Rongorongo man te Moan Beretitentii
Te Tataro n Onimaki
Iroun Beretitenti Henry B. Eyring
Moan Kauntira n te Moan Beretitentii
Te tataro e bon raka riki nakon taeka ake ti taekin nakon te Atua. Bon aron te kawai aika uoua n reitaki imarenan te Atua ma natina.
Ngkana e kamwakuraki te tataro n aron ae e bon riai, ti kaota ara namakin mai nanora inanon taeka aika bebete. Te Tama are i Karawa e kaekaira n aron ae tataneiai iai man karinan iango inanon ara kantaninga n raonaki ma ara namakin. E kaekai tataro ma te nano ae koaua n tainako ake ti anga ngkana ti tataro ma ara motinnano n ongeaba Irouna, n aki ongeia bwa tera Ana kaeka ke nningai rokon Ana kaeka.
E karaoa te berita aio te Uea nakoia ni kabane ake a wareka ao n tataroakina taekan ana Boki Moomon:
Ao ngkana a reke bwaai aikai iroumi, kaungai nanomi bwa kam na butia te Atua, te Tama ae akea Tokina, n aran Kristo, ngkana arona bwa a koaua bwaai aikai; ao ngkana kam bubuti ma te nano ae koaua ma nanomi raoi, ao te onimaki iroun Kristo, e na bon kaota te koaua nakoimi, ni mwaakan te Tamnei ae Raoiroi (Moronai 10:4).
“Man mwaakan te Tamnei are e Raoiroi kam na kona n atai koauan bwaai ni kabne” (Moronai 10:5).
Te berita anne e boni koaua. Mirion aomata a tia ni kataia ao ni kakoaua te berita ane kamimii anne n taekan te tataro man karekean te kakabwaia ake a tia ni kaonaki ma te kimwareirei ao te kukurei ae aki totoki inanon maiuia. Te berita anne e kaineti nakon ara tataro ni kabane n ataa ana iango ao ana kantaninga te Atua ibukira. Ti kona ni kamwakuria ngkana ti karekea te reirei mairoun ana toro te Atua are e a tia ni karekea te kariaiakaki n anganira kaetieti. N aron te katoto, ti kona ni katine iaana ngkana ti a tia n ongora n te kabwarabwara n te maungatabu ni kabuta. Ti kona ni kamwakuria ngkana ti reireiaki irouia mitinare aika nanorinano ake a weteaki iroun te Atua mairoun te burabeti ae maiu. E kaineti naba n aron te reirei are ti karekea mairoun ara bitiobi ke te beretitenti n te mwaanga.
Ibukin te tataro bwa e na iai kabwaiara iai inanon maiura, a bon bebete taian tua. Ti riai ni bubuti ni kan ataia bwa tera ae koaua man te tataro nakon te Tama are i Karawa n aran Iesu Kristo. Ti riai ni bubuti ma nanora ni koaua, are nanona bwa ti riai ni karekea te nano ae kokoaua ni karaoa ana kaeka te Atua are e kantaninga mai iroura. Ao nanora raoi e na riki mai imwiin ara onimaki iroun Iesu Kristo.
Te tia kakae are e wareka ana Boki Moomon imwain are e bwabetitoaki ao ni kamatoaki e na kaai ni karekea te kakoaua bwa e boni koaua te boki ao te kakoaua bwa Iotebwa Timiti e rairia ma ni mwaakan te Atua. Imwin kamatoakina n riki bwa te membwa n te Ekaretia, ti kona ni karekea te Tamnei ae Raoiroi n aron te tia raonira ni kamatoai koaua ake tabeua. Ngkanne, ngkana ti tataro n iai ara onimaki, ti kona ni kantaningaia bwa te Tamnei ae Raoiroi e na kaotia nakoira bwa Iesu bon te Kristo, bwa te Atua te Tama e bon maiu, ao bwa a tangiriira ao ni kabane natin te Tama are i Karawa.
Anne bukina teuana bwa iai te berita inanon ana Boki Moomon bwa ti na karekea te tangira ae kororaoi inanora n aron ae kaotia nakoira te Tamnei ae Raoiroi bwa Iesu bon te Kristo: “Ngkana e nimamannei ma n nanorinano nanona, ao e taekina ni mwaakan te Tamnei are e Raoiroi bwa Iesu bon te Kristo, ao e na riai n iai te tangira ae kororaoi irouna” (Moronai 7:44).
E na iai te tai ni kakabwaia ni kona n riki n rikirake n te maiu n tamnei ni katoa te tai n aki mamatam n te Tabati. Te tai n aki mamatam n te Tabati e kona ni buokira n rinanon naba te taneiai are e rinanona Aramwa ao natin Motiaea aika mwaane, ake a tataro ao n aki mamatam n ataa te koaua ae akea tokina bwa a aonga ni kona n reireinia taian Reimwanaite ma te mwaaka, te kariaia, ao te tangira (taraa Aramwa 17:3, 9).
N te tai n aki mamatam n te Tabati ti ikota te tataro ao te aki mamatam. Ibukin kakabwaiakia ake a kainnano, ti anga te angabwai n aki mamatam ae tituaraoi nakon te bitiobi ke te beretitenti n te mwaanga are e bootau ma uoua ara tai n amwarake ake ti aki kang. Ara iango ao ara tataro a rairaki nakon te Tia Kamaiu ao nakoia naake E na anganiira bwa ti na beku ni buoka kainnanoia n te maiu n tamnei ao n rabwata.
Ara tataro ma nanora n aron anne a na rang uakaan riki n aron raoi ana tataro ao nanon te Tia Kamaiu ngkai ti aki mamatam bwa ti na kona n riki ni mamannei, ni kan reirei, ao n tatangira. Ao ngkai E karaoia, ti tataro bwa ti na ataa ana kantaninga te Tama ibukira ao ni karaoia.