« E piti mahana hanahana no te mau poro‘i faaûru »

« E piti mahana hanahana no te mau poroʻi faaûru, ta tatou i ratere a‘enei », te parau ïa a te peresideni Thomas S. Monson i te hoperaa te 184raa o te amuiraa rahi afa matahiti i te sabati 5 no atopa 2014.

Tei roro i teie mau parau poro‘i te faufaa no te faananearaa i te hoê iteraa papû o te faati‘a ia outou ia faaoroma‘i i te mau huru oraraa atoa ; te peeraa i te e‘a o te Faaora e te riroraa ei pĭpĭ itoito ; te peeraa e te patururaa i te mau peropheta ; te faaohiparaa i te ti‘amâraa ma te paari ; e te faariroraa i te fare ei vahi no te here, te paruru, te hi‘oraa maitai, e te haapiiraa i te evanelia.

I roto i ta’na a‘oraa iritiraa i te mahana maa, ua faahiti te peresideni Monson e te tamau noa nei te Ekalesia i te tupu i te rahi. « Ua hau tatou i te 15 milioni ti‘ahapa, pautuutu maitai e te rahi noa ra te numera » te parau ïa a te peresideni Monson. « Te haere noa ra ta tatou tautooraa misionare i mua ma te taupupu ore. Ua hau i te 88 000 misionare e tavini ra, o te faa‘ite ra i te poro‘i o te evanelia i to te ao atoa nei ».

I te tuhaa pureraa o te avatea mahana maa, ua haamauruuruhia o Elder Carlos H. Amado e o Elder William R. Walker ei melo te pŭpŭ matamua o te Hitu Ahuru e ua faatuhaahia raua. Ua haamauruuruhia o Elder Arayik V. Minasyan e o Elder Gvido Senkans ei Hitu Ahuru Area.

No te taime matamua roa i roto i te amuiraa rahi, ua horo‘a mai te tahi mau taata a‘o i ta ratou a‘oraa eiaha na roto i te reo peretane, na roto râ i to ratou iho reo tumu. Ua paraparau mai Elder Chi Hong (Sam) Wong na roto i te reo cantonais, o Elder Eduardo Gavarret e o Elder Hugo E. Martinez na roto te reo paniola e o Elder Carlos A. Godoy na roto i te reo potiti.

Ua î na parahiraa e 21 000 i te taata, i te Pû Amuiraa e i te mau tuhaa i te pae no Temple Square i Roto Miti, Utah, i te mau Hau Amui no Marite, i te mau tuhaa pureraa tata‘itahi o te amuiraa, e ua hau i te 90 reo tei iritihia e ua haapurorohia i roto hau atu i te 170 mau fenua. Hau atu, ua roaa te reira na roto i te afata teata, te ratio, te haapurororaa pee‘utari, e te itenati, oia’toa te mau matini afa‘ifa‘i. E tapa‘o teie amuiraa no te 90raa o te matahiti no te mau haapurororaa ratio e te 65raa o te matahiti no te haapurororaa afata teata o te amuiraa.

Ua paraparau te peresideni Thomas S. Monson i roto i te tuhaa pureraa o te avatea sabati i te amuiraa rahi.