Vakayagataki ni iTuvatuva ni Veivakabulai me Saumi Kina na Taro

Mai vei LaRene Porter Gaunt

Mekasini ni Lotu

Ni basika vei keda se vei ira tale eso na taro me baleta na kosipeli i Jisu Karisito, eda kila beka na vanua me da kunea kina na kena isau?

Eda bula donumaka e dua na gauna taleitaki. Na kosipeli vakalesui mai nei Jisu Karisito sa lako “tani tiko mai na vuna butobuto sa tu kina” (V&V 1:30). Na vuna, sa levu cake tikoga na luvena na Tamada Vakalomalagi era sega ni lewena na noda vakabauta era sa rogoca tiko na veika baleti ira “na Momani.” Eso era rogoca eso na ka matalia ka veilecayaki. Eso tale era rogoca na veika era viavia kila ka veivakacegui. Era na lako mai vei keda eso mai na ilawalawa ruarua oqori ka vakasaqara na isau ni nodra vakatataro. E vuqa na isaunitaro era na kunei ena ituvatuva ni veivakabulai, ka dau kilai talega me “ka sa navuci tu me rawati kina na bula” (Alama 42:8).

Na taro dau tarogi wasoma na “Au a lako mai vei?” Na cava au mai cakava eke? kau “Na lako ki vei ni sa oti na bula oqo?” Na taro kece oqo ena rawa ni saumi mai na dina ka ra kunei ena ituvatuva ni veivakabulai. Na itukutuku oqo e wasei kina eso na isaunitaro a solia na ivolanikalou kei na noda parofita, o Peresitedi Thomas S. Monson, ena vuku ni taro eso oqo.

Au a lako mai vei?

O keda na kabula tawamudu. Eda a bula vata tu kei na Kalou ni se bera na bula oqo me vaka ni da Luvena vakayalo. “E [vakavuvulitaka] na iApositolo o Paula ni ‘da sa kawa ni Kalou’ [Cakacaka 17:29],” e kaya o Peresitedi Monson. “Me vaka ni da sa kila tu ni yagoda sa nodrau kawa na noda itubutubu vakayago, sa dodonu me da vakasaqara na ibalebale ni vosa nei Paula. Sa tukuna na Turaga ‘ni sa cokoti vata na yalo kei na yago me tamata’ [V&V 88:15]. O koya sa kawa kina ni Kalou na yalo. O koya e vola na Iperiu e vakatokai Koya me ‘Tama ni yaloda’ [Iperiu 12:9].”¹

Na cava au mai cakava eke?

Meda vakavinavinaka ga ni Dauveibuli vuku sa biuti keda mai e vuravura, kei na dua na ilati me guileca kina na veika sa kilai tu mai na bula taumada, me rawa kina ni da na mai vakatovolei, meda na vakadeitaki keda kina, me rawa ni da na rawata na veika sa vakarautaka tu na Kalou meda na vakaivotavota kina.

“Sa na matata ni dua na inaki ni noda mai bula eke meda na rawata e dua na yago ka vakalewe kei na sui. Sa soli talega mai vei keda na isolisoli ni galala ni digidigi. E levu sara na vanua e rawa kina ni da na digidigi ga vakataki keda. Eke eda na vuli mai ena veika eda na sotava. Meda na kila na vinaka mai na ca. Meda na vakaduiduitaka na wiwi mai na kamikamica. Eda na qai raica ni na tiko na revurevu ni veika eda cakava.²

Au na lako ki vei ni sa oti na bula oqo?

Ena yaco mai na mate vei ira kecega na kawatamata. Ia “kevaka sa ciba na tamata, ena bula tale ko koya?” (Jope 14:14.). “Eda kila ni sega ni kena icavacava na mate,” e kaya o Peresitedi Monson. Na dina oqo e sa vakavulici mai vei ira na veiparofita bula ena gauna taucoko. E kunei talega ena noda ivolanikalou tabu. Ena iVola i Momani eda wilika ni dina ka veivakacegui na kena vosa:

“Ia, sa vakaoqo na veika ena yaco ena maliwa ni gauna eda na mate kina ki na gauna eda na tucake tale kina mai na mate—Raica, sa vakatakila vei au e dua na agilosi ena gauna sa veibiu kina na yago kei na yalo sa kau na yalo ni tamata kecega, se vinaka se ca, ki na vanua sa vakarautaka vei ira na Kalou, o koya ka a buli ira.

“Ia, ko ira sa ivalavala dodonu era na kune marau kei na vakacegu mai parataisi, io era na vakacegu kina mai na nodra rarawa kei na oca.” Alama 40:11–12 ³

Ni sa oti na noda vakaturi cake, eda na lako ki matanitu silesitieli ena kena lagilagi me vaka na matanisiga, na matanitu teresitieli ena kena lagilagi me vaka na vula, na mataniu telesitieli ena kena lagilagi me vaka na lagilagi ni kalokalo (raica na V&V 76).

E tiko dina beka e dua na Kalou? E ka dina beka o Setani?

Eratou a tiko kece na Tamada Vakalomalagi, Jisu Karisito, kei Setani ena Matabose cecere oya mai Lomalagi ka vakayacori ni da se bera ni sucu mai. Me vaka ni tiki ni ituvatuva ni veivakabulai, a kerea kina na Tamada Vakalomalagi me dua e lako mai ki vuravura ka me mai sorovaka na noda ivalavala ca. E kaya o Koya: “Ko cei meu tala? A sa sauma e dua [o Jisu Karisito] sa vaka na Luve ni Tamata: Koi au oqo, mo ni talai au. A sa kaya e dua tale [o Setani] : Koi au oqo mo ni talai au. A sa vosa na Turaga ka kaya: Au na talai koya sa bole e liu.

“A sa cudru ko koya na kena ikarua [o Setani], ka vuki tani mai na inaki ni bula taumada. Ia mai na siga ko ya sa lewevuqa sa muri koya” (Eparaama 3:27–28; raica talega V&V 29:36–37; Mosese 4:1–4).

Sa tu beka vei keda na kaukauwa me da vorata kina na veitemaki nei Setani?

Na dua na ikatolu ni yalo era a digitaka me ra muri Setani ni oti na Matabose mai Lomalagi era a vakasavi tani vata kei koya. Era a yalo tu ga ka sega ni vakayago o ira vata kei Setani. E vakavulica o Parofita Josefa Simici ni “o ira kece era vakayago era kaukauwa cake mai vei ira era sega ni vakayago.”⁴ O koya oqo sa rawa kina vei Setani me temaki keda, ia sa tu vei keda na kaukauwa me da vorata.

Na cava dau kena irairai kina ena so na gauna ni sega ni dau sauma noqu masu na Tamada Vakalomalagi?

“Na masu sai koya na ivalavala ena vakasotari kina na lomai Tamana kei na lomai luvena. E sega ni inaki ni masu me veisautaka na loma ni Kalou” (Bible Dictionary, “Prayer”). Na masu e dua na iyaragi ena vukea noda vakatulewataka kevaka eda na vakayagataka na noda galala ni digidigi me vakasotari kina na lomada ki na loma ni Kalou (raica na Eparaama 3:25). E dau sauma e veigauna kece na Tamada Vakalomalagi na noda masu, ia na isaunitaro oqori e rawa ni yaco mai ena io, sega, se wawa mada. Sa ka bibi sara na gauna.

Na cava au dau sotava kina na bolebole niu segata tiko meu bulataka e dua na bula vinaka?

Na bolebole era tiki ni ituvatuva ni veivakabulai. Era na vakaukauwataki keda, vakavinakataki keda, ka vakasavasavataki keda ni da vakararavi vei Jisu Kaisito kei na Nona kosipeli. Ena tokoni keda na Tamada Vakalomalagi ena noda gauna ni bolebole. Na noda veivakatovolei eda na “kalougata vakalevu [kina], kevaka [eda] sa vosota rawa na veika kece oqo” (V&V 122:7).

Au na kila vakacava na ka dodonu kei na ka e cala?

Na luvena kece na Kalou eda sucu vata mai kei na Rarama i Karisito, ka dau vukei keda me da “kila na vinaka mai na ca” (Moronai 7:16). Me kena ikuri, na Yalo Tabu e rawa ni vakadinadinataka vei keda na dina ki na noda vakasama kei na yaloda ena yalo ni sautu kei na vakacegu (raica na V&V 8:2–3).

E rawa beka niu vosoti kevaka mada ga au sa cakava oti eso na ivalavala ca bibi?

Sa kila oti tu na Kalou ni da na ivalavala ca kece ena noda vulica tiko me da digidigi ena dodonu kei na cala.⁵ Ia na ivalavala ca kece, sa tu na kena itotogi e salavata kaya. E vinakata na lewadodonu me sotavi na itotogi. Ena Nona loloma cecere, sa vakatara kina na Tamada Vakalomalagi vei Jisu Karisito me vakayacora na Veisorovaki ka sotava na gagadre ni lewadodonu ena vukuda kece (raica na Alama 42). Ena dua tale na kena itukutukuni na nona vakararawataki na Karisito mai Kecisemani kei na Nona mate mai Kolikoca sa sauma na isau ni noda ivalavala ca kecega kevaka eda na vakayagataka na Veisorovaki i Karisito ena noda veivutuni ka ciqoma na veicakacaka vakalotu ni kosipeli. Ena vosoti na noda ivalavala ca (raica na V&V 1:31–32).