Vakavakarau mo Veiqaravi, Veiqaravi mo Vakavakarau
Sa solia vei iko na Kalou na Matabete i Eroni baleta ni tiko Vua e dua na nomu cakacaka—ena gauna oqo kei na veisiga ni mataka.
iVakaraitaki mai vei Taia Morley
O Jonacani e dua na noqu itokani ka a lewena na Lotu ena va na yabaki sa oti. O koya duadua ga na lewe ni Lotu ena nona matavuvale. Ni ciqoma oti na Matabete i Eroni, sa tekivu me qaravi ira na tani me vaka e se bera vakadua ni bau cakava e liu. E kila o Jonacani kevaka me veiqaravi, ena gadreva me kila e levu cake na ka. E vinakata talega o koya me kilikili ka rawa ni nuitaki, sa mani vulica na kosipeli, masu, ka dau lakova na nona soqoni ena Sigatabu kei na semineri. A cakacaka vakaukauwa me muria na ivakaro kei na ivakatagedegede ni Lotu. A gumatua ena nona qarava vakavinaka na nona itavi ni matabete, oka kina ni dua o koya na dauveituberi vakamatavuvale cecere. A vukei koya na nona ivola ni iTavi Vua na Kalou me kila na itavi eso oqori ka vulica na ivakarau me qarava vinaka kina.
Nona dau yalodina o Jonacani ena veiqaravi ni matabete sa solia vua na kaukauwa vakayalo. E veivuke ena nona taqomaki mai na veivakayarayarataki ca eso. A tubu vakalevu sara ni veiqaravi ka vakavakarau me baleta na nona veisiga ni mataka. Ena yabaki sa oti oqo, a ciqoma ena bula kilikili na Matabete i Melikiseteki kei na edaumeni ni valetabu. Sa kaulotu tiko oqo mai Brazil.
E dau vakatokai na Matabete i Eroni me “matabete ni vakavakarau.” Sa solia vei iko na Kalou na Matabete i Eroni baleta ni tiko Vua e dua na nomu cakacaka—ena gauna oqo kei na veisiga ni mataka. Na nomu veiqaravi yalodina ena Matabete i Eroni ena vakarautaki iko ki na veimadigi cecere cake ni veiqaravi ena veiyabaki sa roro mai. Me vakataki Jonacani, o sa vakarau tiko mo “ciqoma na Matabete i Melikiseteki, mo ciqoma na veivakalougatataki ni valetabu, mo daukaulotu tudei, mo tagane vakawati dauloloma ka tama, ka ia tikoga ena bula taucoko ni veiqaravi vua na Turaga” (Tudei ena Vakabauta: E Dua na iDusidusi Vakosipeli [2004], 4).
O na sega beka ni kila na veika matailalai ni veimadigi vakasakiti sa vakarautaka tu na Tamada Vakalomalagi me baleti iko, ia au yalodei tu ni ko ni sa na vakarau mo ni sotava kevaka o ni nanuma mo ni cakava na veika oqo ena gauna ni Matabete i Eroni
Muri Jisu Karisito
Ni tu vei iko na matabete, o sa matataki Jisu Karisito tiko. Kena ibalebale ni o sa kerei mo muri Koya ka cakava na veika ena cakava o Koya. Na cava ena cakava o Koya? Ena veigauna kece sara, sa dau solia na Nona bula ena veiqaravi kei na veivakalougatataki vei ira na tani. Mo vakakina o iko. Soli iko ena veiqaravi vei ira na tani—oti qai tubu ka vinaka cake me rawa kina ni levu tale na ka e rawa ni o solia mai! Nanuma na nona tubucake ko Jisu ena Nona gauna vakaitabagone: A sa “tubu cake ko Jisu ena vuku kei na yagona talega, a sa vinakati koya vakalevu cake tikoga na Kalou kei ira talega na tamata” (Luke 2:52).
E tiki ni nona muri na iVakabula na noda yaco me da yalomatua cake ka bulabula vakayago ena nomu gauna vakaitabagone. Oqo ena gadrevi kina vei iko mo cakacaka vakaukauwa ka solia tikoga na nomu vinaka duadua (raica na V&V 4:2). Ena taleitaki iko na Kalou ni o toro voleka yani Vua ena masu, vulica na kosipeli, talairawarawa, kei na veiqaravi. Era na taleitaki iko na vo ni tamata ni o dau yalovinaka ka yalodina ki na nomu matavuvale ka itokani Vakarisito vei ira na tamata kecega.
Nanuma ni o Jisu e dau cakava tikoga na lomai Tamana. O muri Karisito ena gauna o vaqara kina na loma ni Kalou ena siga taucoko me dusimaka na nomu veiqaravi kei na ivalavala ena veivakauqeti vakayalo o ciqoma.
Qarava na Cakacaka Vakalotu ni Matabete
E gadrevi na veicakacaka vakalotu ni matabete me baleta na Luvena kece sara na Kalou ka na vakalougatataki ira vakatautauvata na luvena tagane kei na yalewa. Mai na gauna sa yaco kina mo dikoni o sa na veivuke ena kena qaravi e dua na cakacaka vakalotu ni matabete ena nomu veisoliyaka na sakaramede. O na tomana na nomu qarava na cakacaka vakalotu ni matabete ena Matabete i Eroni e muri ena nomu vakarautaka ka vakalougatataka na sakaramede, veipapitaisotaki, ka vakaitavi ena nodra tabaki eso tale na Matabete i Eroni.
Mo vakaitavi ena cakacaka tabu vakalotu, sa dodonu mo savasava. Na nomu bula savasava e rawa ni vakaikuritaka na mana vakayalo cecere ni cakacaka vakalotu o qarava. Segata mo kilikili ena sala kece sara me rawa ni o kauta kina na iyaya tabu ni sakaramede ni Turaga (raica na V&V 38:42). Ni o vakayacora vakakina, sa rawa ni o tu e matadra na nomu tabanalevu se tabana me vaka e dua na mata dina sara i Jisu Karisito. Era na vakalougatataki ena nomu yalodina mo rokova na veiyalayalati o vukei ira tiko me ra vakavouya.
Dau Veiqaravi Tikoga
Ni o Matabete i Eroni, o dauveiqaravi. Ena veigauna kece sara, dau vakasaqara na madigi mo veiqaravi kina vei ira na nomu matavuvale, itokani, lewe ni kuoramu, kei ira tale eso. Na veika kece o vakayacora ena matabete ena vukei iko mo veiqaravi kina vei ira na tani vakayago ka vakayalo talega. Me vakaoqo, ni o vukea na nomu bisopi se peresitedi ni tabana ena nomu qarava e dua na matavuvale o veituberi tiko kina, o sa vulica tiko na ivakarau mo raica ka qarava kina na nodra gagadre na tani. O na veiqaravi talega vei ira na tani ena nomu dolele yani mo vaqaqacotaki ira na nomu kuoramu ka vueti ira era luluqa tu vakalotu, kumuna na isolisoli ni lolo me ra vukei kina na dravudravua kei ira era vakaleqai, cakava na veicakacaka vakayago eso ena vukudra na tauvimate kei ira na wamalai, vakavuvuli ka vakadinadinataki Karisito kei na Nona kosipeli, ka vakamamadataka na nodra icolacola o ira era yalolailai.
O veiqaravi ena nomu vakavulica na lesoni ena nomu soqoni ni kuoramu kei na nomu lotu vakamatavuvale. O veiqaravi ena nomu sureti ira na tamata kecega me ra lako mai vei Karisito (raica na V&V 20:59)—mai vale, ena nomu kuoramu, mai koronivuli, kei ira na daukaulotu tudei, kei na veivanua kecega o tiko kina.
Nomu Siga ni Mataka
Veivosakitaka vata kei na nomu itubutubu se dauvakasala na veika ena namaki vei iko ena nomu itavi vaka Matabete i Melikiseteki, daukaulotu, tagane vakawati, ka tama, ena veisiga ni mataka. Vola ena vanua e lala tu eso vei ira na itavi cecere oqori kei na sala e rawa ni o vakarautaki iko yani kina nikua ni o veiqaravi tiko ena Matabete i Eroni. Ena veivakadrukai beka ena gauna oqo, ia nanuma tiko ni sala uasivi duadua mo vakavakarau kina mo cakava ga na ka e kerea vei iko na Tamada Vakalomalagi nikua. Mo kunea na marau ena nomu veiqaravi oqo ka vakavakarau ki na nomu veisiga lagilagi ni mataka.