Waraka na Cabe ni Matanisiga

Julia Wagner, Ohio, Amerika

E solegi tu na rumu ena iyaloyalo ni butobuto niu davo yadrayadra no ka vakarogoca na icegu nei watiqu, ka tovolea meu kila se moce tiko se sega. Se qai oti ga e rua na siga mai na gauna sa takali kina na luvei keirau yalewa yabaki 12 ena vuku ni dua na vakacalaka vakasauri. Au a bobo tale, ia e sega ni rawa na moce. Na yaloqu e tagica na luvequ yalewa. Na kilaka kece me baleta na ituvatuva ni veivakabulai e sega ni kauta laivi rawa na mosi ni nona sa yali.

Ni voleka mai na malawa ni mataka, au vakila vakasauri mai na gagadre kaukauwa. Sa voleka ni cabe na matanisiga, kau raica ena noqu vakasama na lomalagi ni sinai tu ena rarama piqi malumu. E dau taleitaka na roka piqi na luvei keirau yalewa. Au na vinakata e dua na cabenisiga piqi me rawa niu voleka tale kina vua.

“Daru laki sarava mada na cabenisiga,” Au vakasolokakana yani vei watiqu.

Keirau duri tu ena icurucuru ni motoka, qara ki na tokalau … ka mai wawa toka. E dina ni sa rarama na lomalagi, a sega ga ni curubasikata rawa mai na veio era na matanisiga.

Au taqara na uluqu e tabai watiqu ka tovolea me vaka ni sega ni dua na ka. Ia au vinakata vakalevu. Au gadreva eso tale na ka. E dina ni a rawa vei Tamada Vakalomalagi me vakatara me yaco na noqu gagadre oqo ni oti na Nona sa kauta lesu tale na neirau goneyalewa taleitaki ki Vua.

Ni vuki na watiqu me lako ki loma, a raivuki mai vaka ki na ra, qai kaya, “Raica!”

Au vuki. E dakui keirau e vakasinaiti tu na o ena roka piqi wainikoula ka wavolita tu. E tu vakadua na noqu icegu, ka drodro mai na wainimataqu. E totoka cake mai na ka au rawa ni raitayaloyalotaka. E vaka ni mokoti keirau mai na luvei keirau goneyalewa. Au kila ni vakila tu o Tamada Vakalomalagi na mosi ni yaloqu ka tala mai e dua na yalayala ka inuinui ki na veisiga ni mataka—e dua na ivakananumi malumu ni matavuvale tawamudu kei na veigauna talei e se bera mai.

Au dau vakananuma wasoma na gauna totoka oya kei na ivakarau ni rai vou e solia mai vei au. O cei e dau vakaraica na cabenisiga vaka ki na ra? Ia oqori na vanua e wawa tu mai kina na noqu cakamana. E vica beka na veivakalougatataki kei na cakamana au sa calata baleta ni ra lako mai ena vanua sega ni namaki? Ena vica beka na gauna au sa dau vakanamata kina ena veika au nanuma ni dodonu me yaco kau calata kina na lagilagi ni veika a qai yaco?

Keirau a masuta vagumatua me yaco na cakamana a sega ni yaco, ia niu veiraiyaki ena ivakarau vou ni noqu rai, au qai raica na cakamana ni va na bula a vakavinakataki cake mai na gacagaca nei luvei keirau yalewa a soli yani, na cakamana ni loloma vakamatavuvale kei na duavata ni tabanalevu, kei na cakamana ni veiqaravi. Au a vakila na yaluma titobu, ia au a vakila talega na inuinui qaqa ni vakasinaita na yaloqu ena veicabe ni siga piqi yadua, na veidromu ni siga damu vakarosi, kei na veisenikau piqi yadua au raica.

Ena gauna oqo ni cabe na matanisiga, au na rai ki na tokalau kau qai vuki meu rai ki na ra. Au dau matadredredre niu qai kila ni dau tu na cakamana kei na veivakalougatataki me kunei—ia ena dau cabe na matanisiga ena loma ni noda yaluma kevaka eda vakatara.