Kevaka sa Vakatabakidua Nomudou Rai Meu Vakarokorokotaki Kina
O Katherine Nelson e vakaitikotiko mai Utah e Amerika. O Heidi McConkie e vakaitikotiko mai Delaware e Amerika.
Na sala cava ena vukei keda kina na noda bula rakorako ena vosa, itovo, kei na irairai me da vakacilava yani na rarama ka vakalagilagia kina na Kalou?
Ena Matabose mai Lomalagi ena bula taumada, ni bole o Jisu Karisito me noda iVakabula, a kaya vei Tamana, “I Tamaqu me yaco ga na lomamuni, ka me nomuni tikoga na vakarokoroko ka sega ni mudu” (Mosese 4:2).
Sa dau tura na Turaga ena veigauna kece na ivakaraitaki ni Nona vakalagilagi na Tamada. Ena Nona gauna ni veiqaravi ena bula oqo, e sega vakadua ni dau dreta na vakasama ni tamata ki Vua na iVakabula ia e dau dusimaki ira na daumuri Koya vei Tamana, ka vakavuvulitaka, “O koya sa vakabauti au, sa sega ni vakabauti au ga, sa vakabauti koya talega sa talai au mai” (Joni 12:44). Ena itovo ni bula, irairai, vosa, kei na ivalavala, sa vakavuvulitaka kina vei keda na iVakabula na bibi ni rakorako.
Ena nodra yalataka me ra muria na iVakabula na cauravou kei na goneyalewa itabaqase era cavuti ena itukutuku oqo, ka vakaraitaka na ivakarau sa tarai cake kina na nodra ivakarau ni bula ka tubera na nodra ivalavala na ivakarau era raica kina na nodra ivakaraitaki e loma ka vakakina e taudaku ni ivalavala rakorako.
Vakalagilagia na Kalou ka Vakacilava Yani na Rarama
Eda na kila vakavinaka cake na ivakarau e vakalagilagia kina na Kalou na rakorako ni da kila na cava dina na rakorako. Na Tudei ena Vakabauta e vakamacalataka: “Na isulusulu rakorako sai koya e dua na ivakarau ni yaloraramusumusu kei na maqosa ni isulusulu, sasauni, ivosavosa, kei na itovo. Kevaka o rakorako, mo kakua ni kauwaitaka na veika e sega ni dodonu mo vakaitavitaki iko kina. Na kena dodonu, mo vakasaqara mo ‘vakarokorokotaka na Kalou ena yagomudou’ (1 Korinica 6:20).”1
Ni da vulica me da vakaraitaka na rakorako me vaka na iVakabula, eda na kidavaka na Yalo ki na noda bula, ka vakataucokotaka na yalayala ni “kevaka dou sa kitaka na ka kecega me vakarokorokotaki kina [na Kalou], ena rarama na yagomudou taucoko” (V&V 88:67). Ni ko wilika na ivakarau ni nodra kila na rakorako eso tale na cauravou kei na goneyalewa itabaqase, ena rawa ni o vakasamataka na ivakarau mo vakalevutaka kina na nomu rarama vakayalo ena nomu vakayacora na veisau mo vakavinakataka cake na nomu yalayala e lomamu kei na nomu ivakaraitaki e taudaku ni rakorako.
Mo Rakorako ena Vosa kei na iTovo
“Na nomu vosa kei na ivalavala ena rawa ni veivakauqeti sara na kena revurevu vei iko kei ira na tani. Dau vakamacalataki iko ena ivosavosa savasava, vinaka, ka veilaveti kei na ivalavala ena kauta mai na marau ki vei ira era tu wavoliti iko. Na nomu sasaga mo rakorako ena vosa kei na ivalavala ena vakalevutaki cake kina na veituberi kei na veivakacegui mai na Yalo Tabu.”2
O Dar’ja Sergeevna Shvydko mai Volograd e Rusia, e vakamacalataka ni da na rakorako ena noda vosa ni da dokai ira na tani ka vakayagataka na “domo malumu ka tukuna vakamalua na noda nanuma ena noda sega ni vakayagataka na vosa kaukauwa ka sakasaka.” Na ivosavosa rakorako e sega kina na kakase, veivakalialiai, veivakacacani, kei na veicavilaki. E sega ni vakalolovirataka e dua se vakalevulevui koya; e vakaraitaka ga na yalovinaka vei ira ka vakadinadinataka na nodra vakalou na luvena vakayadua na Tamada Vakalomalagi.
E dodonu me vakaraitaka talega na noda vosa na noda dokai Iratou na Lewetolu Vakalou: “Dau levea na ivosavosa dukadukali kei na kena dau vakamamadataki ka sega ni rokovi na yaca ni Turaga me vaka sa matau tu e vuravura. … Na kena sega na vakarokoroko ena mataqali vosa vakaoqori … ena vakamalumalumutaka na noda rawata na veivakauqeti malumu ni Yalo Tabu.”3
Me vaka ga na kena rawa ni caca veiwekani na ivosavosa sega kina na vakarokoroko me vaka na kakase kei na veivakacacani, na vosa rakorako ena vakabulabulataka na yalodina vua na Kalou ka, me vaka e vakamacalataka o Kelly Prue mai Utah e Amerika, “ena vakalevutaka na noda rawata me da tara cake e dua na veiwekani vinaka kei ira na tani. Na noda ivosavosa rakorako ena vukei keda me da vakavotuya mai tautuba na veika vinaka sara e tu vei ira na tani.”
Na rakorako ni vosa kei na rakorako ni tovo erau dau salavata. “Sa ka bibi sara me dau rakorako na noda vosa kei na noda itovo baleta oqori ena tukuni iko kei na veika o dau vakabibitaka,” e kaya o Mike Olsen mai Utah. Era na raica na tamata ni rau sega ni sala vata na vosa kei na ivalavala. Na noda vosa ena laveti ira na tani ka vakalagilagia na Kalou e dodonu me na salavata kei na kena ivalavala veitokoni. Mai na cakacaka ni veiqaravi kei na yalovinaka, eda vakaraitaka kina ni noda yalayala me da laveti ira na tani ka doka na Kalou e titobu cake mai na noda vosa. Na noda ivakaraitaki ni bula vakatisaipeli ena vosa kei na ivalavala e rawa ni veivakauqeti ki na vinaka.
“Au dau taleitaka sara ni rakorako na itovo kei na vosa,” e kaya o Carrie Carlson mai Colorado, Amerika. “E dua na ka taleitaki e tiko vua e dua e dau yalomalumalumu ka sega ni dau cakava na veika e kena inaki me vagoleya na rai ki vua. O ira e dau rakorako na nodra vosa e dau yaco me ra waqawaqa qaqa ni Turaga.”
Dau Rakorako ena iSulusulu kei na iRairai
“Ni rakorako [na isulusulu] ena vukea na kena vakavotui mai na vinaka e tu vei keda ni na vukei keda me da vakanamata ga ki na ka vakayalo ka sega ki na tamata vakayago,” e kaya o Paul Cave mai Utah. Ni rakorako na noda isulu, eda na vakayaloqaqataki ira na tani me ra kilai keda ka taleitaka na noda bula kei na noda itovo ka sega soti ena keda irairai.
Na noda isulusulu e sega walega ni tukuna vei ira na tani na ivakarau e dodonu me ra raici keda kina, ia ena vakaimawe talega ena ivakarau eda raici keda kina. “Eda vulica mai na kosipeli ni yagoda e isolisoli ni Kalou,” e kaya o Luis Da Cruz Junior mai Brazil. “Na yagoda ena vukea na noda tubu ka yaco me vaka na Tamada. Ena inaki oqori sa bibi kina me da dau vakaisulu rakorako. Ni da vakayacora vakakina, eda vakaraitaka kina vua na Kalou kei ira na tani ni da rokova na isolisoli oqo kei ira na tani.”4
E vakamacalataka o Carrie, “Na isulusulu sega ni rakorako e kena inaki me boroya na yago me dua na iyaya ka sega ni semati ki na dua na yalo vakaitovo ka vakaivakarau ni bula. Na rakorako, e dina ni dau levu cake na kena isau ena so na gauna ka levu talega na kena gauna, sa vukei au meu vulica ni yagoqu e waqawaqa ni dua na yalo vakamareqeti ka tu na kena icavacava kei na inaki vakalou, a sucu ka susugi cake mai vei rau na iTubutubu Vakalomalagi. E ganita vakalevu sara na kauwai kei na vakarokoroko mai na kena e rawa ni solia kina o vuravura.”
Na Tudei ena Vakabauta e vakavuvulitaka: “Me kena ikuri o kemuni kece mo ni vakavukutaka sara na nomuni na vakaisulu [tawa kilikili], kemuni irairai, kei na ikotikoti. Ena isulusulu, irairai, kei na itovo, dau maqosa ka savasava, kakua ni sakulevu ka yakusurasura.”5 Ena ivakarau eda vakasulumi keda ka vakaitovotaki keda kina, eda sa tukuna tiko kina na ivakarau ni noda vakarokorokotaka na Kalou, o keda, kei ira na tani.
Yalataka mo Tudei Kina
Ni da tovolea me da muria na ivakatagedegede vakosipeli ni rakorako, eda na vakaraitaka na noda yalodina ena noda tudei kina, muria na ivakaro ni Turaga ena veigauna kece ka sega ni gauna ga e rawarawa kina.
Na yalodina e dau yavutaki ena ivakavuvuli ni kosipeli. E vakamacalataka o Anthony Roberts mai Utah, “Na rakorako e dua na ituvaki ni vakasama, na gagadre me da lako voli e veisiga ena kilaka vakosipeli kei na ituvatuva ni veivakabulai.” Ni da dromuci keda ena kosipeli, ena vakatitobutaka ka vakalevutaka na noda gagadre me da bulataka na ivakavuvuli ni kosipeli na noda saumaki mai.
Kila na Kemu iTuvaki Vakalou
Na noda vakatovotovotaka e veigauna na bula rakorako ena vukea me da kila ka marautaka na itutu eda sucu mai kina, kei na noda kila na keda ituvaki vakalou ena rawa ni vakauqeti keda me da rakorako vakalevu cake. E vakamacalataka o Raffaella Ferrini mai Florence e Itali, “E vakalougatataka na noqu bula na rakorako baleta ni vukei au meu vakila niu dua na luvena yalewa digitaki na Tamada Vakalomalagi, ia na kila ka oqori, sa yaco meu vinakata kina meu rakorako.”
Ni da vakatara me vakamacalataka o vuravura o cei o keda e rawa ni vakacacana na keda ituvaki. E vakamacalataka o Julianna Auna mai Utah na veika a sotava: “Ni bera niu rawata e dua na ivakadinadina ni ivakavuvuli ni rakorako, au a tu ena dua na vanua ni rarawa ka sega ni taqomaki vakayalo. Ni laivi o vuravura me vakamacalataki au e veivakaleqai ka vakalokilokitaki au vakayalo baleta na rai ni vuravura ena veika vakayago e ca ka sega ni loloma. Ena dua na gauna au sa lewa meu kua ni vakarogoci vuravura ka laiva me vakamacalataki au na noqu veiwekani kei na Kalou, sa yaco me rawarawa cake na noqu bula, galala, ka mamarau cake.” Ni da segata na veivakadonui mai vei Tamada Vakalomalagi ka sega mai vei vuravura, eda na kunea na reki levu cake ena bula ka levu cake na veivakauqeti ni bula rakorako.
Bulataka e Dua na Bula Rakorako
“Na rakorako ena vakaraitaki ena veika kece sara eda cakava: noda ivosavosa, na keda irairai e taudaku, noda itovo, kei na vanua sara mada ga eda dau lako kina,” e kaya o Galina Viktorovna Savchuk mai Novosibirsk e Rusia. Na bula rakorako e semati vakavoleka sara ki na noda yalodina ki na kosipeli kei na isema ni noda veiwekani kei na Kalou.
Na rakorako dina sai koya ni rau waki vata na itovo kei na ivakarau ni rai. Ni da cakacakataka me da vakavinakataka cake na noda itovo se na ivakarau ni noda vakasama ena vukei keda me da vakavinakataka talega na kena ikarua. Ni da rakorako ena noda itovo kei na keda irairai ka sega kina na yalo me ka ni bula taucoko ena tarova na noda rawata na veivakalougatataki taucoko ni bula rakorako. Kei na noda vakabauta ni da tamata rakorako ka sega ni da raica me vakakina na noda ivalavala eda sa vakacalai keda tikoga kina.6
Ena vakasama ni rakorako, me da kaya ni sa vakatabakidua na noda rai ki na lagilagi ni Kalou e kena ibalebale ni da sa yalataka e tautuba ka vakakina e loma me da na bula rakorako. Me vaka ga ni dodonu me vakadodonu tiko vua na Kalou na noda rai, na keda irairai e taudaku kei na noda ivalavala sa dodonu me veisotari tiko e veigauna kei na ivakavuvuli ni rakorako. Ia na kena vagolei walega na mata vua na Kalou e sega ni kena ibalebale ni sa vakatabakidua ki na Nona vakalagilagi; sa dodonu me na vakanamata tiko ga Vua. Sa vakakina, na isulusulu rakorako kei na irairai sa dodonu me salavata kei na kena raici na ivakavuvuli tawamudu.
Ni da vagoleya na matada vua na Kalou, sa na rawarawa kina noda vakanamatataka na noda rai ki Vua. Sa vakakina, ni da vakanamatataka noda rai vua na Kalou, ena vagolei na matada ki Vua.
Ni da segata me da bula rakorako, eda na vakila ni na levu cake na veivakauqeti ni Yalo ena noda bula. Sa vakavuvulitaka o Elder Robert D. Hales ena Kuoramu ni iApositolo Le Tinikarua: “Sa ka bibi sara na bula rakorako me da kilikili kaya kina kei na Yalo. Me da rakorako sai koya me da yalomalumalumu, ia na yalomalumalumu ena sureta na Yalo me tiko vata kei keda.”7 Ni dusimaka tiko na noda vakasama kei na noda ivalavala na Yalo. Ena yaco me vakatabakidua ki na Nona vakalagilagi na Kalou na matada ka da na vakasinaiti ena rarama.