Ang Panawagan nga Mahimong Sama ni Kristo
Gikan sa pakigpulong sa debosyonal sa CES, “Israel, Israel, God Is Calling,” nga gipamulong sa Dixie State University sa St. George, Utah, niadtong Septyembre 9, 2012. Alang sa kompletong pakigpulong, adto sa lds.org/broadcasts.
Ang Dios nanawagan sa Israel niining ulahing mga adlaw nga mahimong mas sama ni Kristo ug mahimong mas balaan kaysa unsa kita karon sa atong determinasyon sa pagpuyo sa ebanghelyo ug sa pag-establisar sa Zion.
Sa kasaysayan sa Israel gikan pa sa sinugdanan, kon nagkagrabe ang sala o ang katilingban nahimong kalibutanon o ang kinabuhi uban sa mga Hentil nagsugod sa pagpaubos sa sumbanan sa moral ug sa kasugoan nga gihatag sa Dios, ang mga anak sa pakigsaad pabalhinon ngadto sa kamingawan aron sa pagsugod ug pag-establisar og usab sa Zion.
Sa panahon sa Daang Tugon, si Abraham, ang amahan sa pakigsaad, kinahanglan mohawa sa Caldea—Babelonia sa literal—sa iyang tinguha alang sa mapahinunguron nga kinabuhi sa Canaan, nga karon atong gitawag og Balaan nga Yuta (tan-awa sa Abraham 2:3–4). Apan pipila lang ka henerasyon ang milabay sa dihang ang kaliwat ni Abraham nawala sa Zion ug nahimong ulipon sa layo nga dapit, sa paganong Ehipto (tan-awa sa Exodo 1:7–14). Busa kinahanglang maanaa si Moises aron sa paggiya sa mga anak sa pakigsaad balik ngadto sa kamingawan.
Pipila lang ka siglo ang milabay, usa ka istorya nga may espesyal nga interes kanato ang nahitabo sa dihang usa niadtong Israelite nga pamilya, nga gipangulohan sa propeta nga ginganlan og Lehi, gimandoan nga mopahawa sa Jerusalem tungod kay hapit na kining buntugon sa Babelon! (Tan-awa sa 1 Nephi 2:2.) Wala sila masayud nga sila padulong sa usa ka bag-ong kontinente aron mag-establisar og bag-ong konsepto sa Zion (tan-awa sa 1 Nephi 18:22–24). Ug wala pud sila masayud nga sama nga pagpanghawa nahitabo na sa usa ka grupo sa ilang katigulangan nga mao ang mga Jaredite (tan-awa sa Ether 6:5–13).
Makapainteres sa tanang nagtuo sa Pagpahiuli sa ebanghelyo nga ang pagkolonya sa Amerika nagsugod sa usa ka grupo nga mipahawa sa ilang yutang natawhan aron makasimba sumala sa ilang gusto. Usa ka inila nga eskolar kabahin sa pagpanimuyo sa Puritan sa Amerika mihulagway niining kasinatian sa Kristyanismo nga “misyon ngadto sa kamingawan”—ang paningkamot sa modernong mga Israelite nga mahimong gawasnon sa pagkawalay dios sa Daang Kalibutan ug sa makausa pa magtinguha sa mga pamaagi sa langit diha sa bag-ong yuta.1
Pahinumduman ko kamo sa usa ka paghawa. Kini mismo ang sa atong Simbahan, giniyahan sa atong mga propeta, gigiyahan sa ato mismong mga relihiyusong katigulangan. Si Joseph Smith gilutos diha sa mga estado sa New York, Pennsylvania, Ohio, ug Missouri, ug sa katapusan gipatay diha sa Illinois, atong makita pag-usab niining ulahing mga adlaw ang pagpahawa sa mga anak sa Israel nga nangita og dapit nga kadangpan. Si Presidente Brigham Young (1801–77), ang Amerikanong Moises, nga maoy halandong tawag kaniya, migiya sa mga Santos ngadto sa mga walog sa kabukiran samtang kining gipangkapoy sa paglakaw nga mga Santos nanganta og:
Ang Zion. Ang yuta nga saad. Ang Bag-ong Jerusalem. Sobra sa 4,000 ka tuig sa kasaysayan sa pagpakigsaad, kini mao ang sundanan: Mopahawa ug mangita. Modagan ug mopuyo. Moeskapo sa Babelon. Motukod sa pangprotektar nga mga bong-bong sa Zion.
Hangtud karon, atong panahon.
Tukura ang Zion Kon Asa Mo
Usa sa daghang talagsaon nga deskripsyon sa atong dispensasyon mao ang nag-usab-usab nga matang kon giunsa nato pag-establisar ang gingharian sa Dios dinhi sa yuta. Kini nga dispensasyon mao ang panahon sa dakong epekto, gipadali nga kausaban. Ug usa sa nausab mao ang Simbahan sa Dios dili na gayud mohawa. Dili na gayud kini mohawa sa Ur aron mohawa sa Haran aron mohawa sa Canaan aron mohawa sa Jerusalem aron mohawa sa England aron mohawa sa Kirtland aron mohawa sa Nauvoo aron moadto sa kon asa wala masayri.
Dili na, sama sa giingon ni Brigham Young para kanatong tanan, “Kita sunod-sunod nga gipugos sa pagpahawa ug misinati og sunod-sunod nga mga kalisud, apan ania na kita dinhi ug dinhi kita magpabilin.”3
Siyempre, kana nga pahayag nahimong pahayag sa mga miyembro sa Simbahan sa tibuok kalibutan. Niining ulahing mga adlaw, sa atong dispensasyon, kita igo nang milambo isip Simbahan aron mohunong na sa paghawa. Kita igo nang milambo aron lig-ong magpabilin atong kaugalingon ug atong mga pamilya ug atong mga pundasyon sa matag kanasuran, kaliwatan, pinulongan, ug katawhan sa permanenteng paagi. Ang Zion anaa bisan asa—kon asa adunay Simbahan. Ug tungod niana nga kausaban, dili na nato hunahunaon ang Zion isip asa kita mopuyo; ato kining hunahunaon isip unsaon nato pagpakabuhi.
Sa pagpasabut niining bag-ong buluhaton, maghisgot ko og tulo ka hitabo.
Tulo ka Hitabo ug Tulo ka Leksyon
1. Mga pipila ka tuig ang milabay usa nako ka batan-ong higala—usa ka returned missionary—naapil sa usa sa mga college basketball team sa Utah. Siya talagsaon ug maayong modula og basketball, apan wala siya makadula og daghan sama sa iyang gilauman. Ang iyang pihong mga talento ug kahanas wala mohaum sa panginahanglan sa iyang team nianang higayuna. Kana mahitabo sa sport. Busa, uban sa hingpit nga suporta ug pinakamaayong panghinaut sa iyang mga coach ug kaubanan, ang akong higala mibalhin og laing eskwelahan, diin siya naglaum nga mas makatampo.
Maayo ang nanghitabo sa bag-ong eskwelahan, ug ang akong higala nahimong starter. Ug kini ang sunod nga nahitabo—ang eskedyul sa pagdula sa iyang team mao ang pagdula batok sa iyang kanhing team sa Siyudad sa Salt Lake.
Ang pait nga pag-abuso nga nahitabo nianang gabhiona niining batan-ong lalaki—bag-ong gikasal nga mibayad sa iyang ikapulo, nagserbisyo sa elders quorum, maloloy-ong nagserbisyo sa mga batan-on sa iyang komunidad, ug naghinam-hinam sa umaabut nga anak nila sa iyang asawa—dili gyud unta angay nga masinati ni bisan kinsang tawo sa bisan asang dapit, bisan unsang panahon, bisan unsa iyang sport o unibersidad o unsa man ang iyang personal nga desisyon kabahin niini.
Ang coach niini nga visiting team, kinsa eksperto kaayo niini nga propesyon, miduol kaniya human sa nindot kaayong dula ug miingon: “Unsay nahitabo dinhi? Ikaw kadtong lumad nga batang lalaki kinsa nagmalampuson. Sila imong mga kaubanan. Sila imong mga higala.” Apan pinakabati sa tanan, siya dayon miingon uban sa dakong kalibog, “Dili ba kadaghanan niining mga tawo miyembro sa inyong simbahan?”
2. Gidapit ko nga mamulong sa usa ka debosyonal sa single-adult sa stake. Sa akong pagsulod sa likod nga pultahan sa stake center, usa ka babaye nga tingali mga 30 anyos misulod sa building sa halos sama nga higayon. Bisan pa sa daghang mga tawo nga nanulod sa chapel, mamatikdan gihapon siya. Siya adunay duha ka tattoo, lain-laing mga ariyos sa dunggan ug ilong, pinatuyom iyang buhok nga gikoloran og nagkadaiyang matang sa kolor, sayal ug blouse nga mubo kaayo.
Nakahunahuna ko og pipila ka pangutana: Kini ba nga babaye dili miyembro nga nanlimbasug, kinsa naggiyahan—o mas maayo gani, gidala sa usa ka tawo—niining debosyonal ubos sa paggiya sa Ginoo aron pagtabang kaniya nga makakaplag og kalinaw ug direksyon sa ebanghelyo nga gikinahanglan sa iyang kinabuhi? O miyembro na ba siya kinsa wala magsunod sa mga gilauman ug sumbanan nga giawhag sa Simbahan nga sundon sa mga miyembro niini apan siya dili kaayo aktibo ug mipili nga motambong sa kalihokan sa Simbahan niadtong gabhiona?
3. Samtang miapil sa pagpahinungod sa Kansas City Missouri Temple, si Sister Holland ug ako gipapuyo sa balay ni Brother Isaac Freestone, usa ka pulis ug high priest sa Liberty Missouri Stake. Sa among panag-istoryahanay siya miingon namo nga sa usa ka lawom nga gabii siya gitawag sa pag-imbestigar sa usa ka reklamo sa delikadong bahin sa siyudad. Taliwala sa hilabihang kakusog nga mga kanta ug sa baho sa marijuana diha sa kahanginan, nakakita siya og usa ka babaye ug pipila ka lalaki nga nag-inom ug namalikas, silang tanan klarong wala magtagad sa lima ka gagmayng mga bata—mga duha ngadto sa otso anyos ang panuigon—nagpundok sa usa ka kwarto, naningkamot nga makatulog sa hugaw nga salog nga walay higdaanan, walay kutson, walay unlan, walay bisan unsa.
Gitan-aw ni Brother Freestone ang mga kabinet sa kusina ug ang refrigerator sa pagsusi kon aduna bay lata o kahon sa pagkaon—apan wala siyay nakit-an. Siya miingon nga ang iro nga namaghot sa nataran sa luyo mas adunay pagkaon kaysa niadtong mga bataa.
Sa kwarto sa inahan nakakita siya og kutson nga walay hapin, mao ra ning usa sa balay. Nangita siya og maayo hangtud nakakita siya pipila ka hapin sa kutson, gihapinan ang kutson, ug gipakatulog ang lima ka bata sa hinimo-himong higdaanan. Dayon, nakahilak siya, siya miluhod, nag-ampo sa Langitnong Amahan alang sa ilang proteksyon, ug miingon good night.
Sa iyang pagbarug ug paglakaw padulong sa pultahan, usa sa mga bata ang mibangon sa higdaanan, midagan padulong niya, mikupot sa iyang kamot, ug mihangyo, “Mahimo ba palihug sagupa ko?” Mas nakahilak siya, gibalik ni Brother Freestone ang bata sa higdaanan, giadto ang bangog nga inahan (ang mga lalaki misibat na), ug giingnan niya: “Mobalik ko ugma, ug kinahanglang adunay klarong kausaban nga mahitabo niining balaya inig sulod nako niining pultahan. Ug aduna pay daghang kausaban human ana. Ako nang saad nimo.”4
Unsay komon niining tulo ka hitabo? Kini naghatag og tulo ka gagmay, lain-laing panig-ingnan sa tinuod nga mga panghitabo sa Babelon—ang usa walay hinungdan nga bati nga batasan sa dula sa basketball, ang usa mas kabahin sa kultura ug nagpasabut sa indibidwal nga mga hagit niadtong nagpuyo nga lahi kay kanato, ug ang usa dako ug seryuso kaayo nga butang.
Leksyon 1: Ayaw Kalimti ang mga Baruganan sa Inyong Tinuohan
Una, atong humanon ang nahitabo sa basketball. Pagkasunod adlaw human sa dula, sa dihang adunay reaksyon gikan sa publiko ug demanda nga mangayo og pasaylo tungod sa hitabo, usa ka batan-ong lalaki miingon: “Paminaw. Naghisgut ta og baskeball dinhi, dili Sunday School. Kon dili ka kaagwanta sa bugal-bugal, nan ayaw na pagdula. Mahal among gibayad para makatan-aw niining mga dulaa. Buhaton namo unsay among gusto. Kalimtan usa namo ang among mga sumbanan sa tinuohan.”
“Kalimtan usa namo ang among mga sumbanan sa tinuohan”? Numero unong leksyon sa pag-establisar sa Zion niining ika-21 nga siglo: Ayaw gayud kalimti ang mga sumbanan sa inyong tinuohan.
Kana nga matang sa pagkadisipulo dili mahimo—dili gyud gani na pagkadisipulo. Sama sa gitudlo ni propetang Alma, kita “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga [kita] mahimo nga maanaa” (Mosiah 18:9)—dili lang sa pipila ka higayon, sa pipila lang ka dapit, o kon ang atong team makadaug.
Bisan unsa pa ang sitwasyon o makapalagot o problema, ang tinuod nga disipulo ni Kristo dili makalimot sa mga sumbanan sa iyang tinuohan.
Lesson 2: Magmanggiloy-on apan Magmatinud-anon sa mga Kasugoan
Kana nagdala kanako sa paghisgut sa batan-ong babaye diha sa debosyonal. Bisan unsaon siya sa pagtratar sa uban, ang mahangturong lagda mao nga ang atong batasan kinahanglang mopakita sa atong relihiyusong pagtuo ug atong mga pasalig sa ebanghelyo. Busa, kon unsaon nato pagtubag ang bisan unsang sitwasyon kinahanglang mas makamaayo niini, dili makadaut. Dili kita mobuhat o mo-react sa paagi nga kita mahimong mas makasala pa kay sa, niining sitwasyona, kaniya.
Kana wala magpasabut nga kita walay mga opinyon, walay mga sumbanan, o gibaliwala lang gyud nato ang balaanong sugo nga “mga buhaton” ug “mga dili buhaton.” Apan kini nagpasabut nga kinahanglan natong magpakabuhi sumala niadtong mga sumbanan ug depensahan kadtong mga sugo sa matarung nga paagi kutob sa atong mahimo, sa paagi nga ang Manluluwas nagpakabuhi ug nagdepensa niini. Ug kanunay Niyang buhaton ang angay nga buhaton aron mas mamaayo ang sitwasyon—gikan sa pagtudlo sa kamatuoran ngadto sa pagpasaylo sa mga makakasala ngadto sa paglimpyo sa templo.
Mao usab sa atong bag-o nga kaila, sugdan nato, labaw sa tanan, pinaagi sa paghinumdom nga siya anak nga babaye sa Dios ug may mahangturong bili. Sugdan nato pinaagi sa paghinumdom nga siya usab anak nga babaye. Sugdan nato pinaagi sa pagkamapasalamaton nga siya anaa sa kalihokan sa Simbahan, wala maglikay niini. Sa laing pagkasulti, himoon nato atong pinakamaayo niining sitwasyona nga may tinguha nga tabangan gyud siya.
Kita padayong hilom nga mag-ampo: Unsay angay nga buhaton dinhi? Unsay angay nga isulti? Sa katapusan unsa ang mas makaayo niining sitwasyona ug kaniya? Sa akong hunahuna ang pagpangutana niini ug ang pagpaningkamot sa pagbuhat unsay buhaton sa Manluluwas mao ang Iyang gipasabut sa dihang Siya miingon, “Ayaw na kamo pagpanghukom pinasikad sa panagway, hinonoa pagpanghukom kamo sa matarung nga paghukom,” (Juan 7:24).
Dili usabon niining Simbahan ang doktrina aron sayon sundon para madawat sa katilingban o sa politika o sa bisan unsang rason. Ang kasiguradoan lamang diha sa napadayag nga kamatuoran ang naghatag kanato og kalig-on sa paghupay sa uban nga mibati og kasamok o biniyaan. Ang atong kalooy ug gugma—mga mahinungdanong mga kinaiya ug kinahanglanon sa atong pagka-Kristyano—kinahanglang dili gyud masabtan nga gikompromiso ang mga kasugoan.
Kon kita moatubang og sama niining mga sitwasyona, kini lisud ug makalibug. Ang mga batan-on tingali mangutana, “Nan, dili mi motuo nga kinahanglan ming magpakabuhi o molihok sa piho nga paagi, apan nganong pabuhaton man nato ang ubang mga tawo sama niini? Wala ba silay ilang kagawasan sa pagpili? Dili ba kita nagpakatarung lang sa kaugalingon ug nanghusga, nagpugos sa atong pagtuo sa uban, nagmando nga sila molihok sa piho nga paagi?”
Niadtong mga sitwasyona mabinantayon ninyong ipasabut nganong ang pipila ka baruganan depensahan ug batokan ang pipila sa mga sala bisan asa man kini tungod kay ang mga isyu ug ang mga balaod nga nalakip niini dili lang sosyal o politikal kon dili may mahangturong sangputanan. Ug samtang dili gusto nga makasilo niadtong lahi og pagtuo kanato, gani kita mas magbinantayon nga dili makasilo sa Dios.
Susama kini sa usa ka tin-edyer nga nag-ingon, “Karon nga maka-drayb nako, nasayud ko nga kinahanglan ko nga mohunong kon pula ang suga, apan kinahanglan ba gyud nga magmahusgahon ug maningkamot nga ang tanan mohunong kon pula ang suga? Kinahanglan bang buhaton sa tanan ang atong gibuhat? Dili ba ang uban adunay kabubut-on? Kinahanglan ba nilang molihok sama kanato?” Inyo dayong ipasabut nganong, oo, kita nanghinaut nga ang tanan mohunong kon pula ang suga. Ug inyong kining buhaton nga dili mopakaubos niadtong nasayop o niadtong lahi og pagtuo kaysa atong gituohan tungod kay, oo, sila adunay ilang moral nga kagawasan.
Adunay nagkadaiyang pagtuo niining kalibutan, ug adunay moral nga kagawasan alang sa tanan, apan walay tawo ang adunay katungod sa paglihok ingon nga ang Dios nagpakahilom niining mga hilisgutanan o ang mga kasugoan importante lang kon gikauyunan kini sa publiko. Sa ika-21 nga siglo dili na gyud ta makaikyas. Kita kinahanglan nang makigbatok sa mga lagda ug mga sirkumstansya ug mga kahimtang nga nagtugot og kagawasan sa tinuohan ug ang opisyal nga pagtugot niini sa gobyerno. Kana mao ang usa ka paagi nga kita makasugakod nga maana sa Babelonya apan dili kabahin niini.
Wala na koy nahibaloan nga mas importanting abilidad ug mas dakong integridad nga atong mapakita sa kalibutan nga kita dili moikyas apan molakaw nianang mainampingon nga dalan—mosunod sa moral nga baruganan nga gideklarar sa Dios ug sa mga lagda nga Iyang gihatag apan mobuhat niini uban sa kalooy ug pagsabut ug dakong gugma.
Leksyon 3: Gamita ang mga Mithi sa Ebanghelyo nga Ikaayo sa mga Komunidad ug mga Nasud
Dili kitang tanan mahimong mga pulis o mga social service agent o maghuhukom nga maglingkod sa legal bench, apan kitang tanan kinahanglan manginlabut sa kaayohan sa uban ug sa moral nga kasiguraon sa atong komunidad. Sa paghisgut sa atong panginahanglan nga moimpluwensya sa katilingban lapas sa mga bong-bong sa atong panimalay, si Elder Quentin L. Cook sa Korum sa Napulog Duha ka mga Apostoles miingon:
“Agi og dugang sa pagpanalipod sa kaugalingon natong mga pamilya, kinahanglan nga kita usa ka tinubdan sa kahayag sa pagpanalipod sa atong mga komunidad. Ang Manluluwas nag-ingon, “Pasigaa ninyo ang inyong kahayag atubangan sa mga tawo, aron makita nila ang inyong mga maayong buhat, ug dayegon nila ang inyong Amahan nga anaa sa langit.’ …
“Sa atong nagkadautan nga kalibutan, kinahanglanon kaayo nga ang mga mithi pinasubay sa relihiyuso nga pagtuo himoong kabahin sa hisgutanan sa publiko. …
“Ang relihiyuso nga pagtuo usa ka tinubdan sa kahayag, kahibalo, ug kaalam ug makahatag og kaayohan sa katilingban sa talagsaong paagi.”5
Kon dili nato dad-on ang mga panalangin sa ebanghelyo ngadto sa atong komunidad ug mga nasud, dili gayud mapaigo atong mga pulis—wala gyuy igong Isaac Freestones—nga mopatuman og moral nga pamatasan bisan pa kon kini mahimong mapatuman. Ug dili ni mahitabo. Kadtong mga bata sa panimalay nga walay pagkaon o sinina mga anak sa Dios. Kadto nga inahan, mas sad-an tungod kay siya mas dako ug kinahanglan mas responsable, anak usab nga babaye sa Dios. Ang ingon niini nga mga sitwayon nanginahanglan og dakong gugma sa pormal, gani sa legal, nga mga paaagi, apan kita kinahanglang motabang bisan kanus-a ug bisan asa kita tungod kay wala nato kalimti atong mga sumbanan sa tinuohan, bisan unsa pa ka iresponsable ang uban.
Dili, dili nato mabuhat ang tanan, apan aduna tay mahimo. Ug isip tubag sa panawagan sa Dios, ang mga anak sa Israel mao na ang mobuhat niini—karong higayona dili na mopahawa sa Babelon apan moatake niini. Dili na magbinata kabahin niini, atong ikinabuhi atong tinuohan sa halapad ug walay hunong nga paagi nga makita nato ang tanang matang sa mga oportunidad sa pagtabang sa mga pamilya, pagpanalangin sa mga silingan, ug pagprotektar sa usag-usa, lakip ang nagtubo nga henerasyon.
Ipakita ang Inyong Gugma ni Jesukristo
Ang mga Santos sa Ulahing mga Adlaw gitawag aron mahimong pangpatubo sa pan, asin nga dili mawad-an og lami, kahayag nga nahimutang sa ibabaw sa bukid nga dili gayud masalipdan. Busa sugdi nga mahimong ehemplo!
Kon kita mobuhat ug mosulti og eksakto ug motabang pag-ayo gamit ang atong mga pulong ug buhat, nan, kon hunungon na sa Manluluwas ang Iyang buhat sa pagkamatarung, moingon nga natapos na ang panahon niining katapusang dispensasyon, ug moabut uban ang Iyang himaya, Iya kitang makit-an nga nagbuhat sa atong pinakamaayo, naningkamot nga mosunod sa ebanghelyo, naningkamot sa pagpalambo sa atong kaugalingon ug atong Simbahan ug atong katilingban kutob sa atong mahimo.
Kon Siya moabut, gusto kaayo nako nga maabtan nga nagkinabuhi sumala sa ebanghelyo. Ganahan ko nga masurprisa samtang nagsangyaw sa pagtuo ug nagbuhat og maayo. Gusto ko nga ang Manluluwas mosulti kanako: “Jeffrey, Akong giila ka dili sa imong titulo apan sa imong kinabuhi, sa paagi nga naningkamot kang mabuhi ug sa mga sumbanan nga imong gipaningkamutang gidepensahan. Nakita Nako ang integridad sa imong kasingkasing. Nasayud ko nga naningkamot kang mas mamaayo ang mga butang pinaagi sa pagpalambo og una sa imong kaugalingon ug dayon sa pagdeklarar sa akong pulong ug sa pagdepensa sa akong ebanghelyo ngadto sa uban sa pinakamaayong paagi nga imong mahimo.”
Siya siguradong modugang: “Nasayud ko nga wala ka kanunay nagmalampuson sa imong mga sala ug sa mga sirkumstansya sa uban, apan nagtuo ko nga matinuoron kang naningkamot. Nagtuo ko nga diha sa imong kasingkasing imo gyud kong gihigugma.”
Gusto nako nga ingon ana ang mahitabong panagkita sa umaabut kay wala na koy laing gusto pa niining mortal nga kinabuhi. Ug gusto ko niini para kaninyo. Gusto ko niini para sa tanan. “Israel, Israel, ang Dios nanawag”6—nanawag kanato sa pagsunod sa ebanghelyo ni Jesukristo sa ginagmay ug dinagkong personal nga paagi, sa pagtabang niadtong dili sama nato og panagway o panamit o linihokan, ug dayon (kon atong mahimo) mobuhat og sobra pa niana sa pagserbisyo sa pinakalapad nga komunidad nga atong maimpluwensyahan.
Gihigugma nako ang Ginoong Jesukristo, kansang sulugoon naningkamot kong mahimo. Ug gihigugma nako ang atong Langitnong Amahan, kinsa igong nagpakabana aron ihatag Siya kanato. Kabahin niana nga gasa, nasayud ko ang Dios nanawagan sa Israel niining ulahing mga adlaw nga mahimong mas sama ni Kristo ug mahimong mas balaanon kay sa unsa kita karon sa atong determinasyon sa pagpuyo sa ebanghelyo ug sa pag-establisar sa Zion. Nasayud usab ko nga Siya mohatag kanato og kalig-on ug kabalaan aron mahimong tinuod nga mga disipulo kon kita mangaliyupo niini.
Litrato sa siyudad pinaagi sa tla144/iStockphoto/Thinkstock; litrato sa kandila pinaagi sa Enskanto/iStockphoto/Thinkstock