Ang Akong Mubo nga Sulat diha sa Lapida
Marianne Chaplin Stovall, California, USA
Atol sa ting-init sa 2003, naa ko sa Michigan, USA, aron sa pagsiksik sa uyoan sa akong apohan sa tuhod nga si Robert Hall. Paghuman sa akong biyahe, akong gibisita pag-usab ang sementaryo nga akong naadtuan mga 20 ka tuig na ang milabay.
Sa akong pagbisita kaniadto sa sementeryo, nakamatikod ko og mga bulak diha sa usa sa mga lapida nga may apilyedong Hall. Karong higayona nagsulat ko og mubo nga sulat, gipetsahan, ug gi-laminate aron dili kini madaut sa panahon. Dayon uban sa pag-ampo akong gibilin ang mubong sulat sa lapida, naglaum nga adunay makakita niini nga tawo nga makatabang nako nga mas masayud kabahin ni Robert Hall. Miuli ko sa California nga malaumon apan nagduha-duha kon aduna bay resulta niadtong mubong sulat.
Paglabay sa usa ka semana nakadawat ko og sulat gikan sa layo nga ig-agaw nga ginganlan og Deke Bentley.
“Kagahapon aduna koy dili sagad nga kasinatian,” misulat siya. “Alas-3 sa hapon. Padulong ko sa pagpalit og mga strawberry sa dihang mihukom ko nga mohapit sa Plains Road Cemetery aron susihon ang mga lubnganan sa akong katigulangan. Pipila na ka tuig wala ko moadto. Diha sa mga lubnganan mao ang imong postcard.”
Miadto si Deke sa sementeryo sa samang adlaw nga akong gibilin ang mubo nga sulat. Gitawagan nako siya dayon. Sa among panag-istoryahanay akong nasayran nga siya nagpuyo sa Hillsdale, sobra 50 ka milya (80 km) gikan sa sementeryo.
Mga pipila ka bulan ang milabay naghinam-hinam kong mibalik sa Michigan aron bisitahon si Deke. Giingnan ko niya nga may mga paryente siya nga gilubong sa sementeryo atbang sa iyang panimalay, ug nangutana siya kon ganahan ba ko nga moadto. Iya kong giingnan nga ang sementeryo may upat ka lapida sa mga Hall, duha niini wala siya kaila.
Sa sementeryo, iyang gipakita kanako ang mga lapida. Ang duha ka lapida nga wala siya makaila mao ang kang Martin ug Anna Hall. Wala nako dalha akong mga rekord, apan klaro nakong nahinumduman nga nakasiksik ni Martin Hall.
Midali mi og adto sa county courthouse usa ka oras sa wala pa kini manirado, naglaum nga ang death record mopakita sa ngalan sa mga ginikanan ni Martin. Anaa gyud! Ang amahan ni Martin si Robert Hall! Ang Espiritu Santo mipamatuod kanako nga ang dugay na nakong pagsiksik natapos na.
Si Deke, dili miyembro sa Simbahan, miingon nga ang pagkasayud kabahin ni Robert Hall ingon og “espiritwal.” Mipahiyom ko, nasayud nga ang Espiritu naggiya nako.
“Siguro nasagmuyo ka nga wala nimo gibilin imong mubong sulat mga 20 ka tuig ang milabay,” miingon si Deke, “apan ang tinuod mibalhin lang ko sa Hillsdale mga tulo pa lang tuig!”
Kini nga kasinatian usa ka leksyon para nako nga ang family history sa tinuoray kabahin sa buhat sa Dios ug Siya moggiya kanato sa atong matarung nga mga paningkamot.