Kami Namulong kang Kristo
Nahingangha Ko sa Gugma nga Gitanyag ni Jesus Kanako
Ang tagsulat nagpuyo sa Siyudad sa Mexico, Mexico.
Usa ka Dominggo sa wala pa ang miting sa sakrament, ang bishop miduol nako ug mihangyo, “Mahimo ka bang mopanalangin sa sakrament” Miingon ko siyempre makahimo ko.
Gikuha nako akong hymnbook ug dayon nanghunaw sa akong kamot sa wala pa molingkod duol sa lamesa sa sakrament. Giablihan nako ang hymnbook, ug ang unang himno nga akong nakita mao ang “Ako Nahingangha, Nahibulong” (Mga Himno ug mga Awit sa mga Bata, nu. 22). Wala pa magsugod ang miting, busa akong gibasa ang una nga linya: “Ako nahingangha, nahibulong sa gugma.” Diha-diha dayon mibati ko og dakong paghigugma.
Sa miaging gabii nagbasa ko sa Biblia kabahin sa katapusang bahin sa kinabuhi ni Jesukristo—naglakip sa Katapusang Panihapon, sa Tanaman sa Getsemani, ug sa Iyang kamatayon ug Pagkabanhaw. Gihunahuna nako si Jesus nga gipasakitan, gilutos, ug gibugal-gibugalan sa mga sundalo. Gihunahuna usab nako si Jesus nga gibuhat ang Iyang pagsakripisyo sa pag-ula diha sa Tanaman sa Getsemani samtang ang Iyang mga disipulo nangatulog.
Nakaamgo ko nga hapit nako mopanalangin sa pan ug tubig nga nagpresentar sa Iyang lawas ug dugo. Ang sakrament makapahimo nato sa pagbag-o sa pakigsaad nga atong gihimo sa dihang kita gibunyagan, nga kanunay mohinumdom Kaniya, mosunod sa Iyang mga sugo, ug modala sa Iyang ngalan ngari kanato.
Sa dihang nagsugod na ang miting sa sakrament, naghunahuna gyud ko niining tanan. Natandog ko pag-ayo nga si Jesus nag-antus sa ingon kasakit ug katalagsaong paagi nga dili masabtan natong tanan. Nakahunahuna dayon ko nga Iyang gilahutay ang kasakit tungod sa Iyang gugma alang kanato—alang kanako.
Mibati ko nga gihigugma pag-ayo sa Ginoo nga dili nako kapugngan ang akong mga luha. Mibati ko nga dili ko angay sa gibuhat sa Manluluwas para kanako. Apan mibati usab ko nga hingpit ang Iyang gugma alang kanako. Ang usa ka higala andam nga ihalad iyang kinabuhi para sa iyang mga higala (tan-awa sa Juan 15:13). Sa dihang gikanta na ang himno sa sakrament, mibarug ko kauban ang laing brother sa pagsugod sa ordinansa.
Among giablihan ang nindot nga puting hapin sa lamesa nga mitabon sa pan. Sa dihang akong gikuptan ang pan, nasayud ko nga naa koy responsibilidad sa pagpikas-pikas sa pan isip kabahin sa ordinansa, apan nagduha-duha ko. Ang pan nagrepresentar sa lawas ni Kristo. Naghunahuna ko sa mga sundalo nga nagpasakit sa Ginoo, ug dili nako gusto nga pikas-pikason ang pan. Sa dihang akong gipikas-pikas ang unang piraso, gihunahuna nako ang kasakit ug makapaubos nga paagi sa pagtratar ni Jesus sa wala pa ang Iyang kamatayon—ang korona nga mga tunok, ang paglatus, ug ang pag-antus. Ang mga luha nagpadayon sa pagdagayday sa akong aping samtang akong giandam ang pan.
Dayon nakahunahuna ko nga kinahanglanon kining sakit ug makapaubos nga mga hitabo. Kabahin kini sa maulaong sakripisyo ni Jesukristo, ug nagsakripisyo Siya tungod sa Iyang gugma alang kanako ug kanatong tanan.
Misugod ko sa pagbati og talagsaong kalinaw ug kalipay. Gipikas-pikas nako ang pan sa mabinantayon ug hinay-hinay nga paagi, nasayud nga ang gikuptan sa akong kamot panalanginan ug pagabalaanon alang sa usa ka espesyal nga katuyoan ug mirepresentar sa usa ka butang nga bililhon, nindot, ug talagsaon kaayo. Mibati ko sa dakong responsibilidad sa pagbuhat niining ordinansa aron kadtong anaa sa miting makapabag-o sa pakigsaad sa Ginoo ug makadawat sa mga panalangin sa Pag-ula.
Sa dihang nahuman mi, akong nakita ang mga tray nga puno sa pinikas-pikas nga pan. Ang talan-awon nindot ug mahinuklugon. Gisulti sa akong kompanyon ang pag-ampo. Karon pa sukad akong klaro nga nasabtan ang hugpong sa pulong “nga sila unta mokaon agi og handumanan sa lawas sa imong Anak” (D&P 20:77).
Sa dihang miambit ko sa pan, gibati nako pag-usab ang gugma sa Manluluwas. Mibati ko nga giproteksyunan, napaubos, ug determinado nga buhaton unsa ang eksakto. Gusto nakong eksaminon ang akong kinabuhi ug mohinulsol sa tanang sayop nga akong nahimo.
Mapasalamaton ko ni Jesukristo sa Iyang gugma alang kanako. Mapasalamaton ko nga makadawat kita sa mga panalangin sa Iyang Pag-ula: mapasaylo sa atong mga sala ug adunay kahigayunan nga makabalik sa atong Langitnong Amahan.
Christ Mocked by a Soldier, ni Carl Heinrich Bloch © Hope Gallery