Pagpakigbahin sa Ebanghelyo diha sa Internet
Ang tagsulat nagpuyo sa Metro Manila, Philippines.
Nasayud ko unsa ang akong gituohan, apan gikulbaan ko sa pagtubag sa tanang mga pangutana sa akong debate team kabahin sa Simbahan.
Dili ko kanunay maisugon sa pagpakigbahin sa ebanghelyo ngadto sa akong mga higala. Daghan nila nasayud sa akong tinuohan, apan wala na koy laing gibuhat aron sa pagpakigbahin sa akong pagpamatuod. Bisan pa niana, kon adunay tawo nga sayop ang ideya kabahin sa Simbahan, naningkamot ko sa pagkorihir niini.
Sa akong pagsugod sa kolehiyo, miapil ko sa debate society. Nadiskobrehan sa ubang mga miyembro sa society nga usa ko ka Santos sa Ulahing mg Adlaw sa dihang gikorihir nako sila sa ilang gisulti kabahin sa “mga Mormon” human sa debate. Wala pa ko maghisgot sa akong relihiyon sukad sa una, mao nga daghan ang nangutana nako nianang adlawa. Nahadlok ko ug hapit naglikay sa pagtubag. Kahibalo ko unsay akong gituohan, apan wala ko masayud kon unsaon kini sa pagpakigbahin. Nag-ampo ko apan morag wala ko makadawat og tubag.
Mga pipila ka adlaw ang milabay, samtang nag-Facebook ko, nakakita ko og artikulo gikan sa LDS.org nga gipost sa akong lider sa simbahan. Nakaamgo ko nga mahimong mo-post pud ko og mga butang kabahin sa Simbahan. Gitan-aw nako ang mga hilisgutan nga gipangutana sa akong debate team, nag-post og mga link sa akong wall, ug gi-tag ang tanang apil. Mibati ko nga sila mas matagbaw sa mga tubag.
Wala pa nako sukad gi-post akong mga pagtuo diha sa internet, mao nga kini mas nakapakuryuso sa mga tawo nga nagpangutana sa akong relihiyon. Samtang sila nangutana, naningkamot ko sa paghatag og simpleng mga tubag ug mga link ngadto sa mga materyal sa Simbahan. Niining paagiha ang mga tawo dili lang magsalig sa akong mga tubag apan sila makasalig usab sa tubag sa mga General Authority kabahin sa ilang mga pangutana. Kon ang panag-istoryahanay mas sensitibo, pribado nako kining tubagon pinaagi sa messaging.
Mapasalamaton kaayo ko nga ang Simbahan nag-andam og mga materyal diha sa internet. Mibati gihapon ko og kakulba kon adunay tawo nga mokalit lang og pangutana kabahin sa Simbahan. Apan karon dili nako magpaabut sa ilang pangutana; unhan na nako pinaagi sa pag-post og mga materyal sa Simbahan diha sa internet. Nasayud ko nga kining mga materyal makatabang sa akong mga higala nga miyembro ug dili usab miyembro.