Paisoni Rairai Totoka

Alison L. Randall, Utah, Amerika

Niu curu yani mai katuba e liu meu kauta mai na niusipepa, au raica e dua na ka sega ni vinaka. E ra kumukumuni vata mai ena bogi e dua na ibinibini qasivi damudamu ni bukawaqa, ka ra basika tu mai ena maliwa ni qaqara ni lomanibai ni vale kei na salasimede.

E dina ni se bera ni balavu na neirau vakaitikotiko voli e Texas, Amerika kei na watiqu, au sa kila mai na veigauna mosimosi eso ni nodra ikati mosi na qasivi, ka sega ni kedra roka, era vakayacani tu kina. Au lako ki na qaraji na vanua e maroroi tu kina na wainimate ni manumanu meca lalai. Au qai wilika na idusidusi e yasana.

“[Na wainimate oqo] e rairai totoka sara vei ira na qasivi,” e vaqo na ka e tukuna. “Era na kauta yani ki na nodra bure, vakania vua nodra ranadi, ka ra na mate kece na yavusa.” E dusimaki au na idusidusi meu vakamiraka eso na vuana wavokita vakakina na dela ni nodra bure. Era qai cakava na qasivi na kena vo.

Au a vakatitiqa. E vaka vei au ni qasivi vuku na qasivi ni bukawaqa, ni rawa me ra tara e dua na bure balavu ena dua ga na bogi. Au vakatitiqa ni ra na rawai ena paisoni vakamatavulotaki, ia au mani vakamiraka ga.

Ena dua na gauna lekaleka ga e muri au raica ni ra sa tekivu maqusa na bureniqasivi. Au toka ga vakayawa ia au kala yani meu sarava na veitosoyaki. Sa dua na ka nodra vakusakusa me vaka beka ni tau mai lomalagi na mana. Era colata na wainimate vulavula ena ligadra lalai ka ra veidrigidrigi ena nodra vakusakusa me ra kauta na paisoni ki na nodra lomanibure.

Au sarava tu ena kurabui ni domobula. Era kauta tiko ena lomasoli ki na nodra itikotiko na paisoni E matata, ni sega ni lasu na vosa “totoka sara.” E rawa ki na kabani e bulia na wainimate me cakava e dua na ka ca—rerevaki sara mada ga— me rairai vinaka sara.

Au se bera vakadua ni raica e dua na ivakaraitaki vinaka ni kena rawa ni vakarairai vinakataki na ka ca. E vakavuna meu vakasamataka na ivakarau e cakava kina o Setani na ka vata oqo. Au vakacegui niu kila ni dina ga ni rawa vua me vakamiraka wavokita na noqu itikotiko na paisoni vakamatavulotaki, e sega ni rawa vua me kauta mai loma—vakavo kevaka au vakatara vua. Ia ena rawa vakacava meu biuta tu ga e tuba?

E votu mai noqu vakasama e dua na noqu ivolanikalou taleitaki: “Raica sa soli vei ira na tamata kecega na Yalo i Karisito me ra kila kina na vinaka mai na ca.” Ena Yalo oqori, e vakamacalataka kina o Momani, ni da na “kila vakaidina” se mai vua na Kalou se vu mai vei Setani e dua na ka (Moronai 7:16).

Na noqu saravi ira toka na qasivi vakaleqai oya sa vakasinaiti au ena vakavinavinaka ni na rawa vei au kei na watiqu me keirau vakatulewa ka kila deivaki se me keirau vakatara e dua na ka ki na loma ni neirau vale. Na neirau itavi me keirau vakavulici ira na luvei keirau me ra muria na Yalo i Karisito me rawa talega kina vei ira me ra kila na paisoni ni ra sotava.

Niu cuva toka e kea, ka saravi ira na manumanu lalai ni ra kauta tiko na paisoni ki na loma ni vanua era sokumuni toka kina, au yalataka niu na cakava na veika kece au rawata me kua ni curu kina ki noqu vale na paisoni.

E dusimaki au na idusidusi meu vakamiraka eso na wainimate wavokiti ira vakakina ena nodra ivakasokumu. Era qai cakava na qasivi na kena vo.