E Levu na ka Meu Wasea

Brent Fisher, California, Amerika

Au dau nanuma tu ga na vakavakarau ki na leqa tubukoso sai koya na noqu qarava na noqu matavuvale kei au. Ia au a vulica me duatani na ivakarau ni noqu raica na vakavakarau ena dua na mataka ni Sigatabu ena ceva kei Florida ena 1992. Na cagilaba o Adriu, e dua vei ira na cagilaba rerevaki ka levu na kena vakacaca vakailavo me tarai Amerika, a vakacacana e dua na vulaikatakata totoka mai Miami e Florida.

Au a tiko duadua ena dua na gauna ena dua na vale e baravi, niu tiko voli ena dua na vuli vulatolu me baleta na noqu cakacaka. Ni yaco mai na ivakasala ni cagilaba kau kila ni dodonu me keimami sa na biuta na vale keimami vakaitikotiko kina ena yakavi oya, a vakarautaka e dua na itokani vakacakacaka eso na rumu ni otela ena lomanivanua me baleti ira na itokani vakacakacaka kei au. Au biuta na bai ni katubaleka ka maroroya na noqu iyaya.

Niu namaka voli na nodratou veisiko macawa dua mai na watiqu kei iratou na luvequ, au sa volia rawa tu mai na kakana kei na wai me rauta na noqu matavuvale lewe ono. Au vakacegu niu kila ni sa tiko e dua na vanua taqomaki vinaka meu lako kina ka na rawa ni taura e vica na macawa na kakana au na kauta.

Ni vakarau meu biubiu ena 10:30 ena mataka, au logavinaka—ni sa vakarau tu na ka kece. Au tekiduru ena masu, ka vakavinavinakataka na Tamada Vakalomalagi ena noqu veivakalougatataki ka kerea na Nona veivuke ena vuku ni cava sa lako tiko mai. Niu tinia na noqu masu, a vakauqeti au na Yalotabu meu tukuna, “Kevaka e dua e gadreva tu na veivuke, ni yalovinaka ka vukei au meu kunei koya.”

Ni oti ga e vica na miniti, a tukituki ena noqu katuba e dua na yada yabaki 80 vakacaca. “Vosoti au,” e kaya mai. “Au curu cala mai. Au vaqara tiko e dua noqu itokani.”

E laurai vua na oca. Niu taroga kevaka e rawa niu veivuke, a yaloca ka logalogaca ka tukuna ni sega ni kila na ka me cakava se vanua me lako kina. Au taroga se vakaitikotiko mai vei, keirau mani lako vata ki na nona itikotiko, dikeva na nona ituvaki, ka keirau veitalanoataka na veika e rawa ni cakava.

Au tukuna vua ni rawa ni solia vua e dua na tikina ena dua na rumu ni otela na noqu kabani, kau sureti koya me mai tiko vata kei na neitou ilawalawa. A vakaraitaka nona vakacegu. Keitou vakasosolo, sogosogota nona vale ka maroroya nona iyaya, kau kerea e dua na noqu itokani vakacakacaka me draivataka nona motoka ki na otela.

Niu vakarau biubiu, erau mai kere veivuke e rua tale na yada. Au veivuke ena nodrau vakalomavinakataki me rawa ni matata nodrau vakasama ka vakasamataka na vanua e rawa ni rau vakaruru kina. Niu laki kauta mai na nona iyaya e dua na itokani vakacakacaka, a kere veivuke tale e dua na kena marama. Keirau biuta na nona iyaya e rawa ni kavoro ena dua na vanua taqomaki ka vukei koya ena nona vakavakarau me lako yani.

Ena gauna oqori, eratou sa veisureti talega kina eso na itokani vakacakacaka vei rau e rua na gonevuli mai na koliji ka rau a vakaitikotiko voli ena dua na yanuyanu me rau mai tiko vata kei na neitou ilawalawa ena dua na otela ena lomanivanua. Na kakana ga e tiko vei rau sai koya eso na kakana tawaipakete kei na dua na tavaya wai lailai (.95 na Lita). Kalougata, ni levu e tu vei au me wasei, sega walega vei rau ia vei keimami kecega.

Sa dua dina na ka ni veivakalougatataki me da vakarau tu ka dusimaki tiko mai vua na Turaga. Oqo a rawa kina vei au meu veivakacegui ena dua na gauna ni nuiqawaqawa ka vakayagataka e voleka ni noqu gauna kece saraga meu vukei ira kina na tani ka sega mada ga ni leqataki au. Au rawata e dua tale na ivakatagedegede vou ni vakavinavinaka ena vuku ni ivakasala mai vei ira na noda iliuliu vakabete me da dau tuvakarau.