Mga Ikapulo ug Mga Halad

Pinaagi sa pagbayad sa mga ikapulo ug mga halad, ang mga bata makakat-on nga ang Ginoo motuman sa Iyang mga saad.

Sa artikulo sa mga pahina 60–61 niini nga isyu, si Elder Anthony D. Perkins sa Seventy naghisgut kon sa unsang paagi ang pagbayad sa ikapulo sa dili pa igasto ang iyang kinitaan isip batan-on nagtudlo kaniya unsaon pag-ila sa gusto lang ug sa mga kinahanglanon.

Si Elder Perkins miingon nga kon siya mosunod niining sugo, “ang akong hugot nga pagtuo mas nagkalig-on ug mao usab ang akong tinguha sa pagtuman sa ubang mga kasugoan [sa Ginoo].” Iyang gisunod ang baruganan nga gitudlo diha sa Alang sa Kalig-on sa mga Kabatan-onan: “Ang inyong kinaiya importante sa pagbayad sa ikapulo. … Bayri kini nga matinguhaon uban sa mapasalamaton nga kasingkasing” ([2011], 38).

Mga Sugyot sa Pagtudlo sa mga Batan-on

Ang mga batan-on kasagaran makakat-on sa mga panig-ingnan gikan sa uban. Tan-awa sa “Ang mga Panalangin sa Ikapulo” (Liahona, Mar. 2013, 26) sa pagbasa kabahin sa lima ka indibidwal kinsa napanalanginan tungod sa pagbayad sa ilang ikapulo. Hisguti kon sa unsang paagi ang ikapulo nakapanalangin sa inyong pamilya. Mahimo usab ninyong hisgutan kon sa unsang paagi ang ikapulo ug mga halad nakapanalangin sa tanang miyembro sa Simbahan.
Ikonsiderar nga dungang basahon ang seksyon sa mga ikapulo ug mga halad sa Alang sa Kalig-on sa mga Kabatan-onan (mga pahina 38–39). Mahimo ninyong ihisgot kon sa unsang paagi ang puasa ug ang mga halad sa puasa may kalabutan sa usag usa ug unsaon sa inyong pamilya pagbayad sa mga halad sa puasa.

Mga Sugyot sa Pagtudlo sa mga Bata

Ikonsiderar ang paggamit sa mosunod nga demonstrasyon: Pagbutang og napulo ka sinsilyo sa lamesa. Pangutan-a ang mga sakop sa pamilya kon unsay ilang bation kon inyong ihatag nila ang siyam ka sinsilyo ug ibilin ang usa aron itabang sa pagtukod sa gingharian sa Ginoo. Andam ba nilang dawaton kini nga tanyag? Mahimo dayon ninyong ipasabut ang susama nga kahulugan tali niining sitwasyon ug sa balaod sa ikapulo.
Mahimo ninyong gamiton ang seksyon sa “Para sa Gagmayng mga Bata” sa Agosto 2011 nga Liahona (mga pahina 70–72), nga naglakip sa tinuod nga kasinatian sa usa ka batang lalaki nga nakakat-on nga ang pagbayad sa ikapulo maayo nga pagpili—bisan og ang iyang kontribusyon usa lang ka sinsilyo. Mahimo usab ninyong kompletuhon ang may kalabutang mga kalihokan uban sa inyong mga anak.

Paghulagway pinaagi ni Taia Morley