Pagkaginikan, Dili Magpalinga sa Elektronik nga mga Butang
Ang Manluluwas namulong sa pito ka simpleng mga pulong: “Tan-awa ang inyong gagmay nga mga bata.” Gitan-aw sa mga Nephite ang ilang mga bata. Ug ang sunod mao ang usa sa labing sagrado nga mga hitabo sa tanang kasulatan. (Tan-awa sa 3 Nephi 17:23–24.)
Una nakong nasinati ang “pagtan-aw” sa dihang bag-o pang natawo akong unang anak nga babaye. Ang iyang hinay, padayon nga paghilak nakatugaw nako sa mga tungang gabii, ug andam nako sa pagpakaon niya kon mahitabo kini. Iyang gibuka og maayo ang iyang mga mata ug diretsong mitutok sa akong mga mata sulod sa taas, bililhong mga higayon. Samtang siya ug ako tinuorayng “mitan-aw” sa usag usa sa unang higayon, akong nabati ang mahangturong relasyon namong duha.
Ang pagtuon sa neurobiology mimatuod sa kaimportante sa “pagtan-aw” sa ginikanan ug anak. Sumala sa usa ka neurobiologist nga si Dr. Allan N. Schore, ang dili verbal nga komunikasyon nga “pagtinan-away sa usag usa” mahinungdanon sa hustong paglambo sa hunahuna sa masuso.1 Sa umaabut nga katuigan, kini nga koneksyon magpabiling mahinungdanon sa paglambo sa hunahuna, kasingkasing, ug sa espiritu sa atong nagtubo nga mga anak.
Ang “pagtan-aw” dili paghatag og sagad, makasamok nga pasigpat. Kini kinasingkasing ug manggihunahunaong pag-amuma sa lain. Paghatag kini og naka-focus nga atensyon nga nagpasabut, “Nakakita ko nimo. Importante ka para nako.”
Para sa mga ginikanan karon, kini nga matang sa pagtan-aw nanginahanglan kanunay og displina nga dili malinga sa elektronik nga mga butang, usa ka tinuyo nga pagpili nga mopalayo sa atong mga screen ug i-off ang atong digital nga mga himan. Kini mahimong nagpasabut sa pagbuntog sa tintasyon nga tan-awon ang atong mga mensahe sa text o mag-scroll sa social media posts. Kini maglakip sa tinud-anayng pag-establisar og mga lagda sa media sa personal ug pamilya, paghimo og mga limitasyon nga moprotektar sa sagradong panahon nga atong igahin sa usag usa diha sa atong mga pamilya kada adlaw.
Pinaagi sa pagpaningkamot sa mas hingpit ug mas kanunay nga pagtan-aw sa atong gagmayng mga bata, atong maamuma ang bili sa atong mga anak, mapalambo ang atong relasyon sa usag usa, ug mas matagamtam nato kadtong sagradong mga higayon kon mo-focus gayud kita sa atong mga anak.
Paghulagway sa litrato pinaagi ni David Stoker