Te patururaa i te mau peropheta
Na Elder Russell M. Nelson
No te Pŭpŭ no te Tino Ahuru Ma Piti Aposetolo
Ua riro ta tatou patururaa i te mau peropheta ei fafauraa ia tatou iho ia rave i te mau mea atoa no te turu i te mau tautooraa matamua e tohuhia mai e ratou.
E te peresideni Eyring, mauruuru no ta oe poroʻi faaûru e te haamaramarama. E to’u mau taeaʻe e mau tuahine here, te mauruuru nei matou no to outou faaroo e to outou itoito. I nanahi ra, ua anihia tatou tataʻitahi ia paturu ia Thomas S. Monson ei peropheta na te Atua e ei Peresideni no te Ekalesia a te Fatu. Te himene pinepine nei tatou, « Mauruuru matou e te Atua no ta oe na peropheta ».1 Te taa maitai ra anei tatou i te auraa o te reira ? A feruri na i te haamatairaa ta te Fatu i horoʻa ia tatou ia paturu i Ta’na peropheta, o oia o te horoʻa mai nei i te aʻo poraʻo ore, viivii ore, ma te ore e haapa‘o i to’na iho hinaaro, e tei hope roa hoʻi i te parau mau !
Nahea tatou e paturu mau ai i te hoê peropheta ? Na mua roa a riro mai ai oia ei Peresideni no te Ekalesia, ua faataa mai te peresideni Joseph F. Smith : « E hopoi’a faufaa te reira no te Feia Moʻa ia… paturu i te feia mana o te Ekalesia, ia na reirahia, eiaha râ na roto noa i te afaʻiraa i te rima i niʻa, na roto atoa râ i te ohipa e te parau mau ».2
Te haamanaʻo maitai nei au i te ohipa taa ê roa ta’u i rave no te patururaa i te hoê peropheta. Ei taote rapaau maʻi e ei taote mafatu, e hopoiʻa ïa na’u ia tapû i te mafatu o te peresideni Spencer W. Kimball i te matahiti 1972, i tera taime e mono peresideni oia no te Pŭpŭ no te Tino Ahuru Ma Piti Aposetolo. E mea fifi roa to’na tapuraa. Aita hoʻi to’u aravihi no te raveraa i te reira huru tapûraa i niʻa i te hoê taata maʻi mafatu e 77 matahiti i te paari. Ua parau vau e e ere i te mea tiʻa ia ravehia teie tapûraa e ua faaara vau i te peresideni Kimball e te Peresideniraa Matamua. Ma te faaroo râ, ua maʻiti te peresideni Kimball, ia ravehia te reira, no te mea noa e, ua aʻo te Peresideniraa Matamua i te reira. Na te reira i faaʻite i to’na huru patururaa i to’na feia faatere ! E ua mataʻu vau i taua faaotiraa ra !
Mauruuru i te Fatu, ua manuia te tapûraa. I te haamata-faahou-raa te mafatu o te peresideni Kimball i te otuʻi, e mea puai rahi roa ïa ! I taua iho taime ra, ua noaa ia’u te hoê faaʻiteraa papû a te Varua e e riro mai teie taata ei Peresideni no te Ekalesia i te hoê mahana !3
Ua ite outou e aha te ohipa i tupu i muri mai. E 20 noa avaʻe i muri mai, ua riro mai te peresideni Kimball ei Peresideni no te Ekalesia. E ua faatere uʻana oia e ma te itoito e rave rahi matahiti.
Mai te reira mai â taime, ua paturu tatou i te mau peresideni Ezra Taft Benson, Howard W. Hunter, Gordon B. Hinckley, e Thomas S. Monson i teie nei ei mau Peresideni no te Ekalesia―e peropheta i to’na auraa mau !
E to’u mau taeaʻe e tuahine, mai te mea e ohipa ta te Faahoʻi-faahou-raa o te Evanelia i rave, o te faaoreraa ïa i te manaʻo hape e, ua faaea te Atua i te paraparau i Ta’na mau tamarii. Aore roa e mea atea roa’tu i te parau mau. Ua arata‘i te hoê peropheta i te Ekalesia a te Atua i te mau tau tuuraa atoa o te evanelia, mai ia Adamu mai e tae noa mai â i teie nei mahana.4 Te faaʻite papû nei te mau peropheta no niʻa ia Iesu Mesia―no niʻa i To’na hanahana e Ta’na misioni e taviniraa i niʻa i te fenua nei.5 Te faahanahana nei tatou i te peropheta Iosepha Semita ei peropheta no teie tau tuuraa hopea no te evanelia. E te faahanahana nei tatou i te mau taata atoa o tei mono mai ia’na ei Peresideni no te Ekalesia.
Ia paturu tatou i te mau peropheta e te tahi atu mau feia faatere,6 te faaohipa ra ïa tatou i te ture no te fariiraa amui i roto i te Ekalesia no te mea ua parau te Fatu : « E ore roa e horoʻahia’tu i te hoe taata ia haere atu e ia poro haere i ta’u nei evanelia, e aore râ ia faatupu i ta’u nei ekalesia, maori râ ia oti oia i te faatoroʻahia e te hoê o tei mau i te mana, e ua itehia hoʻi e to te ekalesia e e mana to’na e ua faatoroʻa-tiʻa-hia hoʻi e te mau upoʻo faatere no te ekalesia ».7
Na teie e horoʻa ia tatou, te mau melo no te Ekalesia a te Fatu, te tiʻaturiraa e te faaroo a tutava ai tatou ia haapaʻo i te faaueraa a te papaʻiraa moʻa ia faaroo i te reo o te Fatu8 ia tae mai na roto i te reo a Ta’na mau tavini, te mau peropheta.9 Ua piihia te taatoʻaraa o te feia faatere i roto i te Ekalesia a te Fatu na roto i te mana tiʻa. No reira, aore roa ïa e peropheta aore râ te tahi atu taata faatere i roto i teie Ekalesia, e pii ia’na iho. Aore roa e peropheta e maʻitihia. Ua haamaramarama mai te Fatu i te reira a parau ai Oia e, « E ere o outou tei hinaaro mai ia’u ; o vau râ, tei hinaaro atu ia outou, e ua haapao ïa outou ».10 Eita outou e o vau nei e maʻiti i te feia faatere atoa no te Ekalesia. E haamaitairaa râ na tatou ia paturu ia ratou.
E mea taa ê te mau eʻa a te Fatu i te mau eʻa a te taata. E iriti ê atu te mau eʻa a te taata nei i te mau taata mai roto atu i to ratou tiʻaraa aore râ ohipa, ia paari aore râ ia hapepahia ratou. E ere roa râ te mau eʻa a te taata nei i te mau eʻa a te Fatu. Ua riro ta tatou patururaa i te mau peropheta ei fafauraa ia tatou iho ia rave i te mau mea atoa no te turu i te mau tautooraa matamua e tohuhia mai e ratou. Ua riro ta tatou patururaa mai te hoê tapuraa faa‘iteraa i to tatou faʻiraa i ta ratou piiraa peropheta ei piiraa mana e te ruuruuhia i ni‘a ia tatou.
E piti ahuru ma ono matahiti hou a riro mai ai ei Peresideni no te Ekalesia, ua parau o Elder George Albert Smith : « Te hopoi‘a ta tatou e rave a afa‘i ai tatou i to tatou rima i ni‘a… e hopoi‘a mo‘a roa ïa. Te auraa ra, e ere ïa te haere-noa-raa tatou ma te haape‘ape‘a ore e ma te hinaaro ia faatere te peropheta o te Fatu i teie ohipa, to’na auraa mau maori râ… e ti‘a ïa tatou i muri ia’na ; e pure ïa tatou no’na ; e paruru ïa tatou i to’na i‘oa maitai, e e faaitoito ïa tatou ia faaohipa i ta’na mau haapiiraa mai ta te Fatu i faaue ia’na ».11
Te aratai nei te Fatu ora i Ta’na ekalesia ora !12 Te heheu mai nei te Fatu i To’na hinaaro no te Ekalesia i Ta’na peropheta. I nanahi ra, i muri aʻe i to tatou aniraahia ia paturu ia Thomas S. Monson ei Peresideni no te Ekalesia, ua farii atoa tatou i te haamaitairaa ia paturu ia’na, i te mau tauturu i roto i te Peresideniraa Matamua, e i te mau melo no te Pŭpŭ no te Tino Ahuru ma Piti Aposetolo, ei mau peropheta, ei mau hiʻo e ei mau heheu parau. A feruri na i te reira ! Te paturu nei tatou 15 taata ei mau peropheta a te Atua ! Te mau nei ratou i te taatoʻaraa o te mau taviri autahuʻaraa tei horoʻahia mai i niʻa i te taata nei i roto i teie tau tuuraa evanelia.
Te piiraa o na 15 taata i te tiʻaraa moʻa no te aposetoloraa ua riro ïa ei parururaa rahi roa no tatou te mau melo no te Ekalesia. No te aha ? No te mea e tiʻa i te mau faaotiraa a teie mau faatere ia hoê.13 E nehenehe anei ia outou ia feruri nahea e tiʻa ai i te Varua ia faaûru 15 taata ia hoê ? Ua rau te mau huru o te ite e te aravihi i te ohipa o teie na 15 taata, ma te mau huru feruriraa taa ê no niʻa i te mau mea e rave rahi. A tiʻaturi mai ! E ite teie na 15 taata―teie mau peropheta, mau hiʻo e mau heheu parau―i te hinaaro o te Fatu ia hoê anaʻe ratou i roto i te faaotiraa ! Ua hinaaro mau ratou ia tupu mau ihoa te hinaaro o te Fatu. Ua riro te Pure a te Fatu ei hohoʻa na teie na 15 taata tataʻitahi ia pure anaʻe ratou : « Ia haapaohia to oe hinaaro i te fenua nei mai tei te raʻi atoa na ».14
Na te aposetolo tahito roaʻe i roto i te toroʻa aposetolo e peresideni.15 E faahaere teie faanahoraa no te taata tahito roaʻe i roto i te toroʻa, i te taata paari aʻe i te toroʻa Peresideni no te Ekalesia.16 E horoʻa mai te reira i te tamau-noa-raa, te paari i roto i te aravihi, te ite, te faaineineraa, mai te au i te arataʻiraa a te Fatu.
Te Ekalesia i teie mahana ua faanahohia ïa e te Fatu iho. Ua haamau Oia i te hoê faanahoraa faahiahia no te faatereraa o te faatupu i te apipitiraa e te paʻepaʻeraa. E horoʻa mai taua faanahoraa ra i te arataʻiraa a te peropheta noa’tu te mau maʻi e te mau haaparuparuraa e tupu mai no te faito matahiti paari.17 Te vai nei te mau faaaifaitoraa e te mau parururaa e rave rahi ia ore te hoê taata e arataʻi i te Ekalesia i vaho. E haapii tamau-noa-hia te mau taata faatere paari ia ineine ratou i te hoê mahana ia parahi i roto i te mau apooraa faatere teitei roaʻe. E haapii ratou nahea i te faaroo i te reo o te Fatu na roto i te mau muhumuhuraa a te Varua.
A tavini ai oia ei tauturu matamua no te peresideni Ezra Taft Benson, tei piri roa i taua taime ra i te pae hopeʻa o to’na oraraa tahuti, ua haamaramarama mai te peresideni Gordon B. Hinckley :
« Te mau ture e te mau tereraa ohipa ta te Fatu i faanaho no te faatereraa i Ta’na ekalesia, e faaineine ïa te reira… no te mau huru ohipa atoa e tupu mai. E mea faufaa rahi… i te mea e aita roa e mau feaaraa aore râ mau haapeʻapeʻaraa no niʻa i te faatereraa o te Ekalesia e te faaohiparaa i te mau horoʻaraa a te peropheta, mai te mana ia farii i te faaûruraa e te heheuraa i roto i te faatereraa i te mau ohipa e te mau faanahoraa a te Ekalesia, ia maʻihia aore râ ia ore e maraa i te peresideni ia faatere maite.
« E mana e e hopoiʻa na te Peresideniraa Matamua e te Pŭpŭ no te Tino Ahuru Ma Piti Aposetolo, tei piihia e tei faatoroʻahia no te mau i te mau taviri no te autahuʻaraa, ia faatere i te Ekalesia, ia faatere i to te reira mau oroʻa, ia hohora i to te reira haapiiraa tumu e ia haamau e ia tamau i to te reira mau faaohiparaa ».
Ua parau â te peresideni Hinckley :
« Ia maʻihia te peresideni aore râ ia ore e maraa ia’na ia faatere maite i roto i ta’na mau ohipa atoa no to’na toroʻa, ua riro ïa to’na na tauturu e piti ei pŭpŭ no te Peresideniraa Matamua. E faatere ïa raua i te ohipa a te Peresideniraa i te mau mahana atoa…
« … Te mau uiraa rahi râ no niʻa i te mau faatureraa, te mau tereraa ohipa, te mau faanahoraa, aore râ te haapiiraa tumu, e tuatapapa-huʻahuʻa-amui-hia ïa te reira na roto i te pure e te Peresideniraa Matamua e te Tino Ahuru Ma Piti ».18
I te matahiti i maʻiri aʻenei, a raʻeraahiaʻi i te peresideni Monson te tapaʻo no te 5 matahiti taviniraa ei Peresideni no te Ekalesia, ua feruri oia i ta’na 50 matahiti taviniraa ei aposetolo e ua parau oia : « E fifi ihoa tatou paatoa no to tatou matahiti paari. Areʻa râ, e apiti matou i to matou reo i to te arii Beniamina, tei parau e : ‘E taata mau â râ vau mai ia outou atoa te huru, e tia hoʻi ia roohia-noa-hia i te mau mea tia ore o te tino nei e o te aau atoa hoʻi ; i maitihia râ vau… e i faatahinuhia vau e tau metua ra… ua haapaohia e ua faaorahia hoʻi au e to’na ra mana faito ore, ia tavini ia outou ma te mana atoa, e te hinaaro atoa, e te puai atoa hoʻi ta te Fatu i horoa mai ia’u nei ra (Mosia 2:11)’ ».
Ua parau â te peresideni Monson : « Noa’tu te mau fifi atoa no te ea e nehenehe e tae mai i niʻa ia tatou, noa’tu te mau paruparu i roto i te tino e te feruriraa, te tavini nei matou mai te au i to matou puai. Te haapapu atu nei au ia outou e te arataʻi-maitai-hia nei te Ekalesia. Te haapapû mai nei te faanahoraa tei haamauhia no te Pŭpŭ no te Peresideniraa Matamua e te Pŭpŭ no te Tino Ahuru Ma Piti [Aposetolo] ia tatou e e vai noa te reira i roto i te mau rima maitai e, noa’tu te mau mea e tupu mai, aita e haapeʻapeʻaraa aore râ e mataʻuraa. Te arataʻi nei to tatou Faaora, o Iesu Mesia, ta tatou e pee nei, ta tatou hoʻi e haamori nei, e ta tatou hoʻi e tavini nei, i te Ekalesia ».19
E te peresideni Monson, te haamauruuru nei matou ia oe no taua mau parau mau ra ! E te haamauruuru nei matou ia oe no te hiʻoraa maitai o ta oe taviniraa roa e te itoito. Ia tiʻa ia’u ia parau atu ei tiʻa no te mau melo no te Ekalesia na te ao atoa nei i to matou manaʻo amui no te mauruuru ia oe. Te faanahanahana nei matou ia oe ! Te here nei matou ia oe ! Te paturu nei matou ia oe, eiaha na roto noa i to matou rima i niʻa na roto atoʻa râ i to matou aau atoa e ta matou mau tutavaraa mau. Ma te haehaa e te puai, « te pure nei matou no oe, to matou peropheta here e ! »20 I te iʻoa o Iesu Mesia, amene.