Veiqaravi Oqo mo Veiqaravi mai Muri
Na dauvolaivola e vakaitikotiko mai Utah, Amerika.
“Mo ni qaravi Jiova ga ena yalomuni taucoko” (1 Samuela 12:20).
“Daru veitau i valenilotu!” E kaya o Mómani, ni dusia na dudukilagi ni lotu ena kena votu maliwa e cake ni veivuniniu. A qai cici yani vakatotolo sara me liu tiko vei tacina gone, o Moriani.
E rau se qai taubaletaka oti ga mai e dua na maile mai vale kei nodrau itubutubu, ia rau se veitaucici vakaukauwa tikoga o Mómani kei Moriani rau sa yacova yani na matamata kaukamea ni nodratou valenilotu. Rau tu vakadua me rau toboka tale nodrau icegu.
Ni bera ni rau raica o cei sa qaqa, sa kaci mai e dua na cauravou lailai, “Drau via caqepolo?”
E dau taleitaka o Mómani na caqepolo ia e ratou na laki samaka vakamatavuvale na valenilotu me vakarautaki ki na lotu ena siga e tarava.
A kurea na uluna o Mómani. “Sega ena gauna oqo—me qai caka malua!” a kaya lesu mai.
Oti oya rau sa mai cakacaka vakaukauwa sara o Mómani kei Moriani. A tuvanaka na idabedabe o Mómani ka rau taviraka na vuloa vata kei tamana ka rau quata na vuloa o Moriani kei tinana.
Oti rau sa qai savata vata na cauravou na iloilo e valenisili. “Au sega ni dau vinakata na samaki valenilotu, ia au marautaka,” a kaya o Moriani. “Vakacava o iko, Mómani? Qo beka na vuna o gole mai kina ka sega ni laki caqepolo?”
A vakananumi tamana sara o Mómani. A bisopi o koya ni nodratou tabanalevu, ia e dau solia nona gauna me laki samaka na valenilotu.
“Au tiko qo niu gadreva meu vakataki tamaqu,” a kaya o Mómani.
A qai vakasamataki rau na daukaulotu ni nona tabanalevu. Ni rau maqusa ena tukituki ena veikatuba me wasei na iVola i Momani vei ira na tamata. Rau dau sureti ira na tamata mera gole mai ki lotu ena valenilotu rau sa samaka na cauravou.
“Au tiko qo baleta ni dua na siga au na laki kaulotu talega,” a vakasamataka o Mómani. “Au rawa ni vukei rau na daukaulotu ena kena vakarautaki na valenilotu.”
Sa vakasamataka o Mómani na siga e tarava, ni rau na yadra vakaveitacini ena 6:00 ena mataka, me rau taubale yani ki valenilotu vakasote vulavula ka vakaneketai, ka vakarautaki na idabedabe kei na serenilotu ena rumu ni Lalai.
“Au tiko qo baleta niu vinakata me dua na noqu veikacivi ena Lotu,” a vakasamataka.
E vakasamataka o Mómani ni sa roro mai na gauna me dikoni kina. Ena vota yani na sakaramede ka cakava e vuqa tale na ka me veiqaravi kina.
“Au tiko qo baleta niu na ciqoma na matabete ena yabaki mai qo, kau gadreva meu cakava na ka kecega meu vakarau kina.”
Sa cakava oti o Mómani na ka me vakarautaki koya ki na matabete: sa mai rawata na nona Vakaicocovi ena Vakabauta na Kalou. Sa vulica tiko me bulataka na kosipeli ka qaravi ira na tamata.
Oti sa qai raikivita na iyaloyalo i tacina ena iloilo ka dredre.
“Au tiko oqo baleta niu lomana na Turaga,” a kaya, “baleta ni noqu veiqaravi qo ena vukea noqu vakarau meu na laki veiqaravi yani.”
iVakaraitaki mai vei Adam Koford