Ua horo‘a te faanahoraa LDS Charities i te tauturu

Mai te mau mahana matamua o te Faaho‘i-faahou-raa mai, ua mâtauhia te mau melo o te Ekalesia a Iesu Mesia i te Feia Mo‘a i te Mau Mahana Hopea Nei no to ratou hinaaro rahi ia amo e ia paturu i te feia e mauiui ra.

I te mau matahiti i ma‘iri a‘enei, ua horo‘a te mau melo o te Ekalesia e vetahi ê atoa, na roto i te mau pûpûraa pipiri ore, i te mau rave‘a i te mau faanahoraa a te Ekalesia no te tautururaa i to te ao nei, no te haamaitai i te oraraa o te mau taata. I te matahiti 2013 noa, ua tauturu te mau faanahoraa tautururaa i to te ao nei a te Ekalesia, hau atu i te 10,5 milioni taata i roto e 130 fenua.

Ua riro te tautooraa i te horo‘araa i te au maitai e te mau mea e haamaitai i te ora, te roaaraa te pape mâ ; te haapiipiiraa i te ohipa vahine faafanau e te ohipa taote no te faaora e tauatini mau aiû apî ; te horo‘araa i te mau parahiraa tura‘ira‘i. Taa ê noa’tu te reira, ua tauturu te Ekalesia i roto i te raveraa e te haapiipiiraa i te rapaauraa i te mata, te mau patia paruru, e te faaapuraa i te mau maa maitai no te tino i tera e tera vahi taata.

Tautururaa i te feia tei horo ê i to ratou fenua

Ua tautoo tamau e ua tautoo rahi te Ekalesia no te tauturu i te feia tei horo ê i to ratou fenua oia’toa te feia tei faaruru i te tama‘i e te maa ore. Aita i maoro a‘enei :

Ua horo‘a ô te Ekalesia e tauatini mau fare ie e te maa e hinaarohia i te mau utuafare no te fenua Chad e ua hamani i te mau apoo pape pamu rima, te mau vahi haumitiraa e te mau fare hapuraa pape i roto i te mau puhaparaa o te feia tei horo ê i to ratou fenua i Burkina Faso.
I Ioridana, i Suria, i Lebanona, i Irakia e te tuhaa fenua Kurde, ua opere te faanahoraa LDS Charities i te mau puohu maa, te mau ahu taoto, te mau raau rapaau, te mau vairaa no te tama i te tino, te mau ro‘i e te mau ahu mahanahana no te tau to‘eto‘e. I te tuhaa fenua Irakia e Kurde, ua horo‘ahia te mau parahiraa tura‘ira‘i e te tahi atu mau tauihaa no te hahaere i te mau taata pêpê i roto i te mau tama‘i.
I Gaza, ua pûpûhia te mau raau rapaauraa, te mau mauihaa rapaauraa, e te û puehu i te fare ma‘i rahi.
I Iseraela, ua horo‘ahia te tahi matini no te « échographie » i te hoê fare ma‘i.
I Ukraine e i Rusia, ua apiti te Ekalesia i te faanahoraa a te ONU no te horo‘a i te maa, te ro‘i, te ahu, e te mau mea no te tama i te tino, no e 30 000 taata tei faanuuhia i te taime o te arepurepuraa tivira.

Te haa nei te faanahoraa LDS Charities no te faaea i rapae i te mau aroraa poritita e no te tauturu i te feia noa’tu te huru o ta ratou faaroo.

Te mau tautooraa tautururaa

Ua pahono atoa te Ekalesia i te mau taime o te mau ati natura.

I Sierra Leone e i Liberia, ua tihepu te Ekalesia e 1 600 feia tamoni ore o te fenua iho no te horo‘a i te haapiipiiraa e nahea ia ape i te mau tirotiro Ebola e ua horo‘a i te maa e te mau rave‘a tamâraa e te mau tauihaa rapaauraa ma‘i.
I muri mai i te mau pape pu‘e tei tupu no te mau ua puai i Pakistan e i Initia, ua horo‘a te Ekalesia i te maa, te mau tauihaa no te tamâ i te tino, e te mau tauihaa rapaauraa ma‘i.
I Tona, ua haamou te hoê mata‘i rorofa‘i e hanere rahiraa fare, oia’toa te fare o e 116 utuafare melo. E tauturu te mau melo i te patu-faahou-raa i to ratou fare. Ua farii ratou i te haapiipiiraa e nahea ia patu i to ratou iho puhaparaa e i muri iho ua anihia ia tauturu atu e maha a‘e taata ia patu i to ratou. Ua haamau atoa te Ekalesia i te mau faaapu e ua horo‘a i te haapiipiiraa no te faaapuraa i te fare.
I Mehiko, i to te mata‘i rorofa‘i tu‘inoraa e aore râ tuparariraa e tauatini fare, ua horo‘a te feia faatere o te Ekalesia o te fenua iho i te maa, te pape na te mau melo tei roohia te ati, e ua ohipa te Ekalesia na muri iho i te hau o te fenua no te horo‘a i te mau tauihaa maa.

E aha ta outou e nehene e rave

Na te mau ô i te afata Tautururaa i to te ao nei (Aide humanitaire) e faati‘a i te Ekalesia ia pahono oioi i te mau ati. Hau atu, i te mau vahi tei reira ratou i te oraraa, e nehenehe te mau melo e faa‘ite i te here huru Mesia, e horo‘a i te taviniraa, e e faarahi i te faatura no te mau taata atoa. Ia hi‘o tatou i te feia tei horo ê i to ratou fenua e te mau taata eê e tae mai nei i roto i to outou oire, e aore râ te feia tei roohia te ati, e ia horo‘a’tu tatou i te faahoaraa, te mana‘ona‘oraa e te vahi au maitai, e ohipa huru Mesia ïa te reira o te ore roa e mau‘a.

Na roto i to’na rima tautururaa i to te ao nei, te tautoo nei te Ekalesia i te faatupu i te a‘o a te peresideni Thomas S. Monson e « e nehenehe ia tatou ia faaitoito te tahi e te tahi ; e ti‘a ia tatou ia tau‘a atu i te feia tei tau‘a-ore-hia. Ia mau ana‘e tatou i te mata o te ite, te tari‘a o te faaroo, e te aau o te ite, i reira e ti‘a ai ia tatou ia toro i te rima no te faaora mai » (« Te piiraa no te Tavini », Liahona, Tenuare 2001, 58).

Te farerei nei te peresideni no te mataeinaa no Amman Jordan, e ta’na tamahine, i te tahi mau taata tei horo ê i to ratou fenua ai‘a.

SARAH JANE WEAVER, CHURCH NEWS