E Kauta Mai na iNuinui na Yalayala
Juliana Fayehun, Lagos, Nigeria
Ni oti ga vakalailai na neirau vakamau keirau sa vakalougatataki kei na watiqu ena dua na luvei keirau tagane. Niu raica na nona matadredredre ka raica yani na yaloka ni matana, au vakila niu sa dinau tu vei Tamada Vakalomalagi. E vaka vei au ni taucoko vinaka tu na luvei keirau tagane. Keirau vakavinavinaka vua na Turaga e veisiga kei na watiqu ena vuku ni isolisoli talei oqo.
Ena ika 19 ni Feperueri, 2009, au sa vakasosolo ena vakavakarau ni lesu tale ki vuli ena iotioti ni yabaki ni noqu kalasi. Keirau sega ni kila kei na watiqu, ena siga ka tarava ena tauva kina na luvei keirau tagane e dua na matetaka ka takali yani kina mai na bula oqo.
Sa dua dina na ka dredre vei au. Era lako mai ki vale na lewe ni neitou tabanalevu me ra mai veivakacegui ena vosa ni Kalou kei na serenilotu ka ra masu vata kei keirau. Au marautaka na nodra yalololoma ena nodra vakanuinui vinaka, ia e sega ni oti rawa na noqu yaluma. Ena veigauna kecega au vakasamataki koya kina, e tonawanawa na wainimataqu.
Ni oti e va na siga mai na nona mate, au a vakauqeti meu vulica na Nodra iVakavuvuli na Peresitedi ni Lotu: Josefa Simici. Niu taura cake na ivola, a tadola ga e ligaqu ki na iwase ka kena ulutaga “Vosa ni Vakanuinui kei na Veivakacegui ena Gauna ni Mate.” Sa tekivu meu wiliwili ka tarai au vakatitobu na mate eso e yaco vei rau o Josefa kei Ema ni rau tekivutaka na nodrau matavuvale. Niu yacova yani na itukutuku ni dua na nona vosa na Parofita ena veibulu vua e dua na goneyalewa yabaki rua, au vakila ni vaka me sova e uluqu na wai batabata, ka vakabatabatataka na vakanananu ni yaluma e tarai au voli.
Au kaciva na watiqu. Keirau wilika vata: “Au a … taroga vaqo, na cava na vuna era kau tani kina na gonelalai, sega tu na nodra cala. … Sa kauti ira tani e vuqa na Turaga, ni ra se gonelalai sara mada ga, me ra drotaka … na rarawa kei na ca ni vuravura oqo; era sa rui savasava, rui talei, me ra bula tiko e vuravura; o koya, kevaka e vakasamataki vakavinaka, ena sega na lolosi baleta ni dodonu me da reki ni ra sa kau tani mai na ca, ka da na taukeni ira tale ena dua na gauna lekaleka.”
E tomana na Parofita: “Ena tarogi beka e dua na taro—‘Era na laki taukeni ira tale beka na luvedra ena tawamudu o ira na tina?’ “Io! “Io! Kemuni na tina, o ni na taukeni ira tale na luvemuni; ni ra na rawata na bula tawamudu, ni sa saumi oti na nodra dinau.”1
Me tekivu mai na gauna keitou wilika kina na veimalanivosa taleitaki oya, sa vakasinaiti na neitou masu vakamatavuvale ena vakavinavinaka me baleta na yalayala oya ni keitou na sota tale kei luvei keirau tagane ena vuku ni Veisorovaki nei Jisu Karisito.
Nikua sa tolu tiko na luvei keirau vakasakiti, na tacina na luvei keirau gonetagane sa takali yani. Keirau sa vakavulica tiko vei rau na kosipeli dina ka tawayalani, ka na kauti rau lesu yani vua na Tamadrau mai Lomalagi kei na nodrau iVakabula, o Jisu Karisito.
Au kila ni dina na nona itukutuku na Parofita o Josefa Simici me baleta na bula ni sa oti na mate. Au na vakavinavinaka tikoga me tawamudu ena vuku ni inuinui, na vakacegu, na reki, kei na marau e kauta mai ki na neitou matavuvale—ena yasa ruarua ni ilati.