Tras we i kam tru long Fasin blong Stap Klin Inaf
I kamaot long wan yut faeasaed we i tekem ples long 31 Disemba 2006.
Mi wantem tokbaot stret abaot wei blong gat wan kaen tras ia we i spesel tumas.
Mesej blong mi long yu, i wan mesej blong hop mo blong leftemap tingting blong yu naoia, mo blong ful laef blong yu. I gat plante trabol long wol tedei, be i bin gat plante trabol finis long eni taem long wol ia. Yu no tingting tumas long olgeta, mo yu no letem tingting blong yu i kam slak from olgeta. Ol yia we oli stap kam oli fulap long ol gudfala janis mo ol bigfala blesing. Bae yumi gohed blong gat niu samting long saed blong saens mo teknoloji, meresin mo komunikesen—evri saed ia we i mekem fulap samting blong mekem laef blong yumi i kam gud moa. Yu stap laef long wan taem blong wol ia we i gat fulap gud samting i bitim wanem yumi bin save bifo, wetem moa blesing naoia we i stap long moa pipol raon long wol bitim eni narafala taem long histri. Tingbaot—bubuwoman blong yu i neva drim se bae hem i gat wan dijitol tablet taem hem i yangfala olsem yu, mo bubuman blong yu i no save nating yet olsem wanem blong sendem wan teks mesej. So yu mas hapi, mo helti mo gat hop.
Long wan wei, mi talem hemia from wan atikol we mi jes ridim we i talem se sik we i bigwan long medel blong ol yang pipol tedei, i no sik suga, o sik blong hat o kansa. (Ol kaen trabol ia oli blong ol olfala pipol olsem mi, i no blong yufala.) No. Sik we ol yangfala mo olgeta we i kasem 20 yia oli gat, oli talem se hem i we oli gat tu tingting long olgetawan, oli fraet abaot fiuja, oli ting daon long olgetawan, mo oli no gat tumas tras long olgetawan mo long wol raon long olgeta.
Nomata mi mi moa olfala bitim yu, mi andastanem ol kaen wari olsem from se long wan bigfala pat blong yangfala laef blong mi, mi tu mi fesem ol situesen we mi no gat tumas tras long miwan. Mi save tingbaot se mi traehad blong gat gud mak long skul, mi stap hop blong winim wan janis blong skolasip, mo stap askem miwan from wanem ol narawan oli gat moa talen bitim mi long eria we mi stap long hem. Mi save tingbaot ol yia we mi stap ron long atletik we mi traehad blong plei wetem tras long miwan blong save go long hae skul mo kolej spot, we mi wantem tumas blong winim bigfala gem, o tekem kap i kambak hom. Speseli mi tingbaot we mi no trastem miwan nating wetem ol gel, we i stamba blong bigfala wari long ol yang man. Mi glad tumas se Sista Holan i traem lak blong hem wetem mi. Yes, mi save tingbaot evri samting we yu stap tingbaot—we mi no sua se mi luk olsem wanem, o sapos man i akseptem mi, o wanem nao fiuja i gat blong mi.
Stamba tingting blong mi long ples ia, i no blong toktok raon long evri poen ia we wan yangfala i fesem we i mekem se hem i gat tu tingting long hemwan, mo i no gat tumas tras, be mi wantem tokbaot stret olsem wanem blong gat wan kaen tras ia we i spesel tumas—wan tras we, taem yu winim long stret wei, i mekem plante gud samting long plante saed blong laef blong yumi, speseli blong tingting gud abaot yumiwan, mo olsem wanem yumi stap lukluk long fiuja. Blong mekem poen ia i klia, mi nid blong talem wan stori.
Valiu blong Yuwan I Mas Stap Klin Inaf
Plante yia i pas nao, longtaem bifo oli singaotem mi olsem wan Jeneral Atoriti, mi bin stap olsem wan spika long wan yang adalt konfrens. Konfrens ia, i en wetem wan testemoni miting, we long miting ia, i bin gat wan naes yang riten misinari i stanap blong talemaot testemoni blong hem. Hem i luk gud, i klin, mo i gat tras long hemwan—olsem we wan riten misinari i mas luk.
Taem hem i stat blong toktok, wota i kam long ae blong hem. Hem i talem se hem i glad tumas blong stanap long medel blong wan gudgudfala grup blong ol yang Lata-dei Sent, mo blong stap filim gud abaot laef ia we hem i traem blong gat. Be filing ia, i bin posibol nomo, hem i talem, from wan eksperiens we hem i bin gat sam yia bifo, wan eksperiens we i bin sepem laef blong hem fogud.
Afta, hem i tokbaot we hem i kambak hom afta long wan deit, i no longtaem we oli odenem hem wan elda taem hem i gat 18 yia. Wan samting i bin hapen long deit ia we hem i no praod long hem. Hem i no tokbaot gud wanem, mo i no blong hem i talemaot long pablik tu. Kasem tedei, mi no save wanem i bin hapen, be i bin bigwan inaf blong samting ia i spolem spirit blong hem mo hao hem i tingting abaot hemwan.
Taem hem i stap sidaon long trak blong hem smol taem long smol rod insaed long yad blong haos blong hem, mo stap tingting mo stap harem nogud from wanem samting we i bin hapen, mama blong hem, we i no memba, i ron i aot long haos i go stret long trak blong hem. Kwiktaem i talem se yangfala brata blong hem i jes foldaon insaed long haos, i bangem strong hed blong hem, mo i stap seksek bigwan. Papa, we i no memba blong jos tu, i ringim ambulens wantaem, be bae i tekem sam taem blong help i kam.
Mama i krae i talem se: “Yu kam mekem wan samting. ?I no gat wan samting long Jos blong yu we bae yu mekem long kaen taem olsem? Yu gat prishud blong olgeta. Yu kam mekem wan samting.”
Mama blong boe ia i no save tumas samting abaot Jos long tetaem ia, be hem i bin save wan samting abaot ol blesing blong prishud. Be, long naet ia, taem wan we boe ia i lavem tumas mo i rili nidim fet mo paoa blong hem, yangfala man ia i no save mekem wan samting. From ol filing we hem i stap traehad blong faet wetem mo nogud samting we hem i harem from samting we hem i bin mekem—nomata wanem samting ia—hem i no save putum tingting blong hem blong go long fored blong Lod mo askem blesing we wan narawan i bin nidim.
Hem i kamaot long trak mo i ron i go daon long rod i go long haos blong wan olfala man we i klin inaf, we hem i fren wetem long wod stat long taem we boe ia i jenisim laef blong hem tu o tri yia i pas finis. Hem i eksplenem samting we i stap, mo tufala i gobak long haos bifo ambulens i kam. Hapi en blong stori, olsem we hem i talem long testemoni miting ia, i we, wantaem nomo, olfala man i givim wan swit, strong prishud blesing, mekem se boe we i kasem kil i stap kwaet mo i spel bifo ambulens i kam. Oli go kwik long hospital mo oli jekem gud hem mo luk se i no gat bigfala kil long boe ia. Wan bigfala taem blong fraet blong famle ia, i pas.
Afta, riten misinari we i jes tokbaot i talem hemia: “I no gat wan we i no fesem wanem we mi bin fesem long naet ia bae i save filim sem ia we mi bin filim, mo harem nogud ia we mi tekem from se mi no filim klin inaf blong yusum prishud ia we mi kasem. Memori ia i soa tumas long mi from se i stret smol brata blong mi we i bin nidim mi, wetem tu papa mo mama blong mi we tufala i no memba, we tufala i fraet tumas, we tufala i gat raet blong luk se bae mi mekem moa long taem ia. Be olsem we mi stanap long fored blong yufala tedei, mi save promesem yufala se, mi no stret evriwan, be stat long naet ia i go, mi no bin mekem wan samting we bae i holemtaet mi blong go long fored blong Lod wetem tras mo askem help blong Hem taem i gat nid from. Blong wan i stap klin inaf i wan faet long wol ia we yumi stap laef long hem,” hem i talem. “Be hem i wan faet we bae mi winim. Mi bin filim fingga we i poenem mia blong panisim mi wan taem long laef blong mi, mo mi no gat tingting blong filim hemia bakegen, sapos mi save mekem. Mo yes, mi save mekem evri samting we mi save mekem abaot hemia.”
Hem i endem testemoni blong hem mo i sidaon. Mi save luk hem yet. Mi save luk ples we mifala i bin stap long hem. Mi save tingbaot ples we i kwaet we i kwaet we i stap afta long toktok blong hem, from se evriwan insaed long rum i gat wan taem blong luklukgud insaed long sol blong hem i go dip moa, mo mekem wan moa strong promes blong laef folem ol strong toktok ia we Lod i givim we i talem se…
“yu mas letem klin fasin i flasem ol tingting blong yu oltaem; afta nao, tras blong yu bae i gro i kam strong long fored blong God; mo doktrin blong prishud bae i go insaed long sol blong yu sloslo, semmak olsem smol ren blong moning i foldaon long heven i kamdaon.
Se Tabu Spirit bae i fren blong yu oltaem, mo stik blong king blong yu, bae i wan stik blong king we i no save jenis, blong fasin we i stret mo gud, mo trutok” (luk long D&C 121:45–46; oli ademap italik).
Stap Glad long Spirit blong God
Ol yang fren blong mi we mi lavem yufala. Gat wan gudfala laef. Tingbaot bes samting, mo hop long bes samting, mo gat fet long fiuja. Yu gat wan gudfala laef long fored blong yu. Papa blong yu long Heven i lavem yu. Sapos yu bin mekem eni mistek, yu save sakem sin from, mo kasem fogivnes from semmak olsem yang man ia. Yu gat evri samting blong laef from, mo plan from, mo biliv long hem. Blong tingting blong yu i agri wetem ol memori blong yu taem yu stap yuwan, i letem yu blong filim Spirit blong God long wan wei we i blong yuwan nomo. Mi wantem yu blong stap glad long Spirit ia, blong yu filim tras ia long fored blong Lod oltaem. Mi prea se bae ol klin tingting blong yumi bae oli kipim ol aksen blong yumi oli klin gud tedei, mo tumoro, mo oltaem.