Maeva i te amuiraa

Na te peresideni Thomas S. Monson

A faaroo ai tatou, ia putapu to tatou aau e ia rahi atu â to tatou faaroo.

To’u mau taea‘e e to’u mau tuahine, ua anaanatae vau i te fariiraa ia outou i teie amuiraa rahi na te ao atoa nei. Ua haaputuputu amui tatou na te mau vahi atoa na te ao nei no te faaroo e no te haapii hoʻi mai roto mai i te mau taea‘e e te mau tuahine ta tatou i paturu ei hui mana faatere e ei faatere rahi o te Ekalesia. Ua imi ratou i te tauturu a te raʻi no te poroʻi e vauvau atu, e ua tae mai te faaûruraa no te mea e parau mai.

O teie amuiraa te 90raa o te matahiti ua haapurorohia te amuiraa rahi na roto i te radio. I te amuiraa rahi no atopa 1924, ua haapurorohia te mau tuhaa pureraa na roto i te radio no te taime matamua, mea na roto i te pû radio KSL a te Ekalesia i tera tau. O teie atoa amuiraa te 65raa o te matahiti a haapurorohia ai te amuiraa na roto i te afata teata. I te amuiraa rahi no atopa 1949, ua haapuroro-matamua-hia te mau tuhaa pureraa na roto i te afata teata i Roto Miti na roto i te pû teata KSL.

Te ite nei tatou i te mau haamaitairaa no te mau rave‘a apî i te faati‘araa e rave rahi milioni melo o te Ekalesia ia mata‘ita‘i e ia faaroo i te amuiraa rahi. E haapurorohia te mau tuhaa pureraa o teie hopea hepetoma na roto i te afata teata, te radio, te niuniu, te peeʻutari e te Itenati, i ni‘a atoa i te mau matini afaʻifaʻi.

I roto i na avaʻe e ono i ma‘iri, mai ta tatou farereiraa hopea, ua haamoʻahia te hoê hiero apî e ua haamoʻa-faahou-hia te tahi. I te avaʻe no me, ua haamoʻa te peresideni Dieter F. Uchtdorf i te hiero no Fort Lauderdale Florida. Ua faatupuhia te hoê pô faariiraa i te mahana na mua’tu te haamoʻaraa. I te mahana no muri iho, i te sabati 4 no me, ua haamoʻahia te hiero i roto e toru tuhaa pureraa.

E piti hepetoma i maʻiri a‘enei, na’u ïa te haamaitairaa no te haamoʻa-faahou-raa i te hiero no Ogden Utah, tei haamoʻa-matamua-hia i te matahiti 1972 e te peresideni Joseph Fielding Smith. Ua faatupuhia te hoê pô faariiraa i te mahana na mua’tu te haamoʻa-faahou-raa, e ua rahi roa te feia apî i amui mai e no reira ua tatuhaahia ratou, e e mea taa ê teie e mea taa ê te tahi. E 16 000 feia apî i te taatoaraa tei amui mai. Ua ravehia te mau pureraa haamoʻaraa i te mahana no muri iho, e rave rahi hui mana faatere tei tae mai, e te mau faatere no te mau pupu tauturu, e te peresideni hiero e to’na na tauturu e ta ratou vahine.

Te tamau noa nei ta tatou paturaa hiero ma te puai. I te avaʻe i muri nei, e haamoʻahia te hiero no Phoenix Arizona, e i te matahiti i muri nei, i te matahiti 2015, te opua nei matou e haamoʻa e aore râ e haamoʻa faahou e pae a‘e hiero, peneiaʻe e rahi atu â, tei te huru te faaotiraa.

Mai ta’u i faaara’tu i te avaʻe eperera ra, ia oti te mau hiero atoa tei faaarahia i te patuhia e i te haamoʻahia, ua 170 atura ïa hiero matara ta tatou na te ao atoa nei. No te mea te tutonu nei te mau tautooraa i ni‘a i te faaotiraa i te mau hiero tei faaarahia a‘enei, eita matou e faaara’tu i te tahi hiero apî i teie taime. Ia itehia râ te hinaaro e te vahi ananahi, e faaarahia’tu ïa te mau hiero apî.

Te tamau noa nei te Ekalesia i te tupu i te rahi. Ua hau tatou i te 15 milioni tiʻahapa i teie nei, pautuutu maitai e te rahi noa ra te numera. Te haere noa ra ta tatou tautooraa misionare i mua ma te taupupu ore. Ua hau i te 88 000 misionare e tavini ra, o te faa‘ite ra i te poro‘i o te evanelia i to te ao atoa nei. Te haapapû faahou atu nei matou e, e hopoi‘a na te autahu‘araa te ohipa misionare, e te faaitoito nei matou i te feia apî tamaroa ti‘amâ atoa ia tavini. Ua mauruuru roa matou i te feia apî tamahine e tavini nei. Ua riro ratou ei tautururaa rahi, noa’tu e ere ratou i raro a‘e i te faaueraa ia tavini mai te feia apî tamaroa.

I teie nei, te ani manihini nei au ia outou ia faaroo maitai i te mau taea‘e e te mau tuahine e paraparau mai i teie mahana e ananahi i roto i ta tatou mau tuhaa amuiraa. Ua farii te mau taata atoa tei anihia ia paraparau i teie hopoi‘a rahi. A faaroo ai tatou, ia putapu to tatou aau e ia rahi atu â to tatou faaroo. O ta’u ïa pure haehaa i te i‘oa o Iesu Mesia, amene.