, 14.
“Sa ka bibi sara vei keda meda na kila vakavinaka ni sa vakarautaka vei keda na Tamada Vakalomalagi e dua na sala kivei ira kece na Luvena tagane kei na yalewa. mera na rawata na veivakalougatataki ka vaqaqacotaki ena kaukauwa ni matabete. Sa iusutu ki na ituvatuva ni Kalou me baleti ira na luvena vakayalo na veika sa vakaraitaka oqo o Koya: “Oqo na inaki kei na lagilagi ni noqu cakacaka—me ra tucaketale mai na mate na tamata kecega ka rawata na bula tawamudu” (Mosese 1:39).”
Elder M. Russell Ballard ena Kuoramu ni iApositolo Le Tinikarua, “Oqo na iNaki kei na Lagilagi ni Noqu Cakacaka,” Liaona, Me 2013, 19.
