Saumaki Mai kei na Solibula e Finland

Mai vei Melissa Zenteno

Ena vakaivei beka me da cauravou se goneyalewa itabaqase yalodina e Finland? E dua na cauravou e wasea na nona itovo vakavanua kei na nona vakabauta.

Ena vica na maile mai na baravi kei Helsinki e Finland, e koto kina na bai ni waitui o Suomenlinna, a tara ena ika 18 ni senijiuri me veitaqomaki mai vei ira na dau kabavanua. Ni viribaita e ono na yanuyanu, sa matataki mai na itataqomaki na nodra yalodina tudei na kai Finland.

Ia o ira na lewenilotu e Finland e duatani na vale era dau laki sikova ni ra lako ki na nodra koroturaga. Na Valetabu e Helsinki Finland e ivakatakarakara vakayago ni nodra saumaki kei na veitaqomaki era ciqoma ena nodra bulataka na kosipeli.

Vei Niilo Kervinen, e dua na cauravou yabaki 24 mai Rovaniemi e Finland, na vodo sitimanivanua 10 na auwa ki Helsinki e dua na isau lailai me saumi kina na veivakalougatataki ni veiqaravi ena valetabu.

Ni bera na kena vakatabui na Valetabu mai Helsinki Finland ena Okotova 2006, e dau lako vata kei ira tale eso na lewe ni nodratou tabanalevu o Niilo ki na valetabu na Stockholm Sweden se ki na valetabu mai Copenhagen e Denmark. “E dau taura e dua na macawa ni vakacagicagi ena vulaikatakata na ilakolako oya,” e nanuma lesu o koya. Na vodo basi kei na moce ena valelaca ena ilakolako oqori eso na ka taleitaki e dau tu ena nona vakanananu.

Ia na kena sa mai tu ena nona vanua dina e dua na valetabu sa dua na veivakalougatataki vakasakiti. “Ena gauna sa kacivaki kina na valetabu e Helsinki, sa dua na ka na noqu marau,” e kaya o Niilo. “E dau voqa tu ga e yaloqu na masu ni kena vakatabui ena veigauna yadua au curuma kina.”

Na nona dau taleitaka na valetabu e vakaduiduitaki Niilo mai vei ira na nona itokani. “Era dau cakacaka vakaukauwa na kai Finland ka tamata yavavala ia e dau lailai na gauna era vakayagataka ena veika vakayalo ni nodra bula,” e vakamacalataka o koya. E dina ni kaya o Niilo ni dau vakalougatataki ena itokani vinaka, ni sa qase cake sa yaco me matata cake na duidui ena ivakarau ni nodra bula na nona itokani kei na ivakarau ni bula a vakavuvulitaki mai kina o koya. Sai koya na duidui oqori a vakavuna me vakasaqara kina o Niilo na nona ivakadinadina ni yabaki 17. “Meu sa na vakatulewataka na vanua meu tu kina, vakakina me o cei o au,” e kaya o koya. “Ena veivakalougatataki ni Turaga kei na veidusimaki ni matavuvale kei na itokani vinaka, sa dua kina na noqu ivakadinadina kaukauwa cake ni Lotu.”

Ni vosa tiko me baleta na saumaki, a kaya kina o Elder David A. Bednar ena Kuoramu ni iApositolo Le Tinikarua, “Au sa yalataka ni da sa kila na kena dina ka da sa saumaki vua na Turaga, eda na ivakadei ni yalodina kei na doudou ka da na sega tale ni qai lutu tani.”¹ E dina ni gadrevi ena ilakolako ki Helsinki na gauna kei na ilavo, sa yalataki koya o Niilo me tisaipeli i Jisu Karisito. Ia vei Niilo, e sega sara ga ni dua na solibula e kea.

Eso tale na ka me baleti Niilo

Na cava era dau kania na kai Finland?

Eso na kakana au dau taleitaka e oka kina na supu samani kei na lewe ni dia kei na pateta natu. Keimami dau kania talega vakalevu na madrai sila.

Na ka ni lasa cava o ni dau cakava?

Au dau taleitaka meu vakasisi ena ucacevata, sara iyaloyalo, se taubale ga e tautuba. Au a kaulotu mai Japani, au dau vulica na vosa vakajapani ena gauna e rawa kina.

E vakaevei na veigadivi mai Finland?

E sega ni dua na neimami itovo tudei ni veigadivi. Era qai dau kerea ga na tamata me ia na veigadivi ni ra sa veikilai ka veitaleitaki toka ena dua na gauna. Eke, na veigadivi e sega ni dua na ka e caka me yaco kina na veikilai. Era tu eke na cauravou kei na goneyalewa itabaqase yalodina, kevaka mada e sega ni levu na lewenilotu. Ena so na gauna era dau lakova na ilakolako babalavu na lewenilotu cauravou kei na goneyalewa itabaqase me ra laki gadi kei na dua era a sota ena dua na danisi ni cauravou kei na goneyalewa itabaqase.