iTukutuku ni Mataveiliutaki Taumada
Na iYaqa e Qaqaco Vinaka na Kena Kelevaki
Ena dua na gauna sa oti au a soko ravita yani ena dua na waqa levu na baravi totoka kei Alaska, e Amerika. Sa vakarautaka kina o kavetani me sa na moce ena bogi o ya na waqa ena dua na toba vou vakatikitiki, ka raica sara vakamatau na kena ituvaki kei na veika volivolita, me vakataka na gauna ni ua kei na mati, na titobu ni wai, kei na kena yawa mai na veika rerevaki eso. Ni sa vakadeitaka, a tukuca sobu na iyaqa me rawa ni taqomaki tikoga na waqa ka kelevaki vakaukauwa, me rawa kina vei ira na pasidia mera sarava na totoka vakasakiti ni ibulibuli ni Kalou.
Niu sarava na baravi oya, au raica sara ni sa tekivu me toso vakalailai na waqa ni liwa mai e dua na bati ni cagi kei na kaukauwa ni ua e ra. Ia, a nawa tudei toka ga na waqa ena kena ikelekele tudei sa vakarautaki kina ena dali ni iyaqa kei na kaukauwa ni iyaqa.
A sega ni maroroya o kavetani na iyaqa ena waqa, me qai tukuca sobu ga ke sa ravu mai e dua na cagi. Sega, a kelevaka na iyaqa ni waqa me itatarovi ka taqomaka na waqa me kua ni ciri yani ki na wai rerevaki se me laki kasa mera taqomaki kina na pasidia kei ira na kaimua.
Niu mai vakasamataka toka na ka sa yaco, e votu mai vei au ni kevaka a sega ni dua na vosa vakatautauvata oqo, au a sega ga ni se bau vukataka e dua na waqavuka.
Na Vuna Eda Gadreva Kina na iYaqa
Na inaki ni iyaqa me na maroroya na waqa ka taqomaka ena veivanua me gole kina se me vakataudeitaka na waqa ena gauna ni draki ca. Ia, ni gadrevi me rawati na inaki bibi oqo, e sega ni gadrevi walega me tiko na iyaqa. Na iyaqa e dodonu me kaukauwa dina, veivakadeitaki, ka vakayagataki vakavinaka ena gauna kei na vanua dodonu.
Na tamata yadua kei na matavuvale era na gadreva talega na iyaqa.
E rawa ni yaco mai na veika dredre ena cagilaba rerevaki ka vukataki keda tani mai na noda salatu ka na rawa me botolaki keda ki na veivatuvatu. Ia eso na gauna eda na sotava talega na veika rerevaki ni vaka me tu vinaka na ka kecega—mudre malua tu na cagi ka maravu na wasawasa. Ia na ka dina, ena rawa ni vakarerevaki na noda bula ni da sa tekivu ciri ka taiki toka vakalalai ka da sega tu ni kila.
Na Kosipeli Sa Noda iYaqa
Na iyaqa e dodonu me qaqaco, ka kaukauwa sara, ka tuvaki vinaka tu ka na rawa me vakayagataki ni sa gadrevi vakakina. Me kena ikuri, e dodonu mera vakacobari tu ena dua na yavu e rawa ni taura na bi ni kaukauwa e veisaqasaqa mai.
Sa dina sara, na kosipeli i Jisu Karisito sa dua na iyaqa. A vakarautaka na Dauniveibuli ni vuravura taucoko me baleta na inaki vakalou ka tuvanaki me vakarautaka na nodra taqomaki ka dusimaki o ira na Luvena.
Io, sa qai cava beka na kosipeli, ni toka tikiva na ituvatuva ni Kalou mera vakabulai kina na Luvena ka kauti ira lesu mai ki na Nona iserau?
Ni da sa kila ni sa ivakarau ni veika kecega mera kuitaki yani, sa dodonu vei keda meda kelevaka vakaukauwa na noda iyaqa ena ivakavuvuli tudei ni dina ni kosipeli. Mera kakua ni tukuci sobu vakavovodea ki na nuku ni dokadoka se sega mada ga ni terega na itekitekivu ni noda dina.
Ena vula oqo sa noda madigi meda na vakarorogo kivei ira na italai ni Kalou ena koniferedi raraba ni Lotu. Na nodra vosa, e sema vata kei na ivolanikalou kei na veivakauqeti ni Yalotabu, ena vakarautaka e dua na ivakavuvuli tudei ka qaqaco ni yavunibula tawamudu kei na ivakarau meda na vakacobara kina na noda iyaqa meda na kaukauwa ka taqomaki ena loma ni dredre kei na veivakatovolei ni bula oqo.
E vakavulica na parofita ni gauna makawa o Ilamani, “Mo drau tara na nomudrau yavu ena uluvatu ni noda iVakabula, sai koya na Karisito na Luve ni Kalou, ia ni sa vakaliwava mai na tevoro na nona cagi kaukauwa, kei na nona moto ena covulaca, ka sa yaviti kemudrau na nona ucacevata kei na nona cagilaba, ena sega ni rawai kemudrau se dreti kemudrau sobu ki na ikeli ni rarawa kei na yaluma tawamudu ni sa dei sara na uluvatu drau sa tara kina, ia kevaka sa tara cake na tamata ena yavu oqo ena sega ni bale rawa.” (Ilamani 5:12).
Na Bibi ni iYaqa e Qaqaco Vinaka na Kena Kelevaki
Sa dau vakatovolei ena bula oqo na noda iyaqa ka temaki keda meda kuitaki. Ia, kevaka sa tuvanaki donu tu na noda iyaqa ena vatu ni noda Dauveivueti, era na kaukauwa—se cava sara na kaukauwa ni cagi, na kui ni ua, se na cere ni biau.
Sa dina sara, a sega ni ta na waqa me mai toka vakadua ena dua na toba ia me yavia na kena iyaqa ka sokota yani na wasawasa ni bula oqo. Ia oqori na vosa vakatautauvata ni dua tale na gauna.
Ena gauna oqo, au yalo vakacegu niu kila ni iyaqa ni kosipeli kei na vatu ni noda Dauveivueti ena maroroi keda meda tudei ka taqomaki tiko.
Na iyaqa vakaoqo ena maroroi keda meda kakua ni kuitaki yani ki na veika rerevaki kei na veika rarawa. Eda na rawata kina na veimadigi lagilagi meda marautaka na totoka e sega ni vakatauvatani rawa ni veitarataravi ni veika totoka cecere ni bula oqo.
Sa rui totoka na bula oqo ka kilikili meda bulataka. Era na rawa ni temaki keda mai na cagi, cava, kei na kui ni wai ni veigauna meda kuitaki yani ki na veika rerevaki se sega ni laurai, ia na itukutuku ni kosipeli kei na kena kaukauwa vakalou ena maroroi keda ena noda salatu ka lesu rawa ki na toba veitaqomaki nei Tamada Vakalomalagi.
O koya gona, meda sa qai, sega ni vakarorogo walega ki na vosa ni koniferedi raraba ni Epereli ia meda sa vakayacora na veika era sa tukuna me sa dua na iyaqa sa qaqaco vinaka na kena kelevaki ki na noda bula ni veisiga.
Me qai vakalougatataki keda na Kalou ka dusimaki keda ki na sasaga bibi ka yaga oqo!
Veivakavulici mai na iTukutuku Oqo
Sa rawa me veivosakitaki na bibi ni iyaqa mai na nodratou itukutuku ni soko na matavuvale nei Liai ki na vanua yalataki (raica na 1 Nifai 18). Sa rawa mo vakaraitaka ena 1 Nifai 18:11–15, na gauna a vesuki kina o Nifai, ka sa mani sega kina ni cakacaka na Liaona, ka yaco me kuitaki na waqa ena cava rerevaki. Na revurevu cava eda na sotava ena gauna eda sega kina ni vakaiyaqataki vaqaqaco ena kosipeli? Sa rawa talega mo vakaraitaka na 1 Nifai 18:21–22 ka veivosakitaka na sala meda na kunea kina na veitaqomaki ena noda gole yani vua na iVakabula.