Lisi ʻo e Meʻa Mahuʻinga Taha ʻe 10 ʻa ʻEpí

Fai ʻe Rosemary M. Wixom

Palesiteni Lahi ʻo e Palaimelí

Mei he “Tuku ha Taimi ke Talanoa ai mo Fakafanongo, Liahona, ʻEpeleli 2012, 34.

“Ko e palani ʻeni ʻo e fakamoʻuí ki he kakai kotoa pē” (Mōsese 6:62).

Lolotonga haʻaku ʻaʻahi ʻi ha meʻa ʻe taha ki ha kalasi ʻa ha kau finemui, ne kole ange ʻa e faiakó ki he kalasí ke nau hiki ʻenau ngaahi taumuʻa māʻolunga taha ʻe 10 ʻo ʻenau moʻuí. Hili ia pea kole ange ke nau vahevahe ʻa e meʻa ne nau hikí. Naʻe tangutu ʻa ʻEpi, ne toki hoko pē hono taʻu 12, ofi mai kiate au. Ko e lisi ʻeni ʻa ʻEpí:

1. Hū ki he ʻunivēsití.

2. Hoko ko ha taha teuteu fale.

3. ʻAlu ʻo ngāue fakafaifekau ʻi ʻInitia.

4. Mali ʻi he temipalé mo ha taha ne ʻosi ngāue fakafaifekau.

5. Maʻu ha fānau ʻe toko nima mo ha ʻapi.

6. ʻAve ʻeku fānaú ke ngāue fakafaifekau pea hū ki he ʻunivēsití.

7. Hoko ko ha kuifefine “tufa kūkisi.”

8. ʻOfa valeʻi e makapuná.

9. Ako lahi ange ki he ongoongoleleí pea fiefia he moʻuí.

10. Foki ʻo nofo mo e Tamai Hēvaní.

Naʻe maʻu ʻe ʻEpi ha vīsone ki he palani ʻa e Tamai Hēvaní maʻatautolu kotoa. Ko e taimi ʻoku tukutaha ai ho halá ʻi he taumuʻa mahuʻinga taha ʻo e foki ki he Tamai Hēvaní, te ke aʻu ki ai!

Ko Hoʻo Lisi ʻo e Meʻa Mahuʻinga Taha ʻe 10

Hiki ha taumuʻa ʻe 10 ki hoʻo moʻuí. Hili ia pea hiki kinautolu ʻi hoʻo tohinoá, ʻi homou holisí, pe ʻi ha feituʻu te ke lava ʻo toutou sio ai kiate kinautolú.