Veiqaravi ena Lotu
Vinaka, Baraca Jay
E vakaitikotiko na dauvolaivola mai Nevada, Amerika.
Au vakavinavinakataka na yalo, veicuqeni, vakavakarau, kei na loloma ni italai gugumatua tawawili era tiko taucoko ena Lotu.
“Ni mataka na Sigatabu,” au a tukuna vua na luvequ yalewa yabaki lima ni lokini no e sagaqu. A matadredredre okoya.
“O, sa vinaka,” a kaya okoya. “Sa na rawa ni’u raici Baraca Jay.”
Au a vakavinavinaka e lomaqu. Au loma vakavinavinaka ki na dua na qasenivuli dauloloma ka veikauwaitaki ni Lalai, ka a vakamamadataka na neitou toki ki na dua na tabanalevu vou ni cava na veitosoyaki. Ni biu tiko mai na neitou itikotiko e U.S. Midwest ka tokitaki tani ena 1,350 na maile (2,173 na kilomita) e sa dredre saraga ki na matavuvale taucoko ka vakabibi ki na neitou murivuli, o Season. Ni daumamadua, e a leqataka okoya na veituvaki vou ka a lomadredre ni tiko e valenilotu ena neitou matai ni macawa ena tabanalevu vou.
O Baraca Jay, e dua na turaga yalomalua, ka gugumatua, a veiwakitaka donu na gauna ni veiwali kei na veikauwaitaki me rawa kina na lomai Season. Ena matai ni Sigatabu oya a lolou sobu okoya, taura na ligana, raici koya vakadodonu, ka kaya, “Mai, daulomani. Ko na kune lasa ena noda kalasi.”
Ni toso tiko na macawa, sa vakanamata vakalevu cake o Season ki na Sigatabu mai na siga tale eso ena loma ni macawa. Ni gauna ga keitou yaco kina e valenilotu, ena vakaraici ira na ivavakoso okoya me baleti nona qasenivuli. E a matadredredre okoya ena veikidavaki.
Ena veiyabaki ena vakananumi ira na gonevuli yadua o Baraca Jay ena so na iloloma lalai ni vakacagicagi kei na siganisucu. Ni sa basika na siganisucu nei Season, na vulagi dokai duadua a vinakata okoya me sureta ki na nona pati oya o Baraca Jay.
E a rawa ni vakasamataka li okoya na veivakayarayarataki e sa mai rawata ena bula ni neitou yalewa lailai? Ena rawa ni kila vakacaca li okoya na kena sa mai vakamatautaki na nona vosa eso kei na ivalavala mai vei ira na nona ilawalawa gonevuli yabaki lima ena Lalai? Ena rawa ni kila vakaidina li okoya na kena vakaibalebale cake vei au, vaka e dua na tina, me tiko okoya me tiki ni bula ni luvequ yalewa?
Emuri, a tosocake o Season ki na kalasi nei Baraca Edward, ka tomana voli okoya na ka totoka a sotakaya ena Lalai. Au sa vakavinavinaka kivei ira taucoko na turaga kei na marama raiyawa, vakavakarau vinaka, ka yalomalua era a veivakayarayarataki vinaka vakayalo ki na bula nei Season.
E sa mai vakalougatataki na neitou matavuvale taucoko mai vei ira na tamata gugumatua era a qaravi keitou ena salatu ni neitou rawaka vakayalo. Au nanuma lesu e dua na Daunisikaute vakairogorogo, dua na daunivakasala dauvosota ena kuoramu ni bete, dua na qasenivuli manoa ni Semineri, e dua na mataveiliutaki ni Goneyalewa kilaitani, kei na dua na bisopi dauveikauwaitaki.
Me vaka ni sa mai vakalougatataki tu na neitou matavuvale, au kila ni keitou sega ni duatani. “O Baraca Jay” sa rawa ni vuqa na tamata, ni sa vuqa na tacida kei na ganeda gugumatua e sa tara tu na bula ni matavuvale na nodra veiqaravi me vakataki keitou. Keitou sa vakavinavinakataka na nodra yalovinaka, veicuqeni, vakavakarau, kei na loloma.
Vakavinavinaka ki na italai gugumatua tawawili era tiko taucoko ena Lotu ka ra tokona na neitou matavuvale.
Marau ni Siganisucu!
iTaba mai vei Nikolai Sorokin/Hemera/Thinkstock