Pagpangita og Paagi sa Pagbalik ngadto sa Simbahan
Ang tagsulat nagpuyo sa California, USA.
Misulay ko sa pagpangita og mga tubag sa gawas sa ebanghelyo, apan ang bugtong nakong nakaplagan mao ang pagkahaw-ang.
Paghulagway sa litrato pinaagi ni Nathaniel Ray Edwards
Gipadako ako diha sa Ang Simbahan ni Jesukristo sa mga Santos sa Ulahing mga Adlaw, apan sa kolehiyo nakahukom ko nga ako wala na magkinahanglan sa Simbahan. Nagsugod ko og mabaw, hinakog nga pagpangita alang sa “kamatuoran” sa laing mga lugar. Wala makakita og mga tubag nga makahatag nako og kalinaw ug kalipay, nahulog ako sa lawom nga espirituhanong kangitngit. Gibati nako nga dili na gayud magmalipayon pa pag-usab.
Hinoon, makita gihapon nako nga mas malipayon ko sa dihang aktibo pa ko sa Simbahan. Nagsugod ko sa pag-apil sa mga kalihokan sa Simbahan, naglaum nga makakaplag og kaluwasan gikan sa depresyon nga nagkontrolar sa akong kinabuhi. Apan ang akong dili sinsero nga mga paningkamot wala kaayoy nahimo. Nag-focus ko sa akong pagtuon, naglaum nga makapawala kini sa kahaw-ang nga akong gibati. Temporaryo kining nakatabang, apan wala kini makahatag og tinuod nga tubag.
Human sa pagduha-duha ug nakaamgo nga wala koy padulngan, nakahukom ko nga moundang una sa pag-eskwela ug mobiyahe. Nakatigom kog gamay nga kwarta apan dili igo nga molungtad og dugay-dugay. Sa wala pa ko mobiya, nakahukom ko nga mopakita og tinuod nga hugot nga pagtuo ug mobayad sa ikapulo sa akong gamay nga tinigom. Dili kadto sayon. Layo ako sa amo, ug dili madugay mahutdan na ako og kwarta. Sa gihapon, naglaum ko nga dunay Dios, ug nasayud ko nga magkinahanglan ko sa Iyang tabang.
Misulat ko og tseke alang sa akong ikapulo, gipadala ngadto sa akong bishop, miimpake sa akong Basahon ni Mormon, ug milakaw. Hapit diha-diha dayon akong gibati ang kainit sa Espiritu. Nahingangha ko nga mibati nga ang akong pagduha-duha ug kasubo gipulihan og pagsabut ug paglaum. Gikan sa Idaho ngadto sa Washington, D.C., mga miyembro sa Simbahan mitabang nako ug, mas importante, mitabang sila nako nga makapalambo og hugot nga pagtuo ug matarung nga mga tinguha. Ingon og sama sa panimalay ang palibut nako.
Human sa makadiyot, nasayud ko nga pamub-an na lang nako ang akong pagbiyahe dili tungod sa kakulang sa kwarta apan tungod kay adunay mas maayo nga biyahe nga naghulat nako. Sa pagpauli, nakigkita ko sa akong bishop ug presidente sa stake. Uban sa ilang tabang, sa wala madugay nagserbisyo ko sa Ginoo isip usa ka misyonaryo.
Karon kada higayon nga ako mobayad sa akong ikapulo o makigkita sa mga lider sa Simbahan, makahinumdom ko sa “sinugdanan” sa akong tinuod nga pagkakabig. Sukad niadto nakasinati ko og mga maayo ug dili maayong panahon, apan ako naningkamot nga magpabilin nga lig-on sa espirituhanong paagi. Mapasalamaton ako kanunay sa pagdawat sa Langitnong Amahan sa akong gamay nga halad sa hugot nga pagtuo ug paglugway sa Iyang gugma ngari nako.