Tae atu i te taime e farerei faahou ai tatou
Na te peresideni Thomas S. Monson
Ia feruri maite tatou paatoa i te mau parau mau ta tatou i faaroo, e ia tauturu te reira ia tatou ia riro mai ei pĭpĭ itoito a‘e.
To’u mau taea‘e e to’u mau tuahine, e piti mahana hanahana ma te poroʻi faaûru ta tatou i ratere a‘enei. Ua putapu to tatou aau e ua haapuaihia to tatou faaroo a farii ai tatou i te varua tei vauvauhia mai i roto i te mau tuhaa pureraa o teie amuiraa. E a faaoti ai tatou, te haamauruuru nei tatou i to tatou Metua i te Ao ra no Ta’na mau haamaitairaa e rave rahi i ni‘a ia tatou.
Ua faateiteihia tatou e ua faaûruhia tatou e te mau himene nehenehe tei faataʻihia mai i roto i te mau tuhaa pureraa. Ua haafatata te mau pure, tei horo‘ahia mai, ia tatou i te raʻi.
Te faatae atu nei au i te mauruuru o te Ekalesia taatoa, i te mau taea‘e tei haamauruuruhia i teie amuiraa. E mihi matou ia outou. E tautururaa rahi roa ino ta ratou i horo‘a mai i roto i te ohipa a te Fatu e e vai noa te reira i roto i te mau uʻi e haere mai nei.
Ia hoʻi atu tatou i to tatou fare ma te hinaaro papû i roto i te aau ia riro maitai rii a‘e tatou i ta tatou i riro na mua’tu. Ia hamani maitai rii a‘e tatou i te taata e ia haapa‘o rahi atu hoʻi ia ratou. Ia toro atu tatou i te rima tauturu rahi, eiaha i to tatou ana‘e mau melo, ia ratou atoa râ e ere no to tatou faaroo. Ia amui atu tatou ia ratou, ia faa‘ite atu tatou i to tatou faatura ia ratou.
Te vai ra o te tafifi nei i te mau mahana atoa i te mau tamataraa. Ia faatae atu tatou i to tatou manaʻonaʻoraa, e na reira atoa to tatou rima tauturu. A aupuru ai tatou te tahi i te tahi, e haamaitaihia tatou.
Ia haamana‘o tatou i te feia ruhiruhia e o ratou atoa tei mau i te fare. A rave ai tatou i te taime no te hahaere ia ratou, e ite mai ratou e, ua herehia ratou e e mea faufaa ratou. Ia pee atoa tatou i te faaueraa ia « aupuru i te feia paruparu, ia faateitei mai i te rima tautau ra i ni‘a e ia faaetaeta i te mau turi avae paruparu ra ».1
Ia riro tatou ei feia haavare ore e te parau ti‘a, ma te tamata i te rave i te ohipa maitai i te mau taime atoa e noa’tu te huru oraraa. Ia riro tatou ei feia pee i te Mesia ma te haapa‘o maitai, ei hi‘oraa no te parau ti‘a, oia hoʻi ei « mau tiarama o te ao nei ».2
To’u mau taea‘e e to’u mau tuahine, te haamauruuru nei au ia outou no ta outou mau pure no’u. Ua haapuai te reira ia’u e ua faateitei mai hoʻi a tutava noa ai au ma to’u aau atoa e ma to’u puai atoa ia rave i te hinaaro o te Atua e ia tavini Ia’na e ia tavini ia outou.
A vaiiho ai tatou i teie amuiraa, te pii nei au i te mau haamaitairaa o te raʻi i ni‘a ia outou tata‘itahi. O outou tei atea i to outou fare, ia hoʻi outou ma te paruruhia e ia nahonaho maitai te mau ohipa i reira. Ia feruri maite tatou paatoa i te mau parau mau ta tatou i faaroo, e ia tauturu te reira ia tatou ia riro mai ei pĭpĭ itoito a‘e i ta tatou i riro i te omuaraa o teie amuiraa.
Tae atu i te taime e farerei faahou ai tatou i roto e na avaʻe e ono, te ani nei au i te mau haamaitairaa a te Fatu i ni‘a ia outou, e oia mau, i ni‘a ia tatou paatoa, e te na reira nei au na roto i To’na i‘oa mo‘a―oia hoʻi Iesu Mesia, to tatou Faaora e Ora―amene.