Ol Kwestin mo Ansa
“?Wanem nao mi mas mekem taem wan topik i kamaot long skul we i go agensem ol gospel tijing, olsem abosen (fasin blong kilim bebi i ded taem hem i stap yet long bel blong mama)?”
I gat plante wei blong ansa—o no ansa—i dipen long situesen. Faswan, tingbaot wanem nao i save hapen sapos yu talem samting, o sapos yu no talem samting. Sapos we yu no toktok i mekem se ol narafala i ting se yu agri wetem wan samting we yu save se i rong, nao bae i gud blong yu faenem wan simpol wei blong talemaot se yu no agri. Sapos yu ting se toktok blong yu bae i mekem man i raorao, nao, maet i gud yu faenem wan nara taem blong talem toktok blong yu. Be, sapos insaed long klas blong yu, ol man oli gat respek long wanwan long olgeta mo tija i stap askem yufala blong givim tingting, yu save prea blong kasem insperesen, mo afta, eksplenem bilif blong yu.
Yu save rere tu bifo taem sapos yu save se klas blong yu bae i toktok raon long wan poen. Antap long olgeta skripja mo ol toktok blong konfrens long saed blong poen ia, lukluk i go long Stap Tru long Fet, Gospel Principles, o For the Strength of Youth. Yu save praktis tu blong stap eksplenem poen ia long taem blong famle haos naet. Taem yu rere, toktok wetem tija blong yu o ol fren blong klas blong yu.
Olsem wanem yu ansa bae i impoten semmak long wanem nao bae yu talem. Gat respek, mo traem blong no yusum ol toktok we ol memba blong Jos nomo oli save andastanem. Bae ol fren blong klas blong yu bae oli lus wantaem sapos yu talem: “Wan Yang Woman advaesa long wod blong mi i tijim mi se …”
Wanem i moa impoten, i blong yu yu save wanem nao Jos i tijim, mo wanem nao Tabu Spirit i stap talem long yu, blong mekem se bae yu no lus wetem ol rong tingting we maet yu save harem o ridim long klas.
Tingbaot Hu Ia Nao Yu Ripresentem
Taem yu stap lukluk long ol situesen olsem, traem blong tingbaot se maet ol narafala oli no serem ol semfala filing olsem yu long saed blong topik ia. Yu no fos o toktok strong tumas, be yu no fraet blong difendem ol bilif blong yu. Tingbaot se yu stap ripresentem Kraes.
Madlin K., 16 yia, Waeoming, YSA
Toktok long Gud Fasin
Mi filim se mi mas talemaot ol tingting blong mi long wan gud fasin, mo talem tu from wanem mi biliv long olgeta. Mi no ting se mi nidim blong mekem ol narafala oli gat ol sem tingting blong mi, be mi ting se oli mas save ples we mi stanap long hem long sam poen, mo oli mas andastanem poen blong tingting blong mi.
Sabrina S., 16 yia, Oregon, YSA
Serem Wanem we Jos i Stap Tijim
Mi stap traem blong ansarem ol kaen kwestin olsem long bes wei we mi save mekem, from se ol fren blong mi mo ol tija blong mi oli no save sapos mi no talemaot long olgeta weaples nao Jos i stanap long hem long ol kaen topik olsem. Taem mi mekem olsem, bae oli save tingbaot hemia long fiuja, mo bae yu nao yu kasem samting long saed blong spirit. Tingbaot: “Nao long sem fasin, laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao bambae olgeta oli save leftemap nem blong Papa blong yufala, we i stap long heven.” (Matiu 5:16).
Josua M., 16 yia, Manjesta, Inglan
Gat Respek
Hem i impoten blong letem ol narafala man oli mas lisin long yumi, be hem i impoten tu blong gat respek long ol bilif blong ol narafala man. Yu no raorao. Blong stap raorao, i mekem se yu gat enemi, mo i mekem tingting blong man i fasfas. Sapos wan i talem wan tingting agensem relijin blong yu, stap kwaet, tingting stret, mo gat respek, mo no foget blong lisin long Spirit. I gat ol samting we yumi no andastanem, be God i andastanem. Yumi mas lisin long Spirit mo lanem samting long Spirit blong Hem.
Hanah M., 18 yia, Yuta, YSA
Helpem Ol Narawan blong Tingting long Wanem I Raet
Serem filing blong yu long ones fasin. I gat plante topik long skul, olsem abosen, we oli toktok raon long hem bigwan, so yu no mas sem blong toktok. Hem i wan gudfala janis blong serem gospel mo ol standet we yumi stap biliv long olgeta. Sapos yu serem ol bilif blong yu, yu save helpem ol pipol blong oli tingting long wanem we i raet.
Madison R., 14 yia, Not Karolina
Stretem Giaman Doktrin
Yumi pat blong wan Jos we i tingting long misinari wok, we yumi evriwan, God i singaotem yumi blong prij; taswe, yumi no save letem giaman doktrin i go raon. Long ol situesen olsem, yumi mas toktok blong save stretem eni giaman doktrin mo helpem ol pipol blong oli andastanem poen blong gospel we i kambak long saed blong topik we oli stap tokbaot.
Deved M., 16 yia, Kasaï-Wes Provins, Demokratik Ripablik blong Kongo
Save Ples we Jos I Stanap long Hem
Mi bin stap tekem wan klas we ol topik we i mekem man i toktok, i stap kamaot oltaem. Fas samting blong mekem, hem i blong respektem ol bilif blong ol nara man, semmak olsem we yu wantem se ol nara fren blong klas oli respektem bilif blong yu. Sapos topik we oli stap tokbaot i agensem stret wanem Jos i stap tijim, filim fri blong talemaot tingting blong yu. Yu no nid blong talemaot nem blong Jos long ansa blong yu. Be, yu mas meksua blong save weaples nao Jos i stanap long hem long saed blong olgeta samting ia.
Josef S., 18 yia, Merilan, YSA
Stap Longwe long Fasin blong Raorao
Bae mi eksplenem tingting blong mi; bae mi difendem ol prinsipol mo ol doktrin blong Jos mo semtaem, bae mi respektem ol tingting blong ol narafala man. Bae mi no lukaot blong raorao, we bae i mekem Spirit i ronwe, mo Spirit i save lidim tingting blong ol narafala man long wan gudfala wei.
Daeana V., 15 yia, Buenos Aires, Ajentina