Alang sa Kalig-on sa mga Kabatan-onan
Ang Ikapulo Makahatag og Kalig-on sa Kaugalingon
Hukom karon sa pagbayad og matinuoron nga ikapulo. Ang pagbuhat sa ingon makatabang ninyo nga makat-on nga ang Ginoo motuman sa Iyang mga saad.
Paghulagway pinaagi ni Jim Madsen
Si Presidente Thomas S. Monson nagtudlo nga “ang matinuoron nga pagbayad sa ikapulo maghatag sa tawo og kalig-on sa kaugalingon ug pasalig sa pagsunod sa ubang mga kasugoan.”1 Palaran ako nga nakaangkon og pagpamatuod niini nga baruganan sa batan-on pa ako.
Sa dihang 14 anyos pa ko, nagsugod na ko sa pagtrabaho, nakasuweldo og 2 U.S. dolyares kada oras isip trabahante sa usa ka konstruksyon. Ang tseke sa akong unang semana miabut og 80 dolyares. Gusto nakong mopalit og eight-track tape stereo, nga mao ang kinabag-ohang teknolohiya sa musika nianang higayona. Ang full-function model nga akong gusto moabut og 320 dolyares. Madasigon akong nakigsulti ni Mama ug Papa sa akong tuyo nga mopalit og stereo human makatrabaho og upat ka mga semana.
Sobra sa Upat ka Semana
Ang akong mga ginikanan maalamong mitudlo, “Moabut og sobra sa upat ka semana aron makatigom og igong kwarta aron ipalit niana nga music player. Kinahanglan kang mopasalamat sa Dios sa Iyang daghang mga panalangin pinaagi sa pagbayad og 10 porsyento sa imong kinitaan isip ikapulo. Kinahanglan kang mobayad sa gobyerno og mga 10 porsyento sa buhis. Ug ikaw kinahanglang makat-on samtang batan-on pa sa pagsunod sa tambag sa mga propeta sa pag-andam og kwarta alang sa umaabot, lakip sa imong misyon; mosugyot mi sa paggahin og 30 porsyento sa imong kinitaan sa savings account.”
Ang akong linghod nga hunahuna daling mikalkulo nga kon akong buhaton ang gitudlo sa akong mga ginikanan, duna lang koy 40 dolyares kada semana nga magasto, nagpasabut nga kinahanglan kong motrabaho og dili moubos duha ka bulan aron mapalit ang akong gusto nga stereo. Akong nakita ang akong kaugalingon nga anaa sa kritikal nga punto sa paghimo og desisyon ang pag-angkon ba og materyal nga mga kabtangan ang akong prayoridad, o mosakripisyo ba ko sa pagbayad og ikapulo ug magtigum?
Bayri og Una ang Ikapulo
Ang Alang sa Kalig-on sa mga Kabatan-onan nagtambag: “Bayri kini [ikapulo] pag-una, bisan og kamo nagtuo nga kamo walay igong kwarta nga gamiton sa inyong ubang mga panginahanglan. Ang pagbuhat sa ingon makatabang kaninyo sa pagpalambo og pagtuo, pagbuntog sa pagkahakog, ug mas madawaton sa Espiritu.”2
Nakahukom ko sa edad nga 14 nga mobayad og matinuoron nga ikapulo sa nahibilin sa akong tibuok nakong kinabuhi. Determinado akong mosunod sa propeta sa pagtigom og kwarta alang sa akong misyon ug umaabut nga edukasyon. Kini nga kasinatian nakatudlo usab kanako sa pag-ila tali sa mga gusto ug mga panginahanglan. Gusto nako ang pinakabag-ong teknolohiya, apan wala ko magkinahanglan niini. Mao nga ako nakahukom sa pagpalit og mas baratohon nga modelo uban sa mas gamay nga mga function, ug maayo gihapon kini sa dihang mibiya ko sa akong misyon.
Mga Saad nga Natuman
Sa akong pagkat-on pinaagi sa pagbayad sa ikapulo nga ang Ginoo motuman sa Iyang mga saad, ang akong hugot nga pagtuo mas nagkalig-on ug mao usab ang akong tinguha sa pagtuman sa Iyang ubang mga kasugoan. Akong nakat-unan nga kon ako mohatag og ubay-ubay nga halad sa puasa, Iyang tubagon ang akong mga pag-ampo ug mogiya nako kanunay (tan-awa sa Isaias 58:6–11). Akong nakat-unan nga kon ako mobasa sa Basahon ni Mormon, Iyang ipadayag ang kamatuoran niini ngari kanako pinaagi sa gahum sa Espiritu Santo (tan-awa sa Moroni 10:4–5). Akong nakat-unan nga kon ako mosunod sa Pulong sa Kalaam, hatagan ko Niya og maayong panglawas, kaalam, ug kahibalo ug nga ako “makadagan ug dili maluya” (tan-awa sa D&P 89:18–21). Ug akong nakat-unan nga kon ako mosunod sa balaod sa kaputli, ang Espiritu Santo mahimo nakong kanunay nga kauban ug ang Manluluwas mohatag nako og pagsalig nga usa ka adlaw mobarug nga dili maulaw sa Iyang atubangan (tan-awa sa D&P 121:45–46).
Laing paagi nga ang pagbayad og ikapulo ug mga halad nakadugang og kalig-on sa akong kaugalingon mao ang pinaagi sa mga pakigsaad sa templo. Ang Alang sa Kalig-on sa mga Kabatan-onan nagtudlo, “Aron makasulod sa templo, kinahanglan kamo nga mahimong hingpit nga tigbayad sa ikapulo.”3 Kon ako mosulod sa balaan nga templo, akong bation ang presensya sa Dios ug ang Iyang gugma. Ako mopamatuod nga sa mga ordinansa sa templo, madawat nato ang “gahum gikan sa kahitas-an” (D&P 95:8) aron malipayong moatubang ug mobuntog sa mga hagit sa pagka-mortal.
Usa ka Panalangin nga Giandam
Ang pagbayad sa mga ikapulo ug mga halad nakapadugang sa akong pagtuo nga ang Ginoo motuman sa Iyang mga saad. Pinaagi ni propeta Malaquias, Siya mipahayag, “Dad-a ninyo ang tibuok ikapulo … kong dili ba buksan ko kaninyo ang mga tamboanan sa langit, ug bubuan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini” (Malaquias 3:10).
Sa akong tibuok kinabuhi, bisan panahon sa mga pagsulay sa panalapi sa sayong bahin sa akong kaminyoon, ang Dios kanunay moabli sa tamboanan sa langit aron ang among pamilya makadawat sa temporal nga mga kinahanglanon sa kinabuhi. Mopamatuod ko nga pinaagi sa pagsunod sa balaod sa ikapulo, ang inyong pagtuo mamahimong usa ka dakong tinubdan sa kalig-on sa inyong kinabuhi.
Akong dapiton ang kada batan-on—ug kada miyembro—sa pagpatalinghug ni Jesukristo ug sa Iyang mga propeta pinaagi sa pagbayad og hingpit nga ikapulo ug ubay-ubay nga halad sa puasa sa inyong tibuok kinabuhi. Mosaad ko nga ang Ginoo molig-on ninyo ug mopauswag ninyo sa pagtuman sa inyong matarung nga mga tinguha sumala sa Iyang balaan nga mga katuyoan.