Galala ni Digidigi se Digidigi Vakayalomatua?
Na vakayagataki vakavuku ni galala ni digidigi e dolava ka vakavinakataka cake na noda rawata me da digidigi dodonu.
iVAKARAITAKI NI ITABA MAI VEI CHRISTINA SMITH, iVakaraitaki mai vei Bryan Beach
Au se nanuma tikoga na noqu nanamaki niu vakavakarau meu raica na noqu bisopi me baleta na laki kaulotu. Au vakataroga se sa ganiti au beka. Me vaka na Parofita o Josefa Simici, au sega ni se bau coko ena dua na ivalavala ca bibi” (Josefa Simici—Ai Tukutuku 1:28), ia au lomaleqa talega.
Au lomaleqa baleta niu vakananuma tikoga na noqu itokani o Danny (sa veisau na yaca). Ena vica vata na vula sa dau tukuna voli ga o Danny na nona sa nanamaki tu me laki kaulotu. Ia sa veisau ni oti na nona sota vata kei na bisopi.
Baleta ni sa dau vakaitavitaki koya o Danny ena itovo tawakilikili eso kei na vica na goneyalewa, a qai tukuna vei au e muri, sa vakuwai koya kina mai na veiqaravi vakadaukaulotu tudei. Sa sega kina ni galala me digitaka na kaulotu.
Sa tacori o Danny, me vaka na vosa nei Peresitedi Boyd K. Packer, na Peresitedi ni Kuoramu ni iApositolo Le Tinikarua, ena veitemaki nei Setani “me vakayagataka cala na [nona] galala ni digidigi vakayalomatua.”1
Na galala dina, me vaka e vakavuvulitaki ena Me iSakisaki ni iTabagone, ena yaco mai ni da vakayagataka na noda galala me da digitaka kina na talairawarawa. Na yali ni galala, me vaka e vulica o Danny, e yaco mai na noda digitaka na talaidredre.
“E dina ga ni sa tu vei kemuni na galala mo ni digitaka kina na veika mo ni cakava, ko ni sega ga ni digitaka rawa na veika ena muri mai. Se vinaka se ca, ena yaco dina ga mai na veika ena muri mai ni sa isau ni digidigi ko ni a cakava.”2
Eda na Vakatulewa Ga me Baleti Keda
Ni vakavuvulitaka na ivolanikalou ni da sa “sereki me [da] digi[digi],” “lewa ga na ka [me da] kitaka,” ka sereki “me [da vakayacora ga vakataki keda na ka eda kila ni dodonu]” (2 Nifai 2:27; 10:23; V&V 58:27; Ilamani 14:30), eda dau vakayagataka vakavuqa na vosa “galala ni digidigi.”
Ia o ni kila beka ni malanivosa “galala ni digidigi” e sega ni basika ena ivolanikalou? Ia, e vakavuvulitaka na ivolanikalou “me ra muria na tamata yadua na yavu kei na ivakaro … io me vaka na galala ni digidigi vakayalomatua au sa solia vua, ni na tarogi na tamata yadua ena nona ivalavala ca” (V&V 101:78; vakamatatataki).
E vakavuvulitaka o Elder D. Todd Christofferson ena Kuoramu ni iApositolo Le Tinikarua: “Na vosa galala e dau basika [ena ivolanikalou] vakataki koya ga se kei na kena ikuri me vakamatatatakana digidigi savasava. … Ni da vakayagataka na vosa galala ni digidigi vakayalomatua, eda sa tukuna tiko kina vakadodonu na vakatulewa vakataki keda ka dua na tiki bibi ni isolisoli vakalou ni galala. O keda na kabula yalomatua ka da na dui vakatulewa vakataki keda, eda galala me da digidigi ia eda na tauca na isau ni noda digidigi.”3
E tukuna talega o Peresitedi Packer, “Na galala e tukuni tiko ena ivolanikalou me ‘digidigi ni yalo,’ ka sa kena ibalebale ni da na digitaka na vinaka se ca.”4 E vakamacalataka na iVola i Momani ni tamata me “digitaka na galala kei na bula tawamudu, ena vukui koya na Dauveisorovaki ni tamata kecega, se me ra digitaka na tiko vakabobula kei na mate me vaka na nona veivakabobulataki kei na nona inaki na tevoro.” (2 Nephi 2:27).
Na iValu nei Setani me vorata na Galala
Me vaka ni dua na ka bibi ena yavu ni veivakabulai na digidigi vakayalomatua, a segata kina o Setani me vakarusa ena vuravura taumada. A vakasevi tani me baleta na nona a veisaqasaqa ka segata tiko ena gauna oqo me “cavilaka ka vakamatabokotaka na tamata, ka vakabobulataki ira me vaka na lomana” (Mosese 4:3–4).
E vinakata o Setani me da digitaka na veika me yalani kina na noda galala, ka kauti keda ki na veitovo ca ka veivakatotogani, ka laivi keda me da malumalumu tu kina ka sega ni vorata rawa na nona vetemaki. Na totoka ni kosipeli sai koya ni vakavuna me da kila na noda digidigi kei na vua ni veidigidigi oqori. Na vakayagataki vakavuku ni galala ena tadola tu kina na noda digidigi ka na vakavinakataka cake na noda rawata me da digidigi dodonu.
Nona iVakaraitaki na iVakabula
Ni vakaraitaki na yavu ni veivakabulai ena Matabose Cecere mai Lomalagi, a vakaraitaka vei keda na iVakabula na ivakarau me da vakayagataka kina vakadodonu na noda galala ni digidigi. E kaya ko Jisu, “Tamaqu, me yaco ga na lomamuni, ka me nomuni tikoga na vakarokoroko ka sega ni mudu” (Mosese 4:2). Baleta ni sa tu vakarau me cakava na lomai Tamana ena gauna oya vakakina e muri ena Were mai Kecisemani ka vakakina ena kauveilatai (raica na Maciu 26:39; Luke 22:42), sa sauma ko Jisu na isau ni noda digidigi cala ka vakarautaka vei keda e dua na sala me da vosoti kina ena veivutuni.
Kevaka eda muria na nona ivakaraitaki na iVakabula, eda na sega ni kaya, “Au na cakava na ka au vinakata,” eda na tukuna, “Au na cakava na ka e vinakata o Tamada.”5 Ni da vakayagataka vakaoqo na noda galala ni digidigi vakayalomatua ena kauta mai na bulagalala kei na marau.
Niu laki raica noqu bisopi me baleta na imatai ni noqu veivakatarogi ni kaulotu, au vakavinavinaka niu a cakava na digidigi vinaka eso. Ena vica na vula e muri au a qarava tiko na Turaga mai Guatemala—ka vakavulica tiko vei ira eso na yavu ni veivakabulai kei na itavi bibi e nona na galala ni digidigi vakayalomatua ena yavu oya.