Kabubut-on ug mga Tubag: Pag-ila sa Pagpadayag
Usahay ang morag dili malutsan nga babag sa komunikasyon mao ang dakong lakang nga pagabuhaton sa pagsalig.
Tuo: paghulagway sa litrato pinaagi ni Cody Bell
Sa akong atbang usa ka babaye ang naglingkod nga naghilak. Nagluha ang mga mata, siya miingon nako, “Wala na ko kahibalo unsay akong gituohan.” Naghisgot siya nga nakigbisog ug nag-ampo sa daghang mga adlaw aron makahibalo unsaon sa paghimo og importante kaayong desisyon sa iyang kinabuhi, pero wala magmalampuson. Nag-antus siya, “Wala na ko kahibalo unsay buhaton. Kon sultihan ko nimo unsay buhaton, buhaton nako kini.” Naggunit sa mga kasulatan, miingon siya, “Miingon ang Dios nato nga Siya motabang nato. Gitubag Niya ang mga pag-ampo sa uban. Nganong wala man Niya ako tubaga?”
Kon ang usa ka tawo mibati og daghang mga emosyon, maglibog siya unsay buhaton kon siya ra. Ang akong pag-ampo mao ang pagtabang ninyo nga dunay sama niini nga mga pagbati.
Kon ang mga tubag sa dinalian nga pag-ampo ingon og wala moabut, mahimong wala kita makasabut sa pipila ka mga kamatuoran mahitungod sa pag-ampo o tungod kay kita wala makamatikod sa mga tubag kon kini moabut.
Mga Baruganan sa Pag-ampo
Ang pagpakigsulti sa atong Amahan sa Langit dili tiaw-tiaw nga butang. Sagrado kini nga pribilehiyo. Gibase kini sa walay kausabang mga baruganan. Kon kita makadawat og tabang gikan sa atong Amahan sa Langit, kini tungod sa atong hugot nga pagtuo, pagkamasulundon, ug sa hustong paggamit sa kabubut-on.
Sayop ang paghunahuna nga ang kada pag-ampo nga atong ihalad matubag dayon. Ang pipila ka mga pag-ampo nagkinahanglan og igo-igong paningkamot sa atong bahin. Tinuod, usahay ang mga impresyon moabut bisan kon kita wala magtinguha niini sa pihong paagi. Sa kasagaran kini bahin sa butang nga kinahanglan natong mahibaloan ug wala makahimo sa pagpangita.
Ania kita sa kalibutan aron makaangkon og kasinatian nga dili nato maangkon sa laing paagi. Gihatagan kita og oportunidad sa pagtubo, sa pagpalambo, ug sa pag-angkon og espirituhanong kahingkod. Sa paghimo niana, kinahanglan kitang makat-on sa paggamit sa kamatuoran. Giunsa nato sa pag-atubang sa mga hagit ug pagsulbad sa malisud nga mga problema importante kaayo sa atong kalipay.
Aron mas makasabut sa pag-ampo, naminaw ko sa tambag sa uban, namalandong sa mga kasulatan, ug nagtuon sa mga kinabuhi sa mga propeta ug sa uban. Apan unsay labing makatabang mao ang paghunahuna sa usa ka bata nga masaligon nga moduol sa usa ka mahigugmaon, mabination, maalamon, masinabtunon nga Amahan, kinsa gusto nga kita magmalampuson.
Ayaw kabalaka sa inyong salikwaot nga pagpadayag sa mga pagbati. Pakigsulti lang sa inyong Amahan. Maminaw Siya sa kada pag-ampo ug motubag niini sa Iyang pamaagi.
Kon mopasabut ta sa usa ka problema ug sa gisugyot nga solusyon, usahay Siya motubag og oo, usahay dili. Sa kasagaran Siya mopugong sa tubag, dili tungod kay kulang sa pagpakabana, apan tungod kay Siya nahigugma nato—sa hingpit. Gusto Siya nga atong gamiton ang mga kamatuoran nga Iyang gihatag nato. Aron kita molambo, kinahanglan kitang mosalig sa atong abilidad sa paghimo og sakto nga mga desisyon. Kinahanglan natong buhaton unsay atong gibati nga sakto. Motubag ra Siya nato. Dili kita Niya pakyason.
Akong gihulagway ang tinuod nga reyalidad sa atong relasyon sa atong Amahan. Walay butang nga wala Niya mahibaloi kabahin nato. Kahibalo Siya sa tanan natong panginahanglan ug makahatag sa tanang mga tubag. Apan, tungod kay ang Iyang katuyoan mao ang atong walay katapusan nga kalipay, miawhag Siya nato sa paghimo og sakto nga mga pagpili.
Tulo ka mga Paagi sa Pagpangita og mga Tubag
1. Pangita og mga Ebidensya Nga Siya Mitubag Na Nimo
Sama sa kadaghanan nato, si Oliver Cowdery wala makamatikod sa ebidensya sa mga tubag sa pag-ampo nga nahatag na sa Ginoo. Aron siya—ug kita—makaamgo niini, kini nga pagpadayag gihatag pinaagi ni Joseph Smith:
“Bulahan ikaw tungod sa imong nabuhat; kay ikaw nagpakisayud kanako, ug tan-awa, sa makadaghan nga ikaw nagpakisayud ikaw nakadawat og panudlo sa akong Espiritu. Kon kini wala pa unta, ikaw dili unta makaabut sa dapit diin ikaw anaa karon.
“Tan-awa, ikaw nahibalo nga ikaw nagpakisayud kanako ug Ako milamdag sa imong panumduman, ug karon ako mosulti kanimo niini nga mga butang nga ikaw unta mahibalo nga ikaw gilamdagan pinaagi sa Espiritu sa kamatuoran” (D&P 6:14–15; emphasis gidugang).
Kon nagtuo mo nga wala motubag ang Dios sa inyong mga pag-ampo, pamalandungi kining mga kasulatan—dayon pangita og ebidensya sa inyong kinabuhi sa Iyang pagtubag na ninyo.
2. Bantayi ang mga Pagbati
Aron sa pagtabang sa matag usa nato sa pag-ila sa mga tubag nga gihatag, miingon ang Ginoo:
“Kon ikaw nagtinguha og dugang nga kamatuoran, hinumdumi ang gabii nga ikaw misangpit ngari kanako diha sa imong kasingkasing, nga ikaw unta mahibalo mahitungod sa kamatuoran niini nga mga butang.
“Wala ba Ako magsulti og kalinaw nganha sa imong hunahuna mahitungod niini nga butang?” (D&P 6:22–23; emphasis gidugang).
Ang Ginoo midugang og pagpasabut pinaagi sa pagtambag nato sa pagtuon sa problema sa atong hunahuna ug dayon sa pagpangutana kon kini sakto ba:
“Kon kini husto Ako mohimo sa imong dughan nga moinit diha sulod kanimo; busa, imong mabati nga kini husto.”
“Apan kon kini dili husto ikaw dili makabaton niana nga mga pagbati, apan ikaw makabaton og kasamok sa hunahuna” (D&P 9:8–9; emphasis gidugang).
3. Lihok Kon Siya Mopugong sa Tubag
Importante kaayo nga makahibalo nga ang Ginoo motubag usab sa ikatulong paagi sa pag-ampo pinaagi sa pagpugong sa tubag sa higayon nga gihalad ang pag-ampo. Nganong buhaton man Niya kana?
Siya mao ang atong hingpit nga Amahan. Gihigugma kita Niya lapas sa atong kapasidad sa pagsabut. Nasayud Siya unsay labing maayo alang nato. Makita Niya ang katapusan gikan sa sinugdanan. Gusto Siya nga kita molihok aron makaangkon sa gikinahanglan nga kasinatian:
Kon Siya motubag og oo, kini aron makahatag nato og pagsalig.
Kon Siya motubag og dili, kini aron mapugngan ang sayop.
Kon Siya mopugong sa tubag, kini aron kita motubo pinaagi sa pagtuo Kaniya, pagsunod sa Iyang mga sugo, ug pagkaandam sa paglihok sa kamatuoran. Gipaabut nga kita may tulubagon pinaagi sa paghimo sa usa ka desisyon nga nagsubay sa Iyang mga pagtulun-an nga wala pay kumpirmasyon. Dili kita maglingkod lang nga maghulat o magbagulbol tungod kay ang Ginoo wala mamulong. Kinahanglan kitang molihok.
Sa kasagaran unsay atong gipili nga buhaton sakto. Mokumpirmar Siya sa pagkasakto sa atong mga pagpili sa Iyang pamaagi. Kana nga kumpirmasyon sa kasagaran moabut pinaagi sa daghang mga tabang nga moabut. Makaplagan nato kini kon kita sensitibo sa espirituhanong paagi. Sama kini sa mga sulat gikan sa mahigugmaong Amahan isip ebidensya sa Iyang pag-aprobar. Kon, pinaagi sa pagsalig, magsugod kita og butang nga dili sakto, Siya mopahibalo nato sa dili pa kita kaayo malayo. Makamatikod kita niana nga tabang pinaagi sa pag-ila sa nabalaka o dili mahimutang nga mga pagbati.
Ang paningkamot ni Nephi sa pagkuha sa mga palid nagpakita sa unsa nga paagi ang mga baruganan magamit (tan-awa sa 1 Nephi 3:6–7). Human sa duha ka wala magmalampuson nga mga pagsulay, si Nephi nagpabiling masaligon. Siya mikamang ngadto sa sulod sa dakbayan padulong sa balay ni Laban nga wala masayud sa mga tubag. Siya miobserbar, “Ako giubanan sa Espiritu, wala masayud sa sinugdanan sa mga butang nga ako mobuhat,” midugang nga may gibug-aton, “bisan pa niana, ako mipadayon” (1 Nephi 4:6–7; emphasis gidugang).
Si Nephi andam nga mosulay sa makadaghan, ginamit ang iyang tumang mga paningkamot. Mipahayag siya og hugot nga pagtuo nga siya pagatabangan. Wala siya mawagtangi og kadasig. Tungod kay siya milihok, adunay pagsalig sa Ginoo, nagmasulundon, ug husto nga migamit sa iyang kabubut-on, nakadawat siya og giya. Nadasig siya matag lakang hangtud sa kalampusan, ug ang mga pulong sa iyang inahan mao kini “gihatagan og … gahum [aron] makatuman sa butang nga gisugo sa Ginoo” (1 Nephi 5:8; emphasis gidugang).
Paghulagway pinaagi ni Brian Call
Nasayud si Nephi nga kinahanglan siya nga mosalig sa Dios, magbaton og hugot nga pagtuo, ug molihok aron siya makadawat og tabang, matag lakang. Wala siya magbagulbol ni mangayo og hingpit nga pagpasabut. Apan, obserbahi pag-ayo, wala siya maghulat lang sa tabang. Milihok siya! Pinaagi sa pagsunod sa espirituhanong balaod, nadasig siya ug gihatagan og gahum sa paglihok.
Pagsalig sa Kabubut-on ug Pamaagi sa Dios
Usahay ang mga tubag sa pag-ampo dili mailhan tungod kay gusto kaayo kita og kumpirmasyon sa atong kaugalingong mga tinguha. Pakyas kita sa pagtan-aw nga gusto ang Ginoo nga kita mobuhat og laing butang. Pagmabinantayon sa pagtinguha sa Iyang kabubut-on.
Mokumpisal ko nga dili ko kahibalo unsaon sa paghimo og sakto nga desisyon gawas kon dunay pagkamatarung ug pagsalig diha sa usa ka Langitnong Amahan. Ang mga baruganan dili gayud moepekto kon ang kabubut-on tinuyo nga gamiton nga supak sa kabubut-on sa Dios. Kon dunay wala mahinulsuli nga sala, mag-inusara kitang makigbisog sa atong kaugalingon. Kita mahimong maluwas pinaagi sa atong kaugalingon paghinulsol.
Kon kita nagtinguha og inspirasyon nga matabangan sa paghimo og mga desisyon, ang Ginoo mohatag og malumo nga mga aghat. Nagkinahanglan kini nga kita maghunahuna, mogamit og hugot nga pagtuo, makigbisog usahay, ug molihok. Panagsa ra nga ang tibuok tubag sa usa ka importante kaayong butang o komplikado nga problema moabut diha-diha. Sa kasagaran, moabut kini sa tagsa-tagsa, nga walay makita nga katapusan.
Akong gipaulahi ang pinakaimportante nga bahin sa pag-ampo. Kini ang pagkamapasalamaton! Ang atong kinasingkasing nga paningkamot sa pagpasalamat sa atong Amahan makamugna og talagsaong mga pagbati sa kalinaw, bili sa kaugalingon, ug gugma.
Ngano man nga ang pinakakabus daw nasayud kon unsaon gyud pagpasalamat sa Ginoo? Sa kabukiran sa Guatemala, ang mga miyembro naglisud sa panginabuhi. Ang pag-adto sa templo nanginahanglan og dakong sakripisyo. Ang pagpangandam niini molungtad og usa ka tuig. Kinahanglang magkugi, magsakripisyo aron makatigom og kwarta ug pagkaon, mag-spin, magtina, ug maglala og bag-ong panapton. Magbaktas og layo kaayo gikan sa kabukiran, motabok sa Lake Isabel, magbiyahe sakay og bus nga gamay ra ang pagkaon. Gipangkapoy og maayo inig-abut sa templo. Maligo sila aron malimpyo, mag-ilis og sinina, ug mosulod sa balay sa Ginoo.
Mag-ilis og puti nga sinina, sila gitudloan sa Espiritu, modawat sa mga ordinansa, ug mohimo og mga pakigsaad. Usa ka babaye nga taga-bukid natandog pag-ayo sa espiritu ug sa kahulugan sa endowment. Pagsulod sa celestial room, iyang nakita ang uban nga naglingkod, nagdungo sa ilang ulo. Inosente siyang miluhod sa agianan pasulod sa kwarto, makita sa uban. Iyang gidungo iyang ulo, mihilak, ug sulod sa baynte minutos kinasingkasing nga nangamuyo sa iyang Amahan sa Langit. Sa katapusan, iyang sinina nabasa sa luha, siya mihangad. Ang mabinationg matron sa templo nangutana, “Aduna ba koy matabang nimo?“ Siya mitubag, “O, tabangan ko nimo? Kini akong problema: Naningkamot ko nga ipaabut sa Amahan sa Langit ang akong pasalamat sa tanan nakong panalangin, apan mibati ko nga wala Niya paminawa. Mahimo ba nga imo kong tabangan sa pagsulti Niya sa akong dakong pasalamat?”
Kini nga tambag mahitungod sa pag-ampo tinuod. Nasulayan nako kini pag-ayo sa laboratoryo sa akong kaugalingong personal nga kinabuhi. Akong nadiskobrehan nga usahay ang morag dili malutsan nga babag sa komunikasyon mao ang dakong lakang nga pagabuhaton sa pagsalig.
Kon kamo magtinguha sa Iyang tabang, siguroha nga ang inyong kinabuhi limpyo, ang inyong mga motibo takus, ug kamo andam sa pagbuhat unsay Iyang ipabuhat—kay Siya motubag sa inyong mga pag-ampo. Siya ang imong mahigugmaong Amahan, ug ikaw Iyang pinalanggang anak. Hingpit Siyang naghigugma kaninyo ug gustong motabang ninyo.