Mosese

“A cecere dina o Mosese ka a vakatokai mada ga vakakina na Karisito me dua na Parofita e vakataki koya oqo na iliuliu ni gauna makawa ni kawa o Isireli.”¹—Elder Bruce R. McConkie (1915–85) ena Kuoramu ni iApositolo Le Tinikarua

Au a sucu mai Ijipita ena gauna era a tiko bobula kina na noqu tamata, na Isireli. Ena nona sa taqayataka ni ra sa lewe levu tiko ga mai na kai Isireli bobula, a vakarota kina o Fero mera vakamatei o ira taucoko na gonetagane ni Isireli sucu vou mai. A taqomaki au o tinaqu, ka vunitaki au tiko me tolu na vula niu sucu oti ni bera ni biuti au ena dua na basikete ena veikuta ni uciwai na Naile. A raici au na luvei Fero yalewa ka susugi au cake meu luvena tagane.²

Niu sa tubu cake, au a biuti Ijipita ka laki tiko mai Mitiani. E kea a laki maroroi au kina o Jecoro, e dua na ivakatawa ni sipi ka bete talega, kau a laki vakamau kei luvena yalewa o Sipora. Au a taura kina mai vei Jecoro, na Matabete i Melikiseteki.³

Ena dua na siga niu vakatawana tiko na sipi nei Jecoro, a rairai mai vei au na Turaga ena dua na vunikau sa kama tiko ka kaya meu laki sereki ira mai na Isireli mai na nodra vakabobulataki.⁴

Au a lesu ki Ijipita ka laki tukuna vei Fero me sereki ira na tamata ni Turaga, ia a sega ka mani vakuria ga na nodra icolacola. A vakayacora na Turaga e vica na mate rerevaki vei ira na kai Ijipita, ia a yalokaukauwa cake ga o Fero ka sega ni via sereki ira mai na Isireli. Na iotioti ni mate rerevaki o ya na nona talai e dua na agilosi me vakamatei ira na tagane ulumatua ni matavuvale yadua ni Ijipita. Era taqomaki na Isireli mai vei koya na agilosi dauveivakamatei ena kena boroi na dra ni lami sega ni vakacacani ena nodra ulu ni katuba ka mera tiko e loma ni vale. Au a lesi kina, me vakayacora kina na Turaga na Kanavata ni Lakosivia me cakacaka vakalotu mera vukei kina na Isireli mera nanuma tiko na cakamana oqo ena veiyabaki.⁵

Na iotioti ni mate rerevaki oqo a vakamalumalumutaki Fero ka sereki ira kina na iIsireli. Ia e muri a qai vakaukauwataka o Fero na yalona ka talai ira nona mataivalu me muri ira na Isireli era sa biubiu. A vakalougatataki au na Turaga ena kaukauwa meu wasea rua kina na Wasa Damudamu, ka keimami a dro bula rawa ena qele mamaca ka ra luvu na mataivalu i Fero ena wasawasa.⁶

A qai liutaki keimami na Turaga ena loma ni lekutu ena o ena siga ka duru bukawaqa ena bogi. A vukei keimami ena wai, mana, kei na toa ni veikau.⁷

Au a kabata cake na Ulunivanua o Saineai, kau laki tiko voli kina me 40 na siga ka ciqoma mai kina na Vunau e Tini mai vua na Turaga. Niu sa lesu mai na ulunivanua, era sa vuki tani na Isireli mai vua na Kalou ka ra sa bulia e dua na bulumakau ena koula mera sokalou kina. Era sa sega tale ni kilikili mera ciqoma na lawa a solia mai vei au na Kalou, kau sa mani vorolaka kina na vatu e tiko kina na vunau. Au a lesu ki na ulunivanua, ka sa solia tale mai na Turaga na ivunau e lailai sobu ka vakatokai tiko vei au—na lawa i Mosese.⁸

Ena loma ni lekutu a vakaraitaka vei au na Turaga na iwalewale meu tara kina e dua na valecavu, se valecavu veikauyaki. Keimami a kauta voli na valecavu oqo ena neimami ilakolako me keimami sokalou kina. Ena loma ni valecavu oqo, era a ciqoma kina na tamata na cakacaka vakalotu kau a vosa kina vua na Turaga “ni rau veirai mata, me vaka na nodrau veivosaki na tamata kei na wekana.”⁹ A vakaraitaka talega vei au na Turaga na sala meu bulia kina na kato ni veiyalayalati, na ivakatakarakara tabu e dau vakatikori ena tikina cecere vakalou ena valecavu, na ka Savasava Duadua Sara.¹⁰

Na gauna sa tala kina na Turaga na “gata vakabukawaqa” me vakanakuitataki ira kina na Isireli, au a vakaroti meu cakava e dua na gata parasa ka vauca ena dua na kau balavu me ra raica kina o ira sa kati ira na gata bukawaqa mera na vakabulai. Ia ena vuku ni nodra dokadoka kei na rawarawa ni cakacaka oqo, e vuqa era a sega ni rai kina era a qai mate.¹¹

A vakavuna na Turaga mera lako sese tu na Isireli ena Lekutu ena 40 na yabaki ni bera ni qai liutaki ira yani ki na vanua yalataki.¹² Au a sega ni butuka na vanua ia au a “kau cake ena yalotabu” vua na Turaga.¹³

Kato ni Ka Dina: Mosese

iVola i Mosese: me ikuri ki na ivola nei Mosese ena Mataniciva Talei, a vola o Mosese na imatai ni lima na ivola ena iVola Tabu: iVakatekivu, Lako Yani, Vunau ni Soro, Tiko Mai na Lekutu, kei na iVakarua.

iLesilesi mai na bula taumada: digitaki me vakatulewataka e dua na itabagauna (raica na Eparama 3:22–23).

iLesilesi ni bula oqo: kauti ira tani na Isireli mai Ijipita; ciqoma na lawa ena Ulunivanua o Saineai (raica na Lako Yani 12; 20).

iLesilesi vakalomalagi: rairai mai ena Ulunivanua ni Mataliataki, ka solia na idola ni matabete vei Pita, Jemesa, kei Joni (raica na iDusidusi ki na iVolanikalou, “Transfiguration,” scriptures.lds.org); a rairai mai ena Valetabu e Kirtland mai Ohio, Amerika, ena 3 ni Epereli, 1836, ka vakalesuamai na idola vei Josefa Simici ni nodra vakasoqoni na Isireli (raica na V&V 110:11).