AngGahum sa Priesthood Anaa para sa Tanan

Ni Linda K. Burton

Kinatibuk-ang Presidente sa Relief Society

Ang awtoridad sa priesthood gitugyan pinaagi sa ordinasyon, apan ang gahum sa priesthood anaa para sa tanan. Ang pagkamatarung mao ang makapahimo natong tanan sa pagdapit sa gahum sa priesthood sa atong kinabuhi.

Atong pribilehiyo nga mopuyo niining panahon sa kasaysayan sa Simbahan diin may mga pangutana kabahin sa priesthood. Adunay dakong interes ug tinguha nga mas masayran ug masabtan ang awtoridad, gahum, ug mga panalangin nga may kalabutan sa priesthood sa Dios. Akong panghinaut nga ang doktrina sa priesthood “motuhop diha sa [atong kalag] ingon sa mga yamog nga gikan sa langit” (D&P 121:45; empasis gidugang). Mopamatuod ko nga gipaspasan sa Ginoo ang Iyang buhat, ug mahinungdanon nga kita makasabut kon sa unsang paagi buhaton sa Ginoo ang Iyang buhat aron kita makadawat sa gahum nga moabut kon kita nahisubay sa Iyang plano ug mga katuyoan.

Ang Ginoo kanunay nagtuman sa Iyang buhat, nga mao ang “pagpahinabo sa pagka-imortal ug kinabuhi nga dayon sa tawo” (Moises 1:39), pinaagi sa gahum sa Iyang priesthood. Pinaagi niini ang kalangitan ug yuta gilalang. Pinaagi sa mga ordinansa sa priesthood, ang mga epekto sa Pagkalaglag mabuntog tungod sa Pag-ula ni Jesukristo. Tungod ang awtoridad sa priesthood gisalig ngadto sa tawo sa pagpanalangin sa mga anak sa Langitnong Amahan, gusto Niya nga gamiton ang gahum sa priesthood diha sa atong mga panimalay sa pagpanalangin ug paglig-on sa atong mga pamilya ug indibidwal nga kinabuhi.

Sa 2013 nga tibuok kalibutan nga pagbansay sa pagpangulo, si Elder Dallin H. Oaks sa Korum sa Napulog Duha ka mga Apostoles kusganong namahayag: “Ang mga lalaki dili mao ang priesthood!”¹ Alang kanako, kini pasidaan ingon man imbitasyon nga kitang tanan magtuon, mamalandong, ug mas makasabut sa priesthood. Kon adunay usa ka tawo, sama pananglit bata o higala kinsa sakop sa laing tinuohan, mangutana ninyo sa mosunod, makatubag kaha mo?

Unsa ang priesthood?
Nganong importante ang priesthood?
Unsa ang mga yawe sa priesthood?
Kinsa ang naghupot sa mga yawe sa priesthood?

Unsa ang priesthood?

Ang priesthood mao ang mahangturong gahum ug awtoridad sa Dios diin Siya mopanalangin, motubos, ug mobayaw sa Iyang mga anak. Si Elder David A. Bednar sa Korum sa Napulog Duha ka mga Apostoles mipasabut sa priesthood niining paagi: “Ang priesthood mao ang paagi diin ang Ginoo molihok pinaagi sa kalalakin-an aron sa pagluwas sa mga kalag. … Ang naghupot sa priesthood gilauman nga mogamit niining sagrado nga awtoridad sumala sa balaang hunahuna, kabubut-on, ug mga katuyoan sa Dios. Walay butang kalabut sa priesthood nga nakasentro sa kaugalingon. Ang priesthood kanunayng gigamit sa pagserbisyo, pagpanalangin, ug sa pagpalig-on sa ubang mga tawo.”²

Samtang akong gitun-an, gipamalandungan, ug gitinguha nga masabtan ang priesthood, nakatabang nako sa pagkonsiderar kon unsa kaha ang kalibutan kon wala kini. Si Elder Robert D. Hales sa Korum sa Napulog Duha ka mga Apostoles mipasabut niining ideya sa dihang siya miingon: “Inyo bang mahunahuna kon unsa kangitngit ug kakawang ang mortalidad kon walay priesthood? Kon ang gahum sa priesthood wala dinhi sa kalibutan, ang kaaway adunay kagawasan sa paglakaw-lakaw ug paghari nga walay pagpugong. Walay gasa sa Espiritu Santo nga mogiya ug mopanalangin kanato; walay propeta nga mamulong sa ngalan sa Ginoo; walay mga templo diin kita mohimo og sagrado, mahangturong mga pakigsaad; walay awtoridad sa pagpanalangin o pagbunyag, sa pag-ayo o paghupay. … Walay kahayag, walay paglaum—kangitngit lang.”³

Makapasubo ang paghunahuna kon wala ang gahum sa priesthood. Ako, mismo, mobarug ug nagmaya nga kining sagradong gahum napahiuli sa yuta pinaagi sa usa ka propeta sa Dios niining katapusan ug mahimayaong dispensasyon sa kahingpitan sa panahon!

Si Elder Oaks mipasidaan kanato, hinoon, sa atong paghisgot sa priesthood: “Usahay ang mga naghupot sa priesthood atong gipasabut nga ‘ang priesthood,’ dili nato angay nga kalimtan nga ang priesthood wala gipanag-iya o gipresentar niadtong naghupot niini. Kini gihuptan nga may sagradong pagsalig nga gamiton sa ikaayo sa mga lalaki, mga babaye, ug sa mga bata.”⁴

Nganong importante kaayo ang priesthood?

Kita nasayud nga “ang balaan nga plano sa kalipay makahimo sa mga relasyon sa pamilya nga magpadayon human sa kamatayon. Sagrado nga mga ordinansa ug mga pakigsaad nga anaa sa balaan nga mga templo makapahimo alang sa tagsa-tagsa sa pagbalik ngadto sa atubangan sa Dios ug alang sa mga pamilya nga magkahiusa sa kahangturan.⁵ Sama sa gitudlo ni Elder Russell M. Nelson sa Korum sa Napulog Duha ka mga Apostoles, “Ang katungod sa Priesthood gipahiuli aron ang mga pamilya mabugkos sa kahangturan.”⁶

“Ang awtoridad sa Priesthood gikinahanglan sa pagpahigayon sa mga ordinansa sa ebanghelyo. … Ang matag ordinansa nagbukas sa oportunidad sa daghang espirituhanong mga panalangin.”⁷ Gitugyan ni Jesus ang sagradong mga yawe sa gingharian ngadto kang Pedro uban sa mando nga “unsay imong pagabugkoson dinhi sa yuta, didto sa langit pagailhon kini nga binugkos: Ug bisan unsay imong pagaluagan dinhi sa yuta, didto sa langit pagailhon kini nga linuagan” (Mateo 16:19).

Unsa ang mga yawe sa priesthood?

Usa ka simpleng pagpasabut sa mga yawe sa priesthood makita sa Mayo 2012 nga New Era:

“Gamit ang mga yawe, daghan kaayo mo og mahimo nga dili gyud unta ninyo mahimo kon wala ni—pagsulod sa mga building, pagdrayb og mga sakyanan, pag-abli sa mga trunk, ang pipila lang niini. Ang mga yawe, sa yanong pagkasulti, nagpasabut sa awtoridad ug pagtugot [access].

“Sama usab sa mga yawe sa priesthood. Kini nagkontrolar sa pag-angkon sa mga panalangin ug mga ordinansa sa priesthood. … Ang mga yawe sa priesthood mao ang katungod sa pagdumala ug paggiya sa Simbahan. … Ang mga yawe kasagaran magamit sa hiyograpikanhong dapit, sama sa ward, stake, o misyon. Kini kasagaran naglakip usab sa awtoridad sa partikular nga mga ordinansa ug mga kalihokan (sama pananglit, bunyag, sakrament, misyonaryo nga buhat, ug buhat sa templo).”⁸

Kinsa ang naghupot sa mga yawe sa priesthood?

“Si Jesukristo naghupot sa tanang mga yawe sa priesthood kabahin sa Iyang Simbahan. Iyang gitugyan ang tanang mga yawe sa gingharian sa Dios dinhi sa yuta ngadto sa Iyang mga Apostoles. Ang senior nga buhi nga Apostol, ang Presidente sa Simbahan, mao lang ang bugtong tawo dinhi sa yuta nga gitugutan sa paggamit sa tanang mga yawe sa priesthood (tan-awa sa D&P 107:91–92). … [Iya dayong] i-delegar ang mga yawe sa priesthood ngadto sa ubang mga lider sa priesthood aron sila makadumala sa dapit diin sila may responsibilidad. … Ang mga presidente sa auxiliary ug ilang mga magtatambag dili makadawat og mga yawe. Sila nakadawat sa gidelegar nga katungod aron sa pagbuhat sa ilang mga calling.”⁹

Hinoon, adunay kalainan tali sa awtoridad sa priesthood ug gahum sa priesthood. Ang awtoridad sa priesthood gitugyan pinaagi sa ordinasyon, apan ang gahum sa priesthood anaa para sa tanan. Tungod ang gahum sa priesthood mao ang atong gitinguha nga maanaa sa atong mga pamilya ug panimalay, unsay angay natong buhaton aron maangkon kana nga gahum sa atong kinabuhi? Ang personal nga pagkamatarung importante aron maangkon ang gahum sa priesthood.

Pagsabut sa Doktrina sa Priesthood

Una, tinguhaa nga mahimong takus sa gasa sa Espiritu Santo. Tungod ang doktrina sa priesthood labing masabtan pinaagi sa pagpadayag, mahinungdanon ang tabang sa Espiritu Santo aron mapadayag ug motuhop ang doktrina diha sa atong kalag.

Ikaduha, adto sa balaang templo. Kita nasayud nga ang mga templo mao ang “labing balaan sa tanan nga mga dapit sa pagsimba”¹⁰ ug mao ang pinakanindot nga dapit sa pagkat-on kabahin sa priesthood pinaagi sa espiritu sa pagpadayag.

Ikatulo, basaha ang mga kasulatan. Ang pagsiksik, pagpamalandong, ug pagtuon sa kasulatan mao ang pamaagi aron pagdapit sa Espiritu Santo sa pagpadayag kanato sa importanting mga kamatuoran kabahin sa priesthood. I-rekomendar nako ang mosunod para sa inyong mabinantayon ug mainampuong konsiderasyon: Ang mga seksyon 13, 20, 84, 107, ug 121 sa Doktrina ug mga Pakigsaad, ug Alma 13. Dayon dapiton ko kamo sa pagmemorya sa panumpa ug pakigsaad sa priesthood, nga makita sa Doktrina ug mga Pakigsaad 84:33–44. Sa pagbuhat niini, mosaad ko nga ang Espiritu Santo mopalapad sa inyong pagsabut sa priesthood ug modasig ug mobayaw kaninyo sa talagsaong paagi.

Dapiton ko usab kamo sa pagpamalandong sa Doktrina ug mga Pakigsaad 121:34–46 ug pangutan-a inyong kaugalingon:

Ang akong kasingkasing nagtinguha ba sa kalibutanong mga butang?
Nagtinguha ba ko sa pasidungog sa mga tawo?
Gililong ba nako ang akong mga sala?
Mapagarbuhon ba ko?
Gikontrolar o gidominar o gipugos ba nako akong mga anak, kapikas, o ang uban?
Naningkamot ba ko sa pagsunod sa mga matarung nga baruganan sama sa pagdani, kaaghup, pagkamainantuson, pagkamabination, kalumo, tiunay nga paghigugma (pasabut tinud-anay o kinasingkasing nga gugma)?
Ang mga hiyas ba walay hunong nga midayan-dayan sa akong hunahuna?
Nagtinguha ba ko nga ang Espiritu Santo mahimo nakong kauban kanunay?

Ang mga pulong nga pagdani, kaaghup, pagkamainantuson, pagkamabination, kalumo, ug tiunay nga paghigugma adunay bag-o ug personal kaayo nga kahulugan kanako kon akong mahinumduman ang panalangin nga akong gihangyo sa akong amahan mga tuig na ang milabay.

Sa dihang young single adult pa ko, nanlimbasug ko og lisud kaayo nga desisyon. Sama sa akong gibuhat sa daghang higayon, miduol ko sa akong amahan ug mihangyo og panalangin sa amahan. Nagdahum nga iyang himoon akong hangyo diha-diha dayon, nasurprisa ko sa dihang mitubag siya, “Nanginahanglan ko og panahon aron makaandam sa paghatag nimo niining panalangin. Ok ra ba nimo nga magpaabut og pipila ka adlaw?”

Makapainteres, 40 ka tuig ang milabay, nakalimtan nako ang gisulti nga panalangin sa akong amahan, apan dili gyud nako makalimtan ang balaang pagtahud sa akong amahan ngadto sa balaang priesthood samtang siya nangandam sa espirituhanong paagi sa pagsulti og panalangin sa amahan ibabaw sa akong ulo. Iyang nasabtan ang mga baruganan nga gitudlo diha sa Doktrina ug mga Pakigsaad 121 ug determinadto sa pagsunod niini aron mahimong takus sa gahum sa priesthood sa pagpanalangin sa iyang pamilya.

Mga Pulong sa Buhing mga Propeta

Akong pribilehiyo nga makatrabaho uban sa dinasig nga mga propeta, manalagna, ug tigpadayag hapit kada adlaw. Kon gusto gyud nato nga masayud sa doktrina sa priesthood, kita adunay masaligan ug hinatag sa Dios nga buhing kapanguhaan: mga propeta, manalagna, ug mga tigpadayag. Mopamatuod ko nga sila mga tawo sa Dios nga naghupot sa gahum sa priesthood pinaagi sa personal nga pagkamatarung.

Sa bag-ohay nga kinatibuk-ang komperensya, si Elder M. Russell Ballard sa Korum sa Napulog Duha ka mga Apostoles mitudlo: “Sa plano sa atong Langitnong Amahan nga naghatag og gahum sa priesthood, ang kalalakin-an dunay responsibilidad sa pagpangalagad sa priesthood, apan dili sila ang priesthood. Ang kalalakin-an ug kababayen-an dunay lainlain apan parehas nga bililhong tahas. Ingon nga ang babaye dili magsabak kon wala ang lalaki, ang lalaki dili hingpit nga makagamit sa gahum sa priesthood sa pagtukod og mahangturong pamilya kon wala ang babaye. Sa laing pagkasulti, sa mahangturong panglantaw, ang gahum sa pagpasanay ug ang gahum sa priesthood pagaambitan sa bana ug asawa.”¹¹

Nakat-unan nako nga ang moral nga impluwensya sa babaye usa ka gasa nga nahiuyon sa gahum sa priesthood. Namulong sa kababayen-an sa Simbahan, si Presidente Howard W. Hunter (1907–95) miawhag, “Kami mohangyo kaninyo sa pagpangalagad uban sa gamhanan ninyong impluwensya alang sa kaayohan sa paglig-on sa atong mga pamilya, sa atong simbahan, ug sa atong komunidad.”¹² Sa bag-ohay nga kinatibuk-ang komperensya, si Elder D. Todd Christofferson sa Korum sa Napulog Duha ka mga Apostoles miingon ngadto sa kababayen-an, “Single ka man o minyo, duna man kamoy anak o wala, tigulang ka man o batan-on o sa tunga-tunga, ang moral ninyong katungod importante.”¹³

Susama usab, si Elder Ballard namulong, “Walay ania niini nga kalibutan nga ingon ka personal, ingon ka maalimahon, o makapausab sa kinabuhi sama sa impluwensya sa usa ka matarung nga babaye.”¹⁴

Akong gihisgutan ang pipila sa mga pangutana nga may kalabutan sa balaang priesthood sa Dios, apan adunay uban nga wala pa.

Sunod Una, Dayon Sabta

Tapuson nako uban sa usa ka kasinatian nga nakatabang nako sa pagsagubang sa mga pagutana nga wala matubag. Mga pipila ka tuig ang milabay, ang akong bana ug ako gidapit sa panagpundok sa daghang sinati na nga mga lider sa Simbahan. Bag-o nga presiding officer ang bag-ohay lang gitawag, ug sa hapit na mahuman ang miting may nangutana og lisud ug makapabikil nga pangutana. Nakaamgo sa kalisud sa pangutana, ang akong bana ug ako diha-diha dayon kinasingkasing nga nag-ampo sa Langitnong Amahan para niining bag-ong lider. Sa iyang pagduol sa pulpito aron pagtubag sa pangutana, nakasaksi ko og kausaban sa iyang panagway samtang siya nagbarug nga may dignidad, mapasaligon ug namulong uban sa gahum sa Ginoo.

Ang iyang tubag sama niini: “Brother, wala ko masayud sa tubag sa imong pangutana. Apan sultian ko ikaw sa akong nasayran. Nasayud ko nga ang Dios mao ang atong Amahan sa Kahangturan. Nasayud ko nga si Jesukristo mao ang Manluluwas ug Manunubos sa kalibutan. Nasayud ko nga nakita ni Joseph Smith ang Dios Amahan ug Iyang Bugtong Anak, si Jesukristo, ug nahimong instrumento nga ang gahum sa priesthood napahiuli sa yuta. Nasayud ko nga ang Basahon ni Mormon tinuod ug naglangkob sa kahingpitan sa ebanghelyo ni Jesukristo. Nasayud ko nga kita adunay buhing propeta karon kinsa namulong alang sa Ginoo sa pagpanalangin sa atong kinabuhi. Wala ko masayud sa tubag sa imong pangutna, apan kining mga butanga maoy akong nasayran. Ang uban akong gidawat nga may hugot nga pagtuo. Naningkamot ko sa pagpakabuhi niining yanong pahayag sa hugot nga pagtuo nga akong nakat-unan dugay na gikan ni Marjorie Hinckley, asawa ni Presidente Gordon B. Hinckley, kinsa miingon, ‘Sundon una nako, dayon akong masabtan.’”

Ang priesthood sa Dios usa ka sagradong pagsalig nga gihatag sa pagpanalangin sa kalalakin-an, kababayen-an, ug kabataan aron kita makabalik isip pamilya aron mahangturong magpuyo diha sa presensya sa Dios. Ang pagkamatarung mao ang makapahimo natong tanan sa pagdapit sa gahum sa priesthood sa atong kinabuhi. Unta kining doktrina motuhop sa atong mga kalag ug makapaduol nato Kaniya kansang Simbahan ug gahum ug awtoridad sa priesthood mao kini.

Mga paghulagway sa litrato pinaagi ni Jerry Garns, gawas kon gipahibalo; sa tuo: paghulagway sa litrato pinaagi ni cody bell

sa tuo: gilitratohan ni Dan Carter

paghulagway sa litrato pinaagi ni cody bell