Ia ora mai te au i te mau parau a te mau peropheta

Na Carol F. McConkie

Tauturu matamua i roto i te peresideniraa rahi o te Feia Apî Tamahine

No te faaau maite ia tatou i ni‘a i te mau opuaraa hanahana o te ra‘i ra, e turu tatou i te peropheta ma te ma‘iti ia ora mai te au i ta’na mau parau.

Te here nei to tatou Metua i te Ao ra i Ta’na mau tamarii paatoa e te hinaaro nei Oia ia ite e ia haroaroa ratou i Ta’na faanahoraa no te oaoa. No reira, ua pii Oia i te mau peropheta, o ratou tei faatoro‘ahia i te mana e te haamanaraa no te rave i te ohipa i te i‘oa o te Atua no te faaoraraa i Ta’na mau tamarii. E mau ve‘a ratou no te parau ti‘a, e faa‘ite ratou ia Iesu Mesia e i te mana hope ore o Ta’na Taraehara. Te mau nei ratou i te mau taviri o te basileia o te Atua i ni‘a i te fenua nei e na ratou e faati‘a ia ravehia te mau oro‘a faaora.

I roto i te Ekalesia mau a te Fatu, « aita’tu maori râ te taata hoê i ni‘a i te ao nei i te taime hoê o tei horo‘ahia’tu teie nei mana e te mau taviri hoi no teie nei autahu‘araa ».¹ Te paturu nei tatou i te peresideni Thomas S. Monson ei peropheta no tatou, ei hi‘o e ei heheu parau. Te heheu mai nei oia i te parau a te Fatu no te arata‘i e no te haapii i ta tatou Ekalesia taatoa. Mai ta te peresideni J. Ruben Clark Jr. i faataa mai, « O te Peresideni o te Ekalesia… ana‘e tei mau i te ti‘araa no te farii i te mau heheuraa no te Ekalesia ».²

No ni‘a i te peropheta ora, te faaue mai nei te Fatu i te mau taata o Ta’na Ekalesia :

« E haapa‘o outou i ta’na mau parau e i ta’na mau faaueraa atoa o ta’na e horo‘a’tu ia outou mai te noaa ia’na ra, i te haereraa mo‘a i mua ia’u nei ;

« E farii hoi outou i ta’na parau mai te mea ra e no roto i to’u iho nei vaha, mai te faaoromai e te faaroo.

« No te mea na roto i te raveraa i teie nei mau mea e ore roa outou e noaa i te mau uputa o hade ».³

No te faaau maite ia tatou i ni‘a i te mau opuaraa hanahana o te ra‘i ra, e turu tatou i te peropheta ma te ma‘iti ia ora mai te au i ta’na mau parau.

E paturu atoa tatou i te mau tauturu o te peresideni Monson e i te Pŭpŭ no te Tino Ahuru Ma Piti Aposetolo ei mau peropheta, ei mau hi‘o, e ei mau heheu parau. « E ti‘araa to ratou, e puai e e mana no te faaite i te mana‘o e i te hinaaro o [te Fatu]… i raro a‘e i te peresideni o te Ekalesia ».⁴ Te parau nei ratou na roto i te i‘oa o te Mesia. Te tohu nei ratou na roto i te i‘oa o te Mesia. Te rave nei ratou i te mau ohipa atoa na roto i te i‘oa o Iesu Mesia. I roto i ta ratou mau parau, e faaroo tatou i te reo o te Fatu e e ite tatou i te here o te Faaora. « E te mau mea atoa ta ratou e parau ra ia ûrûhia ra e te Varua Maitai e riro ïa ei parau mo‘a… e te mana hoi o te Atua e tae noa’tu i te ora ».⁵ Ua parau te Fatu iho : « Na roto i to’u iho reo e a ore râ na roto i te reo o ta’u mau tavini, hoe â ia ».⁶

Te oaoa nei tatou no te ekalesia « i patuhia i ni‘a iho i te niu a te mau aposetolo e te mau peropheta ra, e o Iesu Mesia iho te ofa‘i tihi rahi ».⁷ E fare nahonaho te fare o te Fatu, e eita roa’tu tatou e hape i te vahi i reira tatou e imi ai i te mau pahonoraa i ta tatou mau uiraa e aore râ, eita tatou e tapetepete te mana‘o no te ite e, e aha te reo e haapa‘o. Eiaha tatou « ia aueue noa i te mata‘i ra, i tera parau, i tera parau ».⁸ Te heheu mai nei te Atua i Ta’na parau na roto mai i Ta’na mau tavini faatoro‘ahia, « ei faaau i te feia mo‘a i te ohipa ra e orometua, ia tupu i te maitai te tino o te Mesia ra : ia riro tatou atoa nei ei taata paari, i te faaroo hoê e te ite hoê i te Tamaiti a te Atua ».⁹ Ia faaoti tatou ia ora mai te au i te mau parau a te mau peropheta, tei ni‘a iho ïa tatou i te e‘a no te fafauraa e tae atu ai i te maitai mure ore ra.

No roto mai i te hoê metua vahine otahi e tautoo ra ia noaa te ora i roto i te hoê pu‘e tau o‘e, e haapii mai tatou i te auraa no te mau parau ra, e paturu i te hoê peropheta. Ua parau atura te Fatu i te peropheta Elia ia haere i Zarephate, i reira oia e ite atu ai i te hoê vahine ivi ta te Atua i faaue ia paturu ia’na. Ia fatata mai te oire ia Elia, ite atura oia i te vahine te ohi haere ra i te vahie. Ua pii atura oia ia’na, « A hopoi mai na i te hoê maa pape i roto i te faarii, ia inu vau ».¹⁰

« E te tii atura oia i taua pape ra, ua parau atura oia ia’na na ô atura, hopoi atoa mai i te tahi maa pane i to rima na.

« Ua parau maira oia, te ora ra to Atua o Iehova, aita roa a’u e maa ama, maori râ te hoê maa faraoa hoê rima e î tei roto i te hue, e te hoê maa hinu i roto i te farii ; e inaha, te ohi haere nei au i te maa vahie, a haere ai au i roto a tunu ai na maua, a pohe atu ai ».

Ua pahono atura Elia, « Eiaha e mata’u ; e haere râ oe e na reira ta oe i parau ra : e mata na râ i te hamani i te hoê vahi iti na’u, a hopoi mai ai ia’u nei, a hamani ai i ta oe e ta to tamaiti ».¹¹

A feruri na tatou i te hoê taime i te fifi o te mea ta te peropheta e ani nei i te hoê metua vahine po‘ia ia rave. E mea papû e, e nehenehe ta te Atua iho e horo‘a mai i te maa na To’na tavini haapa‘o maitai. Tera râ, i te i‘oa o te Fatu, ua rave Elia mai tei faauehia mai, oia hoʻi, ia ani i te hoê tamahine here a te Atua ia faatusia i ta’na mau mea atoa no te paturu i te peropheta.

Areʻa râ, ua fafau atoa Elia i te hoê haamaitairaa no te haapa‘o : « Te na ô maira hoi te Atua o Iseraela a Iehova, e ore te hue faraoa e iti, e ore hoi e pau te faarii hinu ».¹² Ua horo‘a te Fatu i te vahine ivi i te rave‘a ia ma‘iti ia ti‘aturi e ia haapa‘o i te mau parau a te peropheta.

I roto i te hoê ao tei haamata‘uhia i te o‘e i te parau ti‘a e te po‘ia i te pae varua, ua faauehia mai ia tatou ia paturu i te peropheta. Mai te mea e, e haapa‘o tatou, e paturu, e e faaite i te parau tohu, te faaite ra ïa tatou e, e faaroo to tatou no te faahaehaa ia tatou i raro a‘e i te hinaaro, te paari e te taime a te Fatu.

E haapa‘o tatou i te parau tohu noa’tu e, mai te huru ra e, e ere i te mea tano, e ere i te mea ohie, e e ere i te mea au roa. Ia au i te mau ture a to te ao nei, e riro te peeraa i te peropheta ei ohipa au-ore-hia e te taata, ei ohipa tano ore i te pae poritita, e aore ra, ei ohipa ta te sotaiete e ore farii. Tera râ, te peeraa i te peropheta e ohipa ti‘a ïa i te mau taime atoa. « Mai te ra‘i nei hoi e teitei rahi to’na i to te fenua ; oia atoa to’u ra haerea, e teitei ïa i to outou haerea, e to’u ra mau mana‘o i to outou ra mau mana‘o ».¹³ « E ti‘aturi ia Iehova ma to aau atoa ra ; eiaha râ e ti‘aturi i to oe ihora haapa‘o ».¹⁴

E faahanahana e e haafaufaa te Fatu i te taata e haapa‘o i te arata‘iraa a te peropheta. No te vahine ivi no Zarephate, ua ora oia e ta’na tamaiti i to’na haapa‘oraa i te parau a Elia. Mai ta te peropheta i fafau mai, « ua amu ihora oia e o Elia ; e to’na atoa utuafare, e rave rahi a‘era te mahana… ta Iehova hoi i parau mai, i te vaha o Elia ra ».¹⁵

« E faaamu [te Fatu] i te taata e ti‘aturi Ia’na ».¹⁶ E au te parau a te mau peropheta mai te mana no to tatou varua. Ia amu ana‘e tatou, e haamaitaihia, e paruruhia e e faahereherehia tatou i te pae tino e i te pae varua. Ia amu maitai ana‘e tatou i ta ratou parau, e haapii mai tatou nahea ia haere i te Mesia ra e ia ora.

Ua papa‘i Elder Bruce R. McConkie e, na roto i te mau peropheta « e heheu mai te Fatu i te mau parau mau no te faaoraraa… te faaoraraa tei roto i te Mesia ; e te huti nei oia i te reni… no te haerea e tae atu ai i te ora mure ore ra… I te mau tau atoa, te horo‘a mai nei te Fatu i to’na mau taata i te arata‘iraa e hinaarohia e ratou i te taime o to ratou ati e te pe‘ape‘a. E e mea papû e, i te mau mahana i muri nei, te vai ra te taime, aore hoê mea ê atu i te paari o te Atua, o te na ni‘a mai i te ra‘i i te taheraa na roto mai i te utu o te peropheta, e faaora i to’na mau taata ».¹⁷

No’u nei, na te mau parau a te mau peropheta tei haapiihia mai e to’u orometua no te pŭpŭ Tarona, i horo‘a mai ia’u i te hoê iteraa no ni‘a i te huru o te autaatiraa i roto i te fafauraa o te faaipoiporaa. Na te mau parau a te mau peropheta i horo‘a mai ia’u i te faaroo e i te ti‘aturiraa e, e nehenehe ta’u e faaineine no te farii i te hoê utuafare oaoa. Na te tuatapapa-tamau-raa i te mau haapiiraa a te mau peropheta, to mutaa iho ra e to teie tau apî, i paturu ia’u i roto i te mau matahiti teimaha e te rohirohi i te amoraa, te haapiiraa e te faaamuraa e hitu tamarii. Te mau parau a te mau peropheta i roto i te mau papa‘iraa mo‘a e tei haapiihia i mua i teie purupiti, e mau parau tamahanahana ïa, e mau parau here, e mau parau faaitoito, e e mau parau oaoa o te tauahi nei ia tatou paatoa.

Mai te mea e, e haapa‘o tatou i te mau parau a te mau peropheta, te patu ra ïa tatou i to tatou fare e to tatou oraraa i ni‘a i te hoê niu papû mure ore, « te papa o to tatou ora, o te Mesia ïa, o te Tamaiti a te Atua hoi, e ia hapono mai te diabolo i to’na ra mata‘i u‘ana, e ta’na mau ohe na roto i te puahihio, e ia ma‘iri mai to’na ra ûa paari, e to’na vero rahi i ni‘a iho ia orua ra, e ere oia i te mana i ni‘a iho ia orua e putôhia‘i orua i raro i te… mamae e te oto mure ore ra ».¹⁸

E nehenehe tatou e ma‘iti. E nehenehe tatou e ma‘iti eiaha e tau‘a, e ha‘uti i te reira, e taataahi, e aore ra, e pato‘i i te mau parau a te Mesia tei parauhia mai e To’na mau tavini tei faatoroʻahia. Tera râ, ua haapii mai te Faaora e, te taata atoa e na reira, e tapu-ê-hia ïa ratou i To’na mau taata i fafauhia ra.¹⁹

Mai te mea e, e tai‘o tatou e e tuatapapa tatou na roto i te pure i te parau tohu mo‘a ma te faaroo i te Mesia, e ma te aau tae mau, e parau mai te Varua Maitai i te parau mau i roto i to tatou feruriraa e i to tatou aau. E mata na tatou i te haafatafata i to tatou tariʻa ia faaroo, i to tatou aau ia ite, e i to tatou mana‘o ia faaitehia mai te mau mea taa ê a te Atua ia outou na.²⁰

Te faaite nei au i to’u iteraa papû e, ua riro o Iosepha Semita i mutaa iho ra e i teie mahana ei peropheta piihia e te Atua no te faaho‘i mai i te evanelia a Iesu Mesia e i Ta’na autahu‘araa i ni‘a i te fenua nei. E te faaite papû nei au e, na roto i te peresideni Monson, te arata‘ihia nei tatou na te hoê peropheta mau o te Atua i teie mahana. E mata na tatou i te ma‘iti ia ti‘a i piha‘i iho i te mau peropheta e ia ora mai te au i ta ratou mau parau e tae roa’tu i te taime e tahoêhia ai tatou i roto i te faaroo, e tamâhia ai i roto i te Mesia, e e faaîhia i te ite i te Tamaiti a te Atua. Na roto i te i‘oa mo‘a o Iesu Mesia ra, amene.

Te mau nota

1. Te Parau Haapiiraa e te Mau Parau Fafau 132:7 ; hi‘o atoa Manuel 2 : Administration de l’Église (2010), 2.1.1: « Tei ia Iesu Mesia ra te mau taviri atoa o te autahu‘araa tei itehia i roto i te Ekalesia. Ua horo‘a Oia i ni‘a i Ta’na mau aposetolo tata‘itahi i te mau taviri atoa e au i to’na basileia i ni‘a i te fenua nei. O te aposetolo matahiapo ora, te Peresideni o te Ekalesia, te taata hoê i ni‘a i te fenua nei tei faati‘ahia ia faa‘ohipa i te mau taviri atoa o te autahu‘araa ».

2. J. Reuben Clark Jr., « When Are the Writings and Sermons of Church Leaders Entitled to the Claim of Scripture ? » (a‘oraa tei horo‘ahia i mua i te feia ohipa no te faanahoraa no te haapiiraa evanelia séminaire e te institute, Brigham Young University, 7 no tiurai 1954).

3. Te Parau Haapiiraa e te Mau Parau Fafau 21:4–6 ; reta tei faahuru-ê-hia.

4. J. Reuben Clark Jr., « When are the Writings and Sermons of Church Leaders Entitled to the Claim of Scripture ? »

5. Te Parau Haapiiraa e te Mau Parau Fafau 68:4.

6. Te Parau Haapiiraa e te Mau Parau Fafau 1:38.

7. Ephesia 2:20.

8. Ephesia 4:14.

9. Ephesia 4:12–13.

10. 1 Te mau Arii 17:10.

11. 1 Te mau Arii 17:11–13 ; reta tei faahuru-ê-hia.

12. 1 Te mau Arii 17:14.

13. Isaia 55:9.

14. Maseli 3:5.

15. 1 Te mau Arii 17:15–16.

16. Roger Hoffman, « Consider the Lilies ».

17. Bruce R. McConkie, A New Witness for the Articles of Faith (Deseret Book Company, 1985), 478 ; ua tauihia te mau pereoda ; faa‘ohipahia ma te parau faati‘a.

18. Helamana 5:12.

19. Hi‘o 3 Nephi 20:23.

20. Hi‘o Mosia 2:9.