Mensahe sa Visiting Teaching

Ang Balaan nga Misyon ni Jesukristo: Tigpangalagad

Tun-i sa mainampuong paagi kini nga materyal ug tinguhaa nga masayran kon unsa ang ipakigbahin. Sa unsang paagi ang pagsabut sa kinabuhi ug misyon sa Manluluwas makadugang sa inyong pagtuo diha Kaniya ug makapanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.

Hugot nga Pagtuo, Pamilya, Kahupayan

Kini kabahin sa sunod-sunod nga Mensahe sa Visiting Teaching nga naghulagway sa mga aspeto sa misyon sa Manluluwas.

Samtang kita mangalagad sa uban, kita mahimong matinuorong sumusunod ni Jesukristo, kinsa mipakita og ehemplo alang kanato. Si Presidente Thomas S. Monson miingon: “Gilibutan kita niadtong nanginahanglan. … Kita ang mga kamot sa Ginoo dinhi sa yuta, uban sa mando nga moserbisyo ug motabang sa Iyang mga anak.”¹

Si Linda K. Burton, kinatibuk-ang presidente sa Relief Society, mitudlo: “Uban sa pagbansay, ang matag usa kanato mahimong mas mahisama sa Manluluwas samtang kita nagserbisyo sa mga anak sa Dios. Sa pagtabang kanato nga mas [makaalagad], buot akong mosugyot og upat ka mga pulong nga timan-an: “Paniid una, dayon serbisyo” … Samtang kita nagbuhat niini, kita naghupot sa atong mga pakigsaad, ug ang atong serbisyo, sama kang Presidente Monson, mahimong ebidensya sa atong pagkadisipulo.”²

Makaampo kita matag buntag aron sa pag-ila sa mga oportunidad sa pagserbisyo sa uban. “Ang Langitnong Amahan mogiya kaninyo ug ang mga anghel anaa motabang kaninyo,” miingon si David L. Beck, kinatibuk-ang presidente sa Young Men. “Hatagan kamo og gahum sa pagtabang ug pagluwas sa uban.”³

Gikan sa mga Kasulatan

Mateo 20:25–28; 1 Nephi 11:27–28; 3 Nephi 28:18

Gikan sa Atong Kasaysayan

Sa Oktubre 1856 nga kinatibuk-an komperensya, si Presidente Brigham Young (1801–77) mipahibalo nga ang mga handcart pioneer nagtadlas pa sa mga kapatagan ug ang tanan kinahanglang motabang sa pagpundok og mga kasangkapan para kanila diha-diha dayon. Si Lucy Meserve Smith misulat nga ang mga babaye “mihubo sa ilang mga petticoat [mga lagpad nga sapaw nga sayal], mga stocking, ug tanang butang nga ilang ikahatag, didto gayud sa Tabernakulo, ug gipahimutang [kini] ngadto sa mga karwahe.”

Sa dihang miabut na ang gitabang nga mga pioneer sa Siyudad sa Salt Lake, si Lucy misulat, “Wala pa gayud ako mobati og labaw pa nga … kahimuot sa bisan unsang paghago sa akong kinabuhi, sa ingon ka hiniusa nga pagbati nga mipatigbabaw. Moadto lamang ako sa tindahan ug mosulti sa akong gikinahanglan; kon panapton man, ihatag kini nga walay bayad.”⁴

Si Presidente George Albert Smith (1870–1951) miingon kabahin sa pagpangalagad sa uban: “Ang mahangturon natong kalipay katimbang sa paagi kon giunsa nato sa paggahin ang atong kaugalingon sa pagtabang sa uban.”⁵

Ikonsiderar Kini

1. Sa unsang paagi ang pag-ampo mogiya kanato aron mahimong instrumento sa mga kamot sa Ginoo?

2. Sa unsang paagi ang pagpangalagad sa uban makatabang nato sa pagtuman sa atong mga pakigsaad?

Mubo nga mga sulat

1. Thomas S. Monson, “Unsa may Akong Nabuhat alang sa Usa ka Tawo Karon?” Liahona, Nob. 2009, 86.

2. Linda K. Burton, “Paniid Una, Dayon Serbisyo,” Liahona, Nob. 2012, 78, 80.

3. David L. Beck, “Ang Sagrado Ninyong Katungdanan sa Pagpangalagad,” Liahona, Mayo 2013, 56.

4. Lucy Meserve Smith, sa Anak nga mga Babaye sa Akong Gingharian: Ang Kasaysayan ug Buhat sa Relief Society (2011), 44–45.

5. George Albert Smith, sa Anak nga mga Babaye sa Akong Gingharian, 91.

Detalye gikan sa Who Touched Me? [Kinsa ang Mihikap Nako?] ni Gary L. Kapp