iVaqa ni Veisiko
Na iLesilesi VaKalou i Jisu Karisito: Madrai ni Bula
Vulica ena masumasu na itukutuku oqo ka tovolea mo kila na ka mo na wasea. Ena vakalevutaka vakacava na nomu vakabauta na nomu kila na bula kei na ilesilesi ni iVakabula, ka yaco me vakalougatataki ira talega o vakaraica voli ena veisiko? Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
Detail from In Remembrance of Me, mai vei Walter Rane
A kaya o Jisu, “Koi au na madrai ni bula sa lako sobu mai lomalagi: kevaka sa dua e kania na madrai oqo, ena bula ka tawamudu” (Joni 6:51). “Sa vakatavulici keda o Jisu, na Nona tisaipeli, ni sa dodonu meda rai kivua na Kalou ena veisiga me baleta na madrai—na veivuke kei na kakana—eda gadreva ena siga vata oya,” a kaya o Elder D. Todd Christofferson ena Kuoramu ni iApositolo Le Tinikarua. “Na veisureti ni Turaga … sa tukuna na veika me baleta e dua na Kalou dauloloma, sa kila sara mada ga na gagadre lalai ni siga yadua ni Luvena ka sa tu vakarau me tokoni ira, yadudua. E sa tukuna tiko o Koya ni sa rawa ni da kerea ena vakabauta mai na Tamata oya ‘o koya sa solia vakalevu kivei ira kecega na tamata, a sa sega ni dauveivakadirideini; ka na solia ga vua’ (Jemesa 1:5).”1 Ni da kila deivaki ni na sotava o Jisu Karisito na noda gagadre, eda na vuki ki Vua me baleta na noda vakani vakayalo.
E sureti keda o Elder Jeffrey R. Holland ena Kuoramu ni iApositolo Le Tinikarua “meda veitomani ena ilakolako ni tisaipeli eliu i Karisito ka ra a gadreva talega na madrai ni bula—o ira ka sega ni lesu tale ia ka a lako ki Vua, tiko vata kei Koya, ka ra a vakila me baleta na nodra taqomaki kei na veivakabulai e sa sega tale e dua mera na lako tale kina.”2
iKuri ni iVolanikalou
Mai na iVolanikalou
A vakatavulici ira tiko na lewe vuqa o Jisu Karisito ka sivia e 4,000 na tamata. Ni oti e tolu na siga, a tukuna o Koya kivei ira na Nona tisaipeli: “Au sa lomani ira na lewe vuqa, ni sa … sega na kedra:
“Ia kevaka ka’u vakatalai ira tani ki na nodra veivale ka ra sega mada ni kana, era na malumalumu e gaunisala. …
”Sa qai kaya vua ko ira na nona tisaipeli, Ena rawa mai vei na madrai mera mamau kina ko ira ena lekutu oqo?
“A sa tarogi ira o [Jisu], E vica na ibuli madrai sa tu vei kemudou? A ra sa kaya, E vitu.”
O Karisito sa qai “taura na ibuli madrai e vitu, ka vakavinavinaka, ka dovia, ka solia vei ira na tisaipeli mera tauca e matadra; …
“E vica talega na ika lalai sa tu vei ira: a sa lotutaka ko koya, ka kaya mera tauca e matadra.
“A ra sa kana, a ra sa mamau: a ra sa tomitomika na vo ni ka sa dovi, a sa vitu na sova sa sinai kina.” (Raica na Marika 8:1–9.)