Era Kila Beka Vakacava?
Gale Ashcroft, Arizona, Amerika
E tara na yaloqu ka kauta mai vei au na vakacegu e dua na itukutuku nei Peresitedi Dieter F. Uchtdorf, na iKarua ni Daunivakasala ena Mataveiliutaki Taumada vei ira na marama ena iSoqosoqo ni Veivukei ena soqoni raraba ni iSoqosoqo ni Veivukei ena 2011. A vosa o koya me baleta na senikau lailai kua ni guilecavi au kei na iwasewase ni sena e lima ka matataka e lima na ka me da daunanuma tikoga.1
Ni oti na soqoni oya a tukuna vei au o Alyssa na luvequ goneyalewa e dua na italanoa me baleta na nona itokani o Jessie, ka dua tiko na nona bisinisi lailai ni vakarautaki kakana. Eratou a kerei Jessie na nona iliuliu ni iSoqosoqo ni Veivukei mai na iteki me cakava e dua na ivakalomavinaka me qai vakarautaki ni sa oti na soqoni ni iSoqosoqo ni Veivukei. E tukuna vei Alyssa o Jessie ni kila na ka me na cakava ena gauna vata ga oya—me 250 na keke tawaibilo. A bolea o Alyssa me na kauta na keke ki na valenilotu ni iteki.
A yaco mai na siga ni soqoni, ni lako yani o Alyssa me laki veivuke, a kunei Jessie ni matatagitagi voli. Sa vakarau tu na keke tawaibilo, ia a vakauta o Jessie e dua na kena itaba vua e dua na wekana qai kaya mai ni sega soti ni ganita na soqoni na kedra rairai vinaka.
Sa tekivu me lomalomaruataki koya o Jessie. Sa yaco me nanuma ni ratou namaka tiko na iliuliu ni iSoqosoqo ni Veivukei mai na iteki e dua na ka vinaka cake mai na nona keke tawaibilo rawarawa. Sa tekivu me vakasamataka e dua na sala me ukutaka tale kina na nona keke tawaibilo, ia sa sega na kena gauna. Rau sa mai kauta ga vakaoya na keke tawaibilo kei Alyssa, ka nanuma voli o Jessie ni sa vakacudrui iratou na marama—me yacova na gauna e qai vosa mai kina o Peresitedi Uchtdorf.
Ni vosa me baleta na senikau somidi na kua ni guilecavi au, a basika mai ena sikirini e dua na iyaloyalo ni senikau lailai karakarawa. E dua na senikau rawarawa ia e totoka vakaoti na matailalai ni iwasewase ni sena. A tara na yaloi keimami taucoko na itukutuku nei Peresitedi Uchtdorf ena nona kerei keimami me keimami kakua ni dau vagolei tani mai na veika rairai lelevu era tu wavoliti keda ka da guilecava kina na lima na dina rawarawa ka bibi sara e vakatavulica tiko vei keimami.
Ni cabori oti na masu ni suka, era a gole yani na marama ki na vanua ni soqo. Ni rau curu yani o Alyssa kei Jessie, erau raici ira kece ni ra wavokita tu na teveli ni ivakalomavinaka ka vakataroga, “Erau kila vakacava?”
Na keke tawaibilo yadua era boro tu ena kirimu vulavula, ka koto e delana e dua na senikau kua ni guilecavi au, lima na iwasewase ni sena totoka.