Taro kei na Kena iSau
“Na cava meu cakava kevaka e dua na iulutaga e kau cake mai e koronivuli ka veisaqasaqa kei na ivakavuvuli ni kosipeli, me vaka na vakalutu?”
E vuqa tu na sala me da sotava kina—se me kua—vakatau ena veika e yaco tiko. Taumada, vakasamataka na veika e rawa ni yaco kevaka o kaya se sega ni kaya e dua na ka. Kevaka ena vakavuna me ra vakasamataka eso ni ibalebale ni nomu galu tu ni o vakadonuya e dua na ka o kila o iko ni cala, mo na raica e dua na sala rawarawa mo vakatakila kina na nomu sega ni duavata. Kevaka o nanuma ni na vakavuna ga na veisaqasaqa na ka o via tukuna, mo qai vaqara e dua tale na gauna mo vosa kina. Ia, kevaka e dau tiko na veirokorokovi ena nomu kalasi ka kerea tiko o qasenivuli me so e vakaitavi yani, e rawa ni o masuta na veivakauqeti qai vakamacalataka na nomu vakabauta.
E rawa talega ni o vakavakarau vinaka ni se vo levu tu na gauna kevaka o kila ni na veitalanoataki ena nomu kalasi e dua na ulutaga. Me ikuri ni ivolanikalou kei na vosa ni koniferedi ena ulutaga oqori, rai ena Tudei ena Vakabauta, iVakavuvuli ni Kosipeli, se na Me iSakisaki ni iTabagone. E rawa talega ni o vakatovotovo ena nomu vakamacalataka na ulutaga ena lotu vakamatavuvale. Ni o sa vakarau vosa vei ira na nomu qasenivuli se o ira na nomu lewenikalasi.
Na ivakarau ni nomu sauma e tautauvata sara ga na kena bibi kei na ka o tukuna. Dau vakarokoroko ka tovolea mo kakua ni vakayagataka na vosa dredre eso ni Lotu. Era na veilecayaki na nomu lewenikalasi ena gauna ga o tukuna kina, “E vakavulica vei au e dua na dauvakasala ni goneyalewa ena noqu tabanalevu ni …”
Na ka e bibi duadua mo kila sai koya na ka e vakavuvulitaka na Lotu kei na ka e tukuna tiko vei iko na Yalo Tabu mo kakua kina ni cavilaki ena veika cala o na rogoca se wilika ena kalasi.
Nanuma o Cei o Matataka Tiko
Ni o sotava tiko na gauna vaqori, tovolea mo nanuma ni ra na sega beka ni wasea na vakasama vata vakaoqo ena vuku ni ulutaga oqo o ira tale eso. Kakua ni vosa vakasivia se cikecike, ia kakua ni rere mo taqomaka na nomu vakabauta. Nanuma tiko ni o matataka tiko na Karisito.
Madeline K., yabaki 16, Wyoming, Amerika
Dau iValavala Malua
Au nanuma ni dodonu meu wasea na noqu rai ena ivalavala malua ka meu tukuna talega na vuna au vakabauta kina. Au sega ni nanuma ni dodonu meu cakava me ra raica talega na tani na veika au raica, ia au nanuma ni dodonu me ra kila na vanua au tu kina ena vuku ni ulutaga eso ka ra ciqoma na noqu nanuma.
Sabrina S., yabaki 16, Oregon, Amerika
Wasea na veika e Vakavuvulitaka na Lotu
Au tovolea meu sauma na mataqali taro vakakoya ena noqu vinaka duadua baleta ni ra sega ni kila tu na noqu itokani kei na noqu qasenivuli, vakavo kevaka au tukuna vei ira, na ile ni Lotu ena mataqali ulutaga vakaoya. Niu vakayacora vakakina, sa na rawa ni ra kila me baleta na veigauna mai muri, ka na yaga vakayalo vei iko. Nanuma tiko “Me caudre vakakina na nomudou rarama e matadra na tamata, me ra raica na nomudou ivalavala vinaka ka vakarokorokotaka na tamamudou sa tiko mai lomalagi” (Maciu 5:16).
Joshua M., yabaki 16, Manchester, Igiladi
Dau Veidokai
E bibi me da raica ni da rogoci, ia sa bibi sara talega me da doka na nodra vakabauta na tani. Kakua ni veiba. Na veiba e vakavuna na veimecaki kei na veilecayaki. Kevaka e kau cake mai e dua na vakasama ka saqati kina na noda lotu, toka malua, vakanamata tiko, ka veidokai, kakua ni guilecava mo vakarorogo ki na Yalo. Eso na ka eda sega ni dau kila e cakava na Kalou. E dodonu me da vakarorogo ka vuli mai na Yalona.
Hannah M., yabaki 18, Utah, Amerika
Vukei Ira na Tani me ra Vakasamataka na Ka e Dodonu
Wasea vakadodonu na nomu nanuma. E vuqa na ulutaga mai koronivuli, me vaka na vakalutu, e dau veivosakitaki vakalevu, kakua ni madua mo vosa. Oqori e dua na gauna vinaka mo wasea kina na kosipeli kei na ivakatagedegede eda vakabauta. Kevaka o wasea na veika o vakabauta, e rawa ni o vukei ira na tamata me ra vakasamataka na veika e dodonu.
Madison R., yabaki 14, North Carolina
Kila na iLe ni Lotu
Au a tiko ena dua na vuli ka veivosakitaki kina eso na iulutaga dau veibataki. Na imatai ni ka me caka me rokovi na nodra vakabauta na tani, me vaka o rawa ni namaka mai vei ira eso tale na nomu lewenikalasi. Kevaka e veisaqasaqa vakadodonu kei na Lotu na ulutaga, yalogalala mo vakaraitaka na lomamu. E sega ni gadrevi mo cavuta kina na Lotu. Ia, mo raica mo dau kila tiko na ile ni Lotu ena veika oqo.
Joseph Z., yabaki 18, Maryland, Amerika
Vakadodonutaka na iVunau Cala
Eda lewena e dua na Lotu dau vakabibitaka na kaulotu ka da kacivi kece kina me da vunautaka; o koya eda sega kina ni rawa ni vakatara me vakatetei na ivunau cala. Ena veigauna vakaoqori, sa dodonu me da vosa cake ka vakadodonutaka na ivunau cala kecega ka vukei ira na tamata me ra kila na ivakarau ni rai ni kosipeli vakalesui mai ena ulutaga.
David M., yabaki 16, Kasaï-Occidental Province, Democratic Republic of Congo
Kakua na Veisaqasaqa
Au na vakamacalataka na noqu vakasama, ka taqomaka na ivakavuvuli kei na ivunau ni Lotu, ka doka na nodra rai na tani. Au na sega ni veisaqasaqa, ni na vakasava tani na Yalo, o koya e rawa ni vakauqeti ira na tani ena veisala vinaka.
Daiana V., yabaki 15, Buenos Aires, Argentina