Mensahe sa Unang Kapangulohan
Pagpadali sa Buluhaton
Nakaamgo ba mo nga ang gipahiuli nga Simbahan 98 na ka tuig usa pa nakaangkon og 100 ka stake? Apan wala pa kaabut og 30 ka tuig human niini, ang Simbahan nakaorganisar sa ikaduhang 100 ka stake. Ug walo lang ka tuig human niana ang Simbahan aduna nay sobra sa 300 ka stake. Karon kita aduna nay sobra sa 3,000 ka lig-ong mga stake.
Nganong paspas man kaayo kining pagdaghan? Tungod ba kay mas nailhan na kita karon? Tungod ba kay nindot ang atong mga chapel?
Kining mga butanga importante, apan ang rason nga ang Simbahan nagtubo karon kay gisulti sa Ginoo nga kini motubo. Sa Doktrina ug mga Pakigsaad, Siya miingon, “Tan-awa, Ako modali sa akong buluhaton diha sa iyang angay nga panahon.”1
Kita, isip espiritu nga mga anak sa atong Langitnong Amahan, kita gipadala sa yuta niining panahona aron kita makaapil sa pagpadali niining dakong buhat.
Ang Ginoo, kutob sa akong nasayran, wala gayud nagpasabut nga ang Iyang buhat kutob ra sa mortal nga kinabuhi. Hinoon, ang Iyang buhat molukop sa kahangturan. Nagtuo ko nga Iyang gipadali Iyang buhat sa kalibutan sa espiritu. Nagtuo usab ko nga ang Ginoo, pinaagi sa Iyang mga sulugoon didto, nag-andam og daghang mga espiritu aron modawat sa ebanghelyo. Ang atong trabaho mao ang pagsiksik sa atong mga patay ug dayon moadto sa templo ug mopahigayon sa sagradong mga ordinansa nga makahatag sa samang oportunidad nato niadtong anaa sa pikas tabil.
Ang tanang buotan nga Santos sa Ulahing mga Adlaw sa espiritu sa kalibutan busy, miingon si Presidente Brigham Young (1801–77). “Unsa ang ilang gibuhat [didto]? Sila nagsangyaw, nagsangyaw sa tanang higayon, ug nag-andam og dalan alang kanato aron sa pagpadali sa atong buhat sa pagtukod og mga templo dinhi ug bisan asa.”2
Karon, ang buhat sa family history dili sayon. Kaninyo nga anaa sa Scandinavia, mibati ko sa inyong kasagmuyo. Sama pananglit, sa akong Swedish nga katigulangan, ang ngalan sa akong lolo Nels Monson; ang ngalan sa iyang amahan dili gyud Monson apan Mons Okeson. Ang ngalan sa amahan ni Mons kay Oke Pederson, ug ang ngalan sa iyang amahan Peter Monson—mibalik na usab sa Monson.
Ang Ginoo nagdahum nga kamo ug ako magkugi sa atong family history. Sa akong hunahuna ang una natong buhaton aron magkugi sa buhat mao ang pagbaton sa Espiritu sa atong Langitnong Amahan. Kon kita magkinabuhi nga matarung sama sa atong nahibaloan, Iyang andamon ang paagi aron matuman ang mga panalangin nga matinud-anon ug makugihon natong gitinguha.
Kita masayop, apan walay usa kanato mahimong eksperto sa buhat sa family history nga dili magsugod sa sinugdanan. Busa, kinahanglang magkugi gyud ta niining buhat, ug kita mangandam nga makasinati og pipila ka hagit. Dili kini sayon nga buhat, apan ang Ginoo misangon niini nganha kaninyo ug Iya kining gisangon ngari kanako.
Samtang magpadayon mo sa buhat sa family history, makasinati kamo og mga kalisud, ug moingon mo, “Wala na gyud koy mahimo.” Kon moabut mo niana nga punto, luhod ug pangamuyo sa Ginoo nga ipakita ang paagi, ug Iyang ipakita kaninyo ang paagi. Mopamatuod ko nga kini tinuod.
Nahigugma ang Langitnong Amahan sa Iyang mga anak diha sa kalibutan sa espiritu sama sa Iyang paghigugma ninyo ug kanako. Kabahin sa buhat sa pagluwas sa atong mga patay, si Propeta Joseph Smith miingon, “Ug karon kay ang mahinungdanong mga katuyoan sa Dios hapit na moabut sa ilang katumanan, ug ang mga butang nga gisulti sa mga Propeta nangatuman na, samtang ang gingharian sa Dios gitukod sa yuta, ug ang karaang pagkahan-ay sa mga butang napahiuli, ang Ginoo mipadayag kanato niini nga katungdanan ug pribelihiyo.”3
Kabahin sa atong katigulangan nga namatay nga wala masayud sa ebanghelyo, si Presidente Joseph F. Smith (1838–1918) mideklarar, “Pinaagi sa atong mga paningkamot alang kanila ang kadena nga migapos kanila matangtang, ug ang kangitngit nga naglibut kanila mahanaw, kana nga kahayag modan-ag kanila ug ilang madungog didto sa kalibutan sa espiritu nga ang buluhaton nabuhat na alang kanila pinaagi sa ilang mga anak dinhi, ug maglipay uban kaninyo tungod sa inyong pagpahigayon niining mga katungdanan.”4
Minilyon ang espiritu nga mga anak sa atong Langitnong Amahan nga wala makadungog sa ngalan ni Kristo sa wala pa mamatay ug miadto sa kalibutan sa espiritu. Apan karon sila gitudloan na sa ebanghelyo ug nagpaabut sa adlaw nga kamo ug ako makahimo sa gikinahanglang pagsiksik aron kita makaadto sa balay sa Ginoo ug mopahigayon sa buhat alang kanila nga dili gyud nila mabuhat nga sila-sila ra.
Akong mga kaigsoonan, mopamatuod ko nga ang Ginoo mopanalangin nato samtang kita modawat ug motubag niining hagit.
Pagtudlo Niini nga Mensahe
Hunahunaa ang inyong paborito nga istorya sa inyong family history ug ipakigbahin kini niadtong inyong bisitahan. Mahimo usab ninyong gamiton ang mga pangutana diha sa seksyon sa mga bata sa Mensahe sa Unang Kapangulohan (pahina 6) sa pag-awhag niadtong inyong gibisitahan sa pagpakigbahin sa ilang mga istorya. Ikonsiderar ang pagbasa sa Doktrina ug mga Pakigsaad 128:15 ug paghisgut sa kaimportante sa pagpahigayon sa mga ordinansa sa templo para sa atong katigulangan.
Paghulagway pinaagi ni Simone Shin