Stap Wet blong San I Girap

Julia Wagna, Ohaeo, YSA

Ples i dak raon long rum taem mi wekap mo stap ledaon mo stap lisin long hasban blong mi we i stap pulum win, mo traem blong faenemaot sapos hem i stap slip. Hem i bin olsem tu dei nomo afta we 12 yia gel blong mitufala i bin ded long wan rabis aksiden. Mi sarem ae blong mi bakegen, be mi no save slip. Hat blong mi i krae from gel blong mi. Evri save long plan blong fasin blong sevem man i no save karemaot soa ia blong nomo luk hem.

Taem delaet i stap kamaot, mi filim se mi nidim tumas wan samting. San bae i kamaot i no longtaem, mo long maen blong mi, mi luk skae i kala laet pink. Gel blong mitufala i lavem kala pink. Wan pink san we i stap girap i stret samting we mi nidim blong filim hem kolosap long mi bakegen.

“Yumitu go luk san i girap,” mi wispa long hasban blong mi we i stap pulum win.

Mitufala i bin stanap long rod, fesem Is, mo wet … mo wet. Nomata skae i klia, san i no pusum fes blong hem nating tru long ol klaod ia.

Mi putum hed blong mi long solda blong hasban blong mi, traem blong mekem se i oraet nomo. Be mi bin wantem moa. Mi bin nidim moa. Mi sua se Papa long Heven bae i save givim mi wanem ia we mi wantem afta we Hem i tekemaot swit gel blong mitufala i go hom, kolosap long Hem.

Taem hasban blong mi i tanem blong go insaed, hem i stap lukluk i go bak biaen long Wes, mo talem: “!Luk!”

Mi tanemraon. Biaen long mitufala, naes kala pink i bin kavremap gud ol klaod, wetem wan gol laet raon long olgeta. Mi stop smol, mo stat blong krae. Hem i bin naes bitim wanem we mi stap traem blong tingting long hem. I filim olsem wan hag we i kam long gel blong mitufala. Mi bin save se Papa long Heven i save gud long ol soa hat blong mi mo Hem i bin sendem wan promes blong hop blong fiuja—wan kwaet fasin blong mi tingbaot bakegen abaot famle we i no save finis mo evri naes taem we bambae oli kam yet.

Mi bin stap tingting plante long naesfala taem ia mo niufala lukluk ia we i givim long mi. ?Huia i stap lukaotem blong wan san i girap long Wes? Be ples ia nao we merikel blong mi i bin stap wet. ?Hamas plante blesing mo merikel we mi mestem from oli kam long ol ples we mi no ting se bae oli kam long hem? ?Hamas taem mi lukluk long wanem we mi ting se i mas olsem mo mestem glori blong hem i olsem?

Mitufala i no bin stop blong prea from wan merikel we i no save hapen, be taem mi lukluk raon wetem wan niufala lukluk, mi bin luk merikel ia we ol pat blong bodi blong gel blong mitufala i bin sevem laef blong fo man, merikel blong lav long famle mo yuniti blong wod, mo merikel blong seves. Mi bin filim wan bigfala sore, be mi bin filim tu paoa blong hop i fulumap sol blong mi wetem wanwan san we i girap wetem kala pink, wanwan pink san taem i go daon, mo wanwan pink flaoa we mi pasem long rod.

Naoia we san i girap, mi lukluk i go long Is, mo afta mi tanemraon mo luk i go long Wes. Mi smael wetem fasin ia blong luksave se, oltaem, i gat ol merikel mo blesing we yu save faenem—mo we oltaem bae san i girap blong mekem harem nogud blong yumi i go daon, sapos yumi letem.