Te oroʻa moʻa e te Taraehara

Na Elder James J. Hamula

No te Hitu Ahuru

E tiʻa i teie oroʻa no te oroʻa moʻa ia riro ei mea hau atu i te moʻa no tatou tataʻitahi.

I te aruʻi hou te ohipa i tupu i Getesemane e i Kalavaria, ua haaputuputu Iesu i Ta’na mau aposetolo no te taime hopea no te haamori. Tei roto ïa i te hoê piha i te tahua i niʻa o te fare o te hoê pĭpĭ i Ierusalema, i te anotau no te oroʻa Pasa.¹

Na mua ia ratou te tamaaraa Pasa i matarohia, oia hoi, te arenio tusia, te uaina, e te faraoa hopue ore, tapaʻo no to Iseraela faaoraraa i tahito ra mai roto mai i te faatîtîraa e te pohe,² e no te hoê faaoraraa e tae mai a muri aʻe.³ A fatata ai te tamaaraa i te hope, ua rave aʻera Iesu i te pane, haamaitai ihora e vavahi ihora,⁴ e horoʻa’tura i Ta’na ra mau aposetolo, na ô atura, « a rave, a amu ».⁵ « O ta’u tino teie e horoʻahia na outou nei, e na reira outou ei manaʻoraa ia’u ».⁶ E mai te reira atoa, ua faateitei aʻera oia i te auʻa uaina, haamaitai ihora i te reira, e horoʻa’tura i te feia e haati ra Ia’na, na ô atura : « Teie nei auʻa, o te faufaa apî ïa i to’u nei toto »,⁷ « i haamaniihia… ia matara te hara ».⁸ « E na reira outou ei manaʻoraa ia’u ».⁹

Na roto i teie raveraa ohie e te hohonu, ua haamau Iesu i te hoê oroʻa apî no te mau taata fafauhia o te Atua. E ore roa te toto animara e haamanii-faahou-hia e aore ra, te iʻo animara e amu-faahou-hia ei faahohoʻaraa i te tusia faaora a te Mesia o te tae mai.¹⁰ E ravehia râ e e amuhia te mau tapaʻo o te iʻo i ofatifatihia e te toto o te Mesia i haamaniihia tei haere mai, ei haamanaʻoraa i Ta’na tusia faaoraraa.¹¹ Ua riro te raveraa i teie oroʻa apî ei faaiteraa i te mau taata atoa i te hoê fariiraa ma te hanahana ia Iesu ei Mesia i fafauhia mai e te peeraa Ia’na e te haapaʻoraa i Ta’na mau faaueraa ma te aau atoa. No ratou o te faaite e o te faaau i to ratou oraraa mai te reira te huru, e « na niʻa aʻe » te pohe varua ia ratou, e haapapûhia to ratou ora mure ore.

I roto i te mau hora e te mau mahana i muri mai, ua tomo Iesu i Getesemane, ua hopoihia i Kalavaria, e ua faaruʻe i te menema no Arimatea. I muri aʻe i To’na faaruʻeraa mai ia ratou, ua putuputu te mau pĭpĭ faaroo a Iesu no roto e no pihaʻi iho ia Ierusalema, i te mahana matamua o te hepetoma no te « vavahi i te pane ra »¹² e ua rave ratou i te reira « ma te mau papû ».¹³ Oia mau, ua rave ratou i te reira eiaha no to ratou noa Fatu here tei reva ê, no te faaite atoa râ i te mauruuru e i te faaroo i roto i Ta’na faaoraraa nehenehe ia ratou.

To’na auraa, a farerei ai Iesu i Ta’na mau pĭpĭ i te fenua Amerika, ua haamau atoa oia i te oroʻa moʻa i rotopu ia ratou.¹⁴ A rave ai Oia i te reira, na ô atura oia : « E na reira atoa outou i te rave e a muri noa’tu »¹⁵ e « e riro ïa ei faaite i te Metua, e te haamanaʻo ra outou ia’u e a muri noa’tu ».¹⁶ Faahou â, i te omuaraa o te faahoʻi-faahou-raa mai, ua haamau faahou te Fatu i te oroʻa no te oroʻa moʻa, ma te horoʻa mai i te mau arataʻiraa ia tatou mai Ta’na i horoʻa’tu i Ta’na mau pĭpĭ i tahito ra.¹⁷

Ua parauhia te oroʻa no te oroʻa moʻa « te hoê o te mau oroʻa moʻa roa aʻe i roto i te Ekalesia ».¹⁸ E mea tiʻa ia riro ei mea hau atu i te moʻa no tatou tataʻitahi. Na Iesu Mesia Iho i haamau i te oroʻa no te faahaamanaʻo ia tatou i te ohipa Ta’na i rave no te faaora ia tatou e no te haapii ia tatou e nahea ia faaohipa maitai i Ta’na Faaoraraa e ia ora faahou i pihaʻi iho i te Atua.

Na roto i te faraoa tei vavahihia, te faaite nei tatou e, te haamanaʻo nei tatou i te tino tahuti o Iesu Mesia―te hoê tino tei faaaueuehia i te mamae, te ahoaho e te mau huru faahemaraa atoa,¹⁹ te hoê tino tei amo i te hopoiʻa o te oto, tei faatahe i te toto na te mau poa atoa,²⁰ te hoê tino tei mahaehae te iri e tei haapohehia te mafatu i roto i te faasatauroraa.²¹ Te faaite nei tatou i to tatou tiʻaturi e, a vai ai te reira tino i roto i te pohe, ua tiʻafaahou mai oia ia ora mai te menema mai, no te ore roa e ite faahou i te maʻi, te pê, e aore ra, te pohe.²² E ia amu tatou i te pane, te faaite ra tatou e, mai te tino pohe o te Mesia, e faaora-faahou-hia to tatou tino i te mau ruuruu o te pohe, e e tiʻafaahou mai ma te hanahana mai roto mai i te menema, e e faahoʻi-faahou-hia i to tatou varua mure ore ra.²³

Na roto i te hoê hapaina pape naʻinaʻi, te faaite ra tatou e, te haamanaʻo nei tatou i te toto o Iesu i haamaniihia, e te mamae i te pae varua Ta’na i faaruru no te mau taata atoa. Te haamanaʻo nei tatou i te ahoaho tei faatahe mai i te mau topataraa toto tei topa i roto i Getesemane.²⁴ Te haamanaʻo nei tatou i te pepe e te taʻiriraa Ta’na i faaruru mai roto mai i te feia tei haru Ia’na.²⁵ Te haamanaʻo nei tatou i te toto tei manii na roto mai i to’na na rima, te avae e te aoao i Kalavaria.²⁶ E te haamanaʻo nei tatou i To’na iho manaʻo no niʻa i to’na mamae : « Te rahiraa o te reira mamae aore roa i itea ia oe, te huru mau o te reira mamae aore roa hoi i itea ia oe ».²⁷ Ia inu tatou i te pape, te faaite ra tatou e, ua riro To’na toto e To’na mamae ei taraehara no ta tatou mau hara, e e faaore hoi Oia i ta tatou mau hara mai te mea e, e farii e e haapaʻo tatou i te mau parau tumu e te mau oroʻa o Ta’na evanelia.

No reira, na roto i te pane e te pape, te faahaamanaʻohia ra tatou i te faaoraraa a te Mesia ia tatou i te pohe e te hara. E mea faufaa te anaʻiraa te pane na mua e te pape i muri iho. Ia amu tatou i te pane, te faahaamanaʻo ra te reira ia tatou i to tatou iho tiʻa-faahou-raa papû, e ere ïa i te faahoʻi-noa-raa i te tino e te varua. Na roto i te mana o te tiʻa-faahou-raa, e faatiʻa-faahou-hia tatou paatoa i mua i te aro o te Atua.²⁸ Na te reira e faaite mai ia tatou i te uiraa faufaa o to tatou oraraa. Te uiraa tumu e vai nei i mua ia tatou e ere ïa e, e ora anei tatou, e ui râ e, i pihaʻi iho ia vai tatou e ora ai ia pohe tatou. E hoʻi paatoa tatou i mua i te aro o te Atua, tera râ, e ere tatou paatoa te faaea i pihaʻi iho Ia’na.

Na roto i te tahuti nei, e riro tatou paatoa ei mea viivii i te hara e te ofatiraa ture.²⁹ To tatou mau manaʻo, ta tatou mau parau e ta tatou mau ohipa, e riro ïa ei mea viivii.³⁰ Ei haapotoraa, e riro tatou ei mea viivii. E te hopearaa no te viivii i mua i te aro o te Atua, ua haapapû maitai mai Iesu : « Aore hoi te mea viivii e parahi… i mua ia’na.³¹ Ua haapapû-maitai-hia te reira parau e Alama tamaiti, i te taime a faahapahia ai oia e te hoê melahi moʻa, ua mauiui roa oia, ua oto, e ua ahoaho roa i to’na viivii, no reira, ua hinaaro aʻera oia « ia faaorehia hoi i te varua e te tino atoa hoi, ia ore [oia] ia faatiahia i mua i te aro o… te Atua ».³²

Na roto i te inuraa i te pape o te oroʻa moʻa, ua haapiihia mai ia tatou e mea nahea ia tamâ ia tatou i te hara e te ofatiraa hara, e a tiʻa ai i mua i te aro o te Atua. Na roto i haamaniiraa Oia i To’na toto hara ore, ua faatiʻa Iesu Mesia i te mau titauraa a te parau tiʻa no te mau hara e te ofatiraa ture. E ua parau mai oia e tamâ Oia ia tatou mai te mea e, ua navaʻi to tatou faaroo Ia’na no te tatarahapa ; no te farii i te mau oroʻa e te mau fafauraa atoa no te faaoraraa, e haamata na roto i te bapetizoraa ; e ia farii i te Varua Maitai. Ia farii tatou i te Varua Maitai, ei reira tatou e tamâhia ai. Ua haapapû maitai mai Iesu i teie haapiiraa tumu :

« E ore e ô te mea viivii i roto i te basileia [o te Atua]… e ore te taata e tomo i roto i to’na faaearaa, maori râ o tei mâ to ratou ahu i to’u ra toto…

E teie nei ; tera te faaue, e tatarahapa, e to te mau otia no te fenua, e haere mai ia’u, e bapetizohia i to’u iʻoa, ia moʻa outou i te noaaraa mai te Varua Maitai, ia tia outou ma te porao ore i mua ia’u i te mahana hopea ra ».³³

Teie te haapiiraa tumu a te Mesia.³⁴ Ia farii anaʻe tatou i teie haapiiraa tumu e ia faaau i to tatou oraraa i niʻa i te reira, ua tamâhia ïa tatou i te toto o te Mesia e ua riro ei mea viivii ore.³⁵

Na roto i te mau pure o te oroʻa moʻa, te faaite nei ïa tatou i to tatou farii i te haapiiraa tumu a te Mesia e to tatou fafauraa ia ora mai te au i te reira haapiiraa. I roto i ta tatou taparuraa i te Atua, to tatou Metua Mure ore, te parau nei tatou e, « e haamanaʻo tamau noa » tatou i Ta’na Tamaiti faufaa rahi. A tahi, e faaite tatou i to tatou « hinaaro » ia haamanaʻo. I muri iho, e faaite tatou e, e « haamanaʻo » tatou. Na roto i te reira, te rave ra ïa tatou i te fafauraa hanahana ia faaite i te faaroo ia Iesu Mesia, e i Ta’na faaoraraa ia tatou i te pohe e te hara.

I muri iho e parau tatou e, « e haapaʻo tatou i ta’na mau faaueraa ». E fafauraa hanahana teie no te tatarahapa. Mai te mea e, aita to tatou mau manaʻo, te mau parau, e aore ra, ta tatou mau ohipa i te mau mahana i maʻiri ra i tuati roa i tei titauhia, e fafau faahou ïa tatou ia faatuati maitai atu i to tatou oraraa i To’na, i roto i te mau mahana e haere mai nei.

I muri iho, e parau tatou e, te hinaaro nei tatou « i te rave i te iʻoa o te Tamaiti i niʻa iho ia [tatou] ».³⁶ E fafauraa hanahana teie no te faahaehaa ia tatou i mua i To’na mana e no te rave i Ta’na ohipa, oia hoi, te fariiraa i te mau oroʻa e te mau fafauraa atoa no tatou iho.³⁷

Ia fafau anaʻe tatou e haapaʻo i teie mau parau tumu, ua fafauhia mai ia tatou i roto i na pure no te oroʻa moʻa e, « e vai To’na Varua i roto ia [tatou] ».³⁸ Te farii-faahou-raa i te Varua, o te hoê ïa haamaitairaa teitei roa aʻe, i te mea e, na te Varua e tamâ e e haamoʻa ia tatou i te hara e te ofatiraa i te ture.³⁹

E te mau taeaʻe e te mau tuahine, te ohipa faufaa roa aʻe no te tau e no te tau a muri atu o te Taraehara ïa a Iesu Mesia. Oia o tei faatupu i te Taraehara, ua horoʻa mai Oia ia tatou i te oroʻa no te oroʻa moʻa no te tauturu ia tatou eiaha i te haamanaʻo noa, no te titau atoa râ i te mau haamaitairaa atoa o teie ohipa hanahana o te aroha. Mai te mea e, e amui tamau tatou e ma te aau tae mau i roto i teie oroʻa moʻa, e tauturu te reira ia tatou ia farii tamau noa ma te hinaaro mau e ia ora i te haapiiraa tumu a te Mesia i muri aʻe i te bapetizoraa, e na roto i te reira, e rave faaoti roa tatou i te faanahoraa o te haamoʻaraa. Oia mau, na te oroʻa o te oroʻa moʻa e tauturu ia tatou ia rohi tamau noa ma te haapaʻo maitai e tae roa’tu i te hopea e ia farii i te îraa o te Metua mai ia Iesu i na reira, te maitai e au atoa i to’na ra maitai.⁴⁰

Te faaʻite papû nei au i te mana o Iesu Mesia no te faaora ia tatou paatoa mai te pohe mai e te mana o te oroʻa o Ta’na autahuʻaraa, oia hoʻi, te oroʻa moʻa, no te faaineine ia tatou ia « ite i te mata o te Atua, oia o te Metua, e oraʻi ».⁴¹ E mata na tatou ia farii i te oroʻa moʻa i te hepetoma i muri nei, e i te mau hepetoma atoa i muri iho, ma te hinaaro rahi aʻe e te opuaraa papû aʻe, ta’u ïa pure na roto i te iʻoa o te Fatu o Iesu Mesia ra, amene.

Te mau nota

1. Hiʻo Mataio 26:17–20 ; Mareko 14:12–17 ; Luka 22:7–18.

2. Hiʻo Exodo 12 ; Numera 28:16–25 ; Bible Dictionary, « Feasts ».

3. Hiʻo Exodo 13:12–13 ; Mosia 2:3–4 ; Mose 5:5–8.

4. Hiʻo Mataio 26:26 ; Mareko 14:22 ; Luka 22:19 ; 1 Korinetia 11:24. A haamau ai Iesu i te oroʻa moʻa i rotopu i te ati Nephi i muri aʻe i To’na tiʻa-faahou-raa, ua vavahi Oia i te faraoa, haamaitai ihora i te reira (hiʻo 3 Nephi 18:3).

5. Mataio 26:26 ; Mareko 14:22 ; 1 Korinetia 11:24.

6. Luka 22:19 ; hiʻo atoa 1 Korinetia 11:24.

7. Luka 22:20 ; hiʻo atoa Mataio 26:28 ; Mareko 14:24 ; 1 Korinetia 11:25.

8. Mataio 26:28.

9. Luka 22:19 ; hiʻo atoa 3 Nephi 18:11.

10. Hiʻo 2 Nephi 11:4 ; 25:24–25 ; Iakoba 4:5 ; Alama 34:14 ; 3 Nephi 9:17, 19–20 ; Mose 5:5–8.

11. Hiʻo Ioane 6:51–57 ; 1 Korinetia 11:24–26 ; Te Parau Haapiiraa e te Mau Parau Fafau 20:40.

12. Te Ohipa 20:7.

13. Te Ohipa 2:42.

14. Hiʻo 3 Nephi 9:19–20 ; 18:1–11 ; 20:3–9 ; 26:13.

15. 3 Nephi 18:6.

16. 3 Nephi 18:7.

17. Hiʻo Te Parau Haapiiraa e te Mau Parau Fafau 20:75 ; 27:2 ; 59:9–12.

18. Te mau haapiiraa a te mau Peresideni o te Ekalesia : Joseph Fielding Smith (2013), 107. « I roto i ta’u hiʻoraa ua riro te pureraa oroʻa ei pureraa tapu roa aʻe, te mea moʻa roa aʻe, ia faaauhia i te mau pureraa atoa a te Ekalesia » (Te mau haapiiraa : Joseph Fielding Smith, 107).

19. Hiʻo Alama 7:11.

20. Hiʻo Luka 22:44 ; Mosia 3:7 ; Te Parau Haapiiraa e te Mau Parau Fafau 19:18.

21. Hiʻo Salamo 22:16 ; Ioane 19:33–34 ; 20:25–27 ; 3 Nephi 11:14 ; Te Parau Haapiiraa e te Mau Parau Fafau 6:37 ; James E. Talmage, Iesu te Mesia, neneʻiraa 3 (1916), 669.

22. Hiʻo Mataio 28:6 ; Luka 24:6, 39 ; Ioane 20:20 ; Te Parau Haapiiraa e te Mau Parau Fafau 76:22–24.

23. Hiʻo Ioane 6:51–59 ; Alama 11:42–44 ; 40:23 ; 3 Nephi 27:13–15.

24. Hiʻo Luka 22:44 ; Mosia 3:7 ; Te Parau Haapiiraa e te Mau Parau Fafau 19:18.

25. Hiʻo Isaia 53:5 ; Mataio 26:67 ; 27:26, 29–30 ; Mareko 14:65 ; 15:15, 19 ; Luka 22:63–65 ; Ioane 19:1 ; Mosia 15:5.

26. Hiʻo Mataio 27:35 ; Mareko 15:15 ; Luka 23:33 ; Ioane 19:16, 33–34.

27. Te Parau Haapiiraa e te mau Parau Fafau 19:15.

28. Hiʻo Alama 11:42–45 ; 3 Nephi 27:13–15.

29. Hiʻo Mose 6:55.

30. Hiʻo Mataio 5:27–28 ; 12:36 ; Iakobo 3:1–13 ; Mosia 4:29–30 ; Alama 12:14.

31. Mose 6:57 ; hiʻo atoa 1 Korinetia 6:9 ; Ephesia 5:5 ; 1 Nephi 10:21 ; 15:33–34 ; Alama 7:21 ; 11:37 ; 40:26 ; 3 Nephi 27:19 ; Te Parau Haapiiraa e te Mau Parau Fafau 1:31–32.

32. Alama 36:15 ; hiʻo atoa irava 14 ; Apokalupo 6:15–17 ; Alama 12:14.

33. 3 Nephi 27:19–20.

34. Hiʻo 2 Nephi 31:2–21 ; 3 Nephi 11:31–41 ; 27:13–22 ; Te Parau Haapiiraa e te Mau Parau Fafau 76:40–42, 50–54, 69–70.

35. Hiʻo 3 Nephi 27:19 ; hiʻo atoa Apokalupo 1:5–6 ; 7:14–15 ; Alama 5:21 ; 13:11–12 ; Etera 13:10–11 ; Mose 6:59–60.

36. Te Parau Haapiiraa e te Mau Parau Fafau 20:77 ; Moroni 4:3.

37. Hiʻo Dallin H. Oaks, His Holy Name (1998) ; Dallin H. Oaks, « Taking upon Us the Name of Jesus Christ », Ensign, Me 1985, 80–83.

38. Te Parau Haapiiraa e te Mau Parau Fafau 20:77, 79 ; Moroni 4:3 ; 5:2.

39. Hiʻo Roma 15:16 ; 1 Korinetia 6:11 ; 2 Nephi 31:17 ; Alama 5:54 ; 13:12 ; 3 Nephi 27:20 ; Moroni 6:4.

40. HiʻoTe Parau Haapiiraa e te Mau Parau Fafau 93:6–20.

41. Te Parau Haapiiraa e te Mau Parau Fafau 84:22.