Tagane kei na Yalewa ena Cakacaka ni Turaga
Ena vosa ni dua na soqoni vakalotu mai Brigham Young University ena 20 ni Okosita, 2013. Me baleta na kena vakavalagi taucoko rai ki na speeches.byu.edu.
Ena nona ituvatuva cecere vakamatabete na Tamada Vakalomalagi, e duidui na nodra itavi na tagane kei na yalewa ia e tautauvata vinaka na kena yaga.
Au vakabauta ni tu eso na dina era na gadreva me ra kila na tagane kei na yalewa me baleta na nodra itavi yaga na yalewa ena kena vaqaqacotaki ka tarai cake na matanitu ni Kalou e vuravura. E vuqa sara na sala era uto kina ni Lotu na yalewa. Ena nona veivuke na Turaga, au vinakata meu vakacaucautaki ira kina na yalewa yalodina kei na goneyalewa ena Lotu. Vei kemuni na marama lomani, se vanua cava ga o ni tu kina e vuravura, ni yalovinaka ka kila na neimami taleitaki kemuni ka vakabauti kemuni koi keimami ena Mataveiliutaki Taumada kei na iApositolo Le Tinikarua.
Meu tekivu ena dua na vuli ni veivakabulabulataki baleta na ka eda mai cakava tiko e vuravura.
O keda na luvena tagane kei na yalewa lomani na Tamada Vakalomalagi eda a bula vata tu kei Koya ena bula taumada. Me rawa ni vakataucokotaki na itavi ni kena rawati na “tucake tale mai na mate ka rawata na bula tawamudu” (Mosese 1:39), a tauyavutaka na Tamada Vakalomalagi e dua na ituvatuva ka kena inaki me vukei ira na Luvena me ra rawata na vanua e dodonu me ra yaco kina. Na nona ituvatuva na Tamada sa nakiti kina me lutu na tamata ka tawasei tani mai Vua ena dua na gauna ena nona sucu mai ki na bula oqo, taukena e dua na yago, ka curuma e dua na gauna ni vakatovolei kei na bula vakatovotovo. Sa vakarautaki ena nona ituvatuva me dua na iVakabula me na vueta na tamata mai na Lutu. Na nona Veisorovaki na noda Turaga o Jisu Karisito sa vakarautaka na sala mai na veicakacaka vakalotu ni kosipeli kei na veiyalayalati tabu me da lesu tale ki na nona iserau na Kalou. Baleta ni da na mai bula ena dua na draki ni bula vakayago ka sinai tu ena veika rerevaki kei na veivagolei tani, erau sa kila na Tamada Vakalomalagi kei na Luvena ni da na gadreva me da rawata na kaukauwa e cecere cake mai na noda vakataki keda. Erau kila ni da na gadreva me da rawa ni yacova yani na Nodrau kaukauwa. Na kosipeli kei na ivunau i Karisito ena solia vei ira kece era na ciqoma na kaukauwa me ra rawata na bula tawamudu ka kune marau ena ilakolako.
Era tu eso era dau taroga na nodra tikina na marama ena ituvatuva ni Kalou ka vakakina ena Lotu. Au sa dau vakatarogi vakalevu mai vei ira na tabana vakaitukutuku ni matanitu kei na veiyasai vuravura ka sa rawa kina niu tukuna vei kemuni ni vuqa vei ira na daunitukutuku keimami dau veivosaki vata sa tu rawa na nodra nanuma me baleta na ulutaga oqo. Ena vuqa na veiyabaki era dau taroga na taro ka kena ibalebale ni o ira na marama era ikarua ni kalasi ena Lotu. E sega ni dua na ka e rawa ni yawa cake mai na dina.
Meu vakatura mada e lima na ka mo ni vakasamataka me baleta na iulutaga bibi oqo.
1. Ena Nona iTuvatuva na Kalou me Vukea Noda Rawata na Bula Tawamudu
Na Tamada Vakalomalagi a bulia ruarua na tagane kei na yalewa, o ira na Luvena yalewa kei na tagane vakayalo. Sa kena ibalebale na noda tagane se yalewa e tawamudu. E dua na nona ituvatuva ka nakiti me vukei ira kece era digitaka me ra muri Koya kei na Luvena o Jisu Karisito, me ra rawata na nodra icavacava, na vakaivotavota ena bula tawamudu.
Kevaka e Nodrau takete ka Nodrau inaki na noda bula vakacerecerei mai muri ka kevaka Erau sa kila na ka kecega ka taucoko sara Nodrau vinaka, me vaka eda kilai Rau vakakina, o koya sai rau ga Erau na kila vakavinaka duadua na ivakarau me da vakarautaki, vakavulici, ka liutaki kina me rawa kina na madigi cecere duadua me da rawata na bula vakacerecerei.
E voleka ni o keda kece e tu na noda lewe ni matavuvale se itokani era sa vesuki tu ena veileqa eso ni bula vakatamata. Na veiletitaki ni leqa eso oqo e sega ni dau kauta mai e dua na kena iwali, ka rawa ni vakavuna na veisaqasaqa. Era tu eso na taro me baleta na vanua e tu kina na Lotu ena veileqa bibi eso ka dau dredre ni saumi me vakacegu kina na yalo. Ia, ni da vakasaqara na Turaga ena masu ena veika me da nanuma kei na veika me da cakava ena mataqali gauna vakaoqori, ena yaco mai na veivakauqeti: “O vakabauti Jisu Karisito beka ka dau muri Koya kei na Tamana?” Au vakabauta ni voleka ni o keda kece ena Lotu ena dua na gauna eda a taroga kina se rawa beka ni da cakava na veika kece e kerei me da cakava. Ia kevaka eda vakabauta dina sara na Turaga, sa yaco mai na veivakadeitaki: Au vakabauti Jisu Karisito, kau sa tu vakarau meu cakava na veika kecega e gadreva ko Koya meu cakava.” O koya me da toso ki liu. E vakaevei na mana ni malanivosa “Au vakabauti Jisu Karisito”!
Na noda ivakadinadina kei na vakacegu ni noda vakasama kei na noda tiko vinaka e tekivu ena noda lomasoli me da vakabauta ni o Tamada Vakalomalagi e kila vakavinaka duadua.
2. E Liutaki na Lotu mai na iDola ni Matabete
Na Lotu i Jisu Karisito ni Yalododonu Edaidai e nona Lotu na Turaga, ka liutaki na Nona Lotu ena lewa kei na idola ni matabete “Na idola ni matabete sai koya na lewa sa solia mai na Kalou vei ira na iliuliu ni matabete me ra veidusimaki, vakatulewa ka liutaka kina na vakayagataki ni Nona matabete i vuravura.”1
O ira e tu vei ira na idola ni matabete—se dua na dikoni ka tu vua na idola ni nona kuoramu se dua na bisopi ka tu vua na idola me baleta na nona tabanalevu se dua na peresitedi ni iteki ka tu vua na idola me baleta na nona iteki se na Peresitedi ni Lotu ka taura tu na idola taucoko ni matabete—me rawa kina vei ira kece era veiqaravi se cakacaka vagumatua ena ruku ni nodra veiliutaki me ra vakayagataka na lewa ni matabete ka rawa ni ra rawata na mana ni matabete.
Na tagane kei na yalewa kece era veiqaravi ena ruku ni nodra veidusimaki o ira e tu vei ira na idola. Oqori na ivakarau e liutaka kina na Turaga na Nona cakacaka.
Meu taleva tale mada e dua na ka au a tukuna ena koniferedi raraba ni Epereli 2013: “Ena nona ituvatuva cecere vakamatabete na Tamada Vakalomalagi, e dui tu na nodra itavi duidui na tagane me ra qarava na matabete, ia e sega ni ra matabete. E duidui na nodra itavi na tagane kei na yalewa ia sa tautauvata ga na kena yaga. Me vaka ga ni sega ni kunekune rawa na yalewa ke sega na tagane, sa vakakina na tagane ni na sega ni rawa me taucoko na nona cakacakataka na kaukauwa ni matabete me tauyavutaka kina e dua na matavuvale tawamudu ke sega o yalewa. Sa kena ibalebale, ena ituvatuva tawamudu, na kaukauwa ni vakatubu kawa kei na kaukauwa ni matabete sa wasei vei tagane kei yalewa vakawati.2
Na cava na vuna era tabaki kina ki na itutu ena matabete o ira na tagane ka sega na yalewa? E vakamacalataka o Peresitedi Gordon B. Hinckley (1910–2008) ni Turaga, ka sega ni tagane, a “lesia me ra taura na tagane ni Nona Lotu na matabete” ia na Turaga talega a vakalougatataki ira na yalewa ena “kaukauwa me ra vakataucokotaka na isoqosoqo cecere oqo, sai koya na Lotu ka matanitu ni Kalou.”…3 Ni sa tukuni ka caka na veika kece sara, se bera ni vakatakila na Turaga na vuna e tauyavutaka kina na Nona Lotu me vaka sa vakayacora ko Koya.
Me da kakua ni guilecava ni voleka ni veimama ni veivakavulici kece sara e vakayacori ena Lotu era vakayacora na marama. E vuqa na veiliutaki era vakarautaka na marama. E vuqa na madigi ni veiqaravi kei na itaviqaravi era tuva ka liutaka na marama. Na ivakasala kei na nodra vakaitavi na yalewa ena veimatabose ni tabanalevu kei na iteki kei na veimatabose raraba ena itikotiko liu ni Lotu e vakarautaki kina na raititobu, yalomatua, kei na veinanumi.
E gadrevi ruarua na tagane dau rokova na yalewa kei na isolisoli vakayalo e tu vei ira kei na yalewa e dau rokova na idola ni matabete era taura tu na tagane me sureti kina na veivakalougatataki taucoko sara ni lomalagi ena veisasaga kece sara ena Lotu.
E Tautauvata na Kedrau Bibi na Tagane kei na Yalewa
Na tagane kei na yalewa e tautauvata ena mata ni Kalou ka vakakina ena mata ni Lotu, ia na tautauvata oqori e sega ni kena ibalebale ni rau tautauvata sara. Na itavi kei na isolisoli vakalou ni tagane kei na yalewa e duidui ena kedra ituvaki ka sega ena kedra bibi se na kedra veivakayarayarataki. Na ivunau ni noda Lotu e biuta na yalewa me tautauvata ia e duatani mai na tagane. E sega ni raica na Kalou me vinaka cake na tagane mai na yalewa se yalewa mai na tagane se bibi cake e dua mai vei koya ka dua. E cavuta o Peresitedi Hinckley vei ira na yalewa ni “Tamada Vakalomalagi …e sega ni Nona inaki mo ni lailai sobu mai na isala vakatui lagilagi ni Nona veibuli.”4
E duidui na nodra isolisoli na tagane kei na yalewa, duidui nodra kaukauwa, duidui nodra igu, ka duidui na nodra ivakarau ni rai kei na ka era malele kina. Oqori e dua na vuna bibi sara eda na veigadrevi kina vakataki keda. E taura e dua na tagane kei na dua na yalewa me rau tauyavutaka e dua na matavuvale, ka taura e dua na tagane kei na dua na yalewa me rau cakava na cakacaka ni Turaga. E dua na tagane vakawati kei na watina erau cakacaka vata ena buladodonu erau na veivakataucokotaki. Me da qaqarauni me da kakua ni tovolea me da vakacala na nona ituvatuva kei na nona inaki na Tamada Vakalomalagi ena noda bula.
4. Eda na Vakalougatataki Kece ena Mana ni Matabete
Ni rau lako na tagane kei na yalewa ki na valetabu, erau na vakalougatataki vata ena dua ga na mana, sai koya na mana ni matabete. Na lewa ni matabete e vakatulewataki mai na idola ni matabete, ia na idola ni matabete era taura tu na tagane bula kilikili, na kena rawati na mana kei na veivakalougatataki ni matabete sa vakarautaki tu vei ira kece na luve ni Kalou.
Na Tamada Vakalomalagi e dau lomasoli ena vuku ni Nona kaukauwa. Eda rawa ni taura na tagane kei na yalewa taucoko na kaukauwa oqo me veivuke ki na noda bula vakai keda. O ira kece era sa cakava na veiyalayalati tabu kei na Turaga ka ra rokova na veiyalayalati oqori sa rawa ni ra ciqoma na ivakatakila yadua, me ra vakalougatataki ena veiqaravi ni agilosi, me ra veitaratara kei na Kalou, me ra rawata na taucoko ni kosipeli, ka me kena ilutua, me ra vakaivotavota vata kei Jisu Karisito ena veika kecega e tu vei Tamana.
5. Eda Gadreva me da Kila ka Wasea na iVakadinadina ni iVunau
Eda gadrevi ira na yalewa ena Lotu me ra kila na ivunau i Karisito ka wasea na ivakadinadina ni Veivakalesui mai ena ivakarau kece sara e rawa kina. E sega vakadua ni dua na gauna veiganiti ena itukutuku kei vuravura. O Setani kei ira na nona itokani era sa vakavinakataka tiko na nodra iyaragi kei na nodra iwalewale ena udolu na yabaki, ka ra sa buta vinaka tu ena kena vakarusai na vakabauta kei na veivakabauti vua na Kalou kei na Turaga o Jisu Karisito ena keda maliwa na kawatamata.
O keda kece—na tagane, yalewa, cauravou goneyalewa itabaqase, itabagone, kei na gonetagane kei na goneyalewa—sa tu na Turaga kei na Nona Lotu me da taqomaka, me da maroroya, ka vakateteya ki vuravura raraba. Eda gadreva na domodra kilai tani, ka veivakauqeti kei na nodra vakabauta na marama. Keimami gadrevi kemuni mo ni vulica na ivunau ka kila na veika eda vakabauta me rawa kina ni o ni wasea na nomuni ivakadinadina me baleta na dina ni veika kecega—se ra wasei na ivakadinadina oqo ena yasa ni dua na matadravu ni keba ni Goneyalewa, ena dua na soqoni ni soli ivakadinadina, ena dua na blog, se Facebook. O kemuni ga o ni rawa ni vakaraitaka vei vuravura se vakacava tu na kedra irairai kei na veika era vakabauta na yalewa ni Kalou era sa caka veiyalayalati.
Kemuni na marama, na nomuni yalava ni veivakauqeti e dua na yalava duatani—e sega ni rawa ni ra vakatotomuria na tagane. E sega tale ni dua e rawa ni taqomaka na noda iVakabula ena veivakauqeti kei na mana me vakataki kemuni, na luvena yalewa na Kalou,—o kemuni ka tu vei kemuni na igu e loma kei na yalodina. Na mana ni domona e dua na yalewa sa saumaki mai e sega ni vakaiyalayala, ka sa gadreva vakalevu cake na domomuni ena Lotu ena gauna oqo mai na veigauna kecega.
Au laiva vei kemuni na noqu ivakadinadina ni da tu ena dua na gauna me da tu vata kina ena duavata. Me da tucake vata na—tagane kei na yalewa, cauravou kei na goneyalewa, gonetagane kei na goneyalewa. Me da tutaka na nona ituvatuva na Tamada Vakalomalagi. Me da taqomaki Koya. Sa biliraki vakatikitiki o Koya. E sega ni rawa ni da tu ka vakasavuliga tu ni da lewena na Lotu i Jisu Karisito ni Yalododonu Edaidai ka vakatara me yaco tiko na veika oqori ka sega ni yaloqaqa me da vakarogoya na domoda.
Me vakalougatataki kemuni na Kalou me tu vei kemuni na yaloqaqa mo ni vulica ka kila na veidina rawarawa ni kosipeli ka wasea ena veimadigi kecega o ni donumaka.